الجزء الثالث
اليوم الجمعه كلهم طالعين على المزرعه ..عائلة ابو هبه مع عائلة ام هبه و فى ناس غرب كمان معزومين والحفله كانت عقيقه لابن لؤى (ابن العمه عليا ) لان مرته ولدت
بما ان المزرعه مكشوفه فالكل بده يبقى بحجابه لان جلست النسوان بتطل على جلست الرجال .... اغلب البنات كانوا لابسين جنز مع بلايز طويله بس ام هبه مابتحب الجنز كتير فبناتها كانوا لابسين بنطلونات رسمى مع بلايز طويله فلكلوريه حلوه كتير جايبنها من اسبانيا من اخر رحله الهم..... غاليه بلوزتها مشمشى موج بعطى لمعه فوشى ومطرز بخيطان ملونه وكانت لابسه تحته بنطلون سمنى وحاطه ايشرب مشمشى .... غاليه كتير شاطره بالمكياج بس مابتحط الا اذا كانت الجلسه كلها نسوان منشان هيك كانت تقريبا مو حاطه شى على وجها الا كحل بداخل عيونها لونه اسود ومسكره سودا و كريم الواقى من الشمس
خواتها نفس الشى لان ابوهم مابحب يطلعوا بمكياج قدام حدا هبه كانت بلوزتها زرقا و لجين بلوزتها خضرا
الكل كان بتمشى بالمزرعه وغاليه كانت بتتمشى مع هلا وسوزان وسوسن (بنات خالتهم و عمتهم ) ولجين وكانوا بقطفوا من شجرات الكرز بياكلوا هم بضحكو بتكلموا
قالت لجين وهى بتحط ايدها على بطنها يالله شقد جوعانه متى الغدا؟.. دخيل الله دخت وبطنى صارت توجعننى من اكل الكرز..
ردت عليها غاليه وهى بترفع كتافها .... مابعرف شو مستنين
قالت سوزان ... انا سمعتهم بقولو ان فى ضيف لسى ما اجى يمكن بستنوه ....
ولسى ما كملت جملتها الا وسمعو صوت زمور سياره منشان يفتح الحارس بوابة المزرعه
ركضو البنات ليشوفوا مين وصل شافو سياره فخمه كتير سودا داخله من بوابة المزرعه
قالت سوسن .. ياسلام شو السياره الكشخه هى.... بنات انتوا شايفين مين جواتها ؟
خبطتها اختها على راسها وقالت مو شايفتها مضلله كيف بدنا نشوف مين جواتها استنى هلا بصف وبنعرف مين جاى
تمو البنات بترقبو مين رح ينزل من السياره ولما وقفت السياره وانفتح الباب نزل منها رجال طويل كتير وجسمه رياضى شكله كتير مهتم فيه وشعره اسود بلمع تحت الشمس
نطت سوسن وقالت بانفعال وهى بتحط ايدها على قلبها بحركه مسرحيه ....يالله لف منشان نشوف شو شكلك ..والله بنات حاسه شكله بده يطلع مثل توم كروز
وبالحظه هى لف راسه وماهى الى ثوانى الا وصوت ضحكت غالليه ماليه الدنيا وهى بتقول اما توم كروز.. امشو بنات امشو فكرنا حيطلع شى ولفت ومشت وهى بتضحك ... بهاللحظه كان الشاب لافف عليهم بعد ماسمع ضحكت غاليه اطلع بالبنات بعدم مبالاة ومشى لعند الرجال
مع وصول اخر ضيف انحط البوفيه طبعا واحد للنسوان وواحد للرجال بس كانوا قريبين من بعض لدرجة ان صوت غاليه وضحكاتها موصلين للرجال هى وباقى البنات وكانت امها كل شوى تبعث لها غمزه او نظره منشان توطى صوتها بس ماتمضى 10 دقائق والا صوتها يرجع يعلى ....
بعد ما خلصو اكل وهم ع بشربوا الشاى دق جوال غاليه كان المتصل ابوها ردت عليه وقال لها تجى عند غرفة الرجال جوا بما ان كل الرجال جالسين برى ومافى حدا فيها
ركض راحت غاليه لعنده واول ما دخلت الغرفه تفاجئة بوجود رجال غريب فيها فطلعت بسرعه بس صوت ابوها من جوا خلاها توقف عند الباب.... غاليه حبيبتى ....
جاوبته من ورى الباب نعم بابا
ادخلى يابابا .... ردت عليه غاليه وهى متردده بس يا بابا ...
قاطعها ابوها وهو بطمنها ....ادخلى يا بابا معليش
دخلت غاليه وهى بتمشى على مهلها متوجه لعند ابوها لحتى تقعد جنبه ولكن قبل ماتقعد قال لها ابوها مو هون روحى اقعدى هناك وشاور لها على كنبه كانت بعيده شوى عنه..
منغير ماتحرك راسها لفت بعيونها فى الغرفه منشان تعرف مين الى جالس معهم ونشف دمها لما اجت عينها على الشخص الثالث الى معهم بالغرفه .... يالله هدا ابو السياره الكشخه شو بيعمل هون؟ يوه يوه يوه ليكون سمعنى بضحك عليه وجاى يشكينى لبابا؟؟؟ اما حركات ولاد صغار صحيح...
راحت غاليه وجلست محل ما طلب ابوها وخلت نظرها موجه عليه منشان عينها ماتجى على الشخص الى معهم ....سالته بصوت واطى ومتوتر ... طلبتنى بابا بتريد منى شى؟
رد عليها ابوها بهدوء ... اى حبيبتى بقدم لك يعقوب ال... ولف على يعقوب وقال له بنفس اللهجه الى حكى فيها مع بنته بقدم لك بنتى غاليه ال.... ورجع لف على غاليه وقال لها بما ان انتوا التنين هون طلب منى يعقوب ان يكون اليوم اول جلسة تعارف بينكم وانا شفت الفكره مناسبه ومن شان هيك طلبتك وهلا بترك لكم المجال منشان تتعرفوا على بعض
غاليه كان وجها كل ماله يزداد بياض مع بياضها من اول ما نطق ابوها اسم الشخص الى قدامها وهى حاسه حالها كان حدا كب عليها سطل مى بااارد و الدم نزل لرجولها .... يالله مستحيل شو البلوه هى ... ياربى معقول هدا هو عريس الغفله لا والاحلى من هيك ضحكت عليه بين البنات .. لااااا الشغله اكبر من انه يشكينى لبابا؟ ياويلييي
قطع حبل افكارها صوت ابوها وهو بقول لها ليش ما ع بتردى يا غاليه؟
انتبهت غاليه على حالها وصحت من السرحان والتفكير الى هى فيه لفت لعند يعقوب وقالت بصوت يادوب ينسمع ... عفوا ما سمعت شو قلتلى...
اجاها صوته متل الصاعقه على راسها حتى حست جسمها كله وقف منه ... يالله شو هالصوت .. الله يستر بس
قال لها يعقوب بصوت خشن و عميق ... كنت بقول لك السلام عليكم بما انك ما سلمتى علينا وانت داخله
هون رجع شوي الدم لوجه غاليه من الخجل وصارت تلوم نفسها كيف ماسلمت وهى داخله ردت عليه بصوت واطى وعليكم السلام ورحمة الله وبركاته .. اعذرنى بس تلبكت لما عرفت ان بابا مو لحاله بالصالون منشان هيك نسيت اسلم وعلى العموم كسبت انت الاجر هلا بالبدأ بالسلام
ابتسم يعقوب وقال بنفسه لا مبها شى جريئه وقويه بالرد .... كيف حالك؟ ان شاء الله مبسوطه هون بسوريا؟
ردت عليه بنفس النبره والصوت الواطى ... الحمد لله بخير ... طبعا مبسوطه فى حدا مابنبسط بين اهله؟
رجع ابتسم يعقوب وقال بقلبه ... هههه شاطره
سالها ماشاء الله بتحكى عربى ممتاز مع انك ولدتى بامريكا
ردت عليه غاليه وهى بترفع عينها فيه شوى بس مابتركز على عيونه . . الحمد لله هدا من فضل الله اولا ثم باهتمام اهلى
كبرت ابتسامت يعقوب وهو بقول بنفسه هههه لا الحوار هيك حيكون جدا ممتع
استمر هو يسألها عن حياتها بامريكا و هواياتها و طموحاتها وهى تجاوبه بكل وضوح وصراحه وبعد شى ربع ساعه سألها ونبرت صوته بتتغير شوى... طيب انت ماعندك اسئله لى ولا كل المعلومات عندك؟
هون احمر وجه غاليه من الخجل واطلعت فيه وهى بتبتسم ابتسامه صغيره وقالت له كيف حالك؟
مافى ثوانى الا ابوها بضحك بصوت عالى من سؤال غاليه وهى كبرت ابتسامتها لاحتى بينوا اسنانها لما شافت يعقوب بحاول يمسك ضحكته منشان مايحرجها وجاوبها وهو بطلع عليها بنظرات غريبه مافهمتها غاليه ... الحمد لله بخير وبفضل من رب العالمين
تدخل ابو هبه وقال لهم وهو بضحك اذا هيك مارح نخلص شو رايكم نأجل أسئلة غاليه لمره تانيه لان اظن هيك بكفى وطولنا على الناس ...
يادوب خلص ابوها حكى الا كانت غاليه واقفه وبتقول السلام عليكم وبتمشى بسرعه هروب من اى شى بده يطول القعده هى زياده وركض على الحمام منشان تغسل وجها لان حاسه الدم رح يطلع من خدودها وحرارتها مرتفعه من كتر الاحراج ... طلعت على حالها بالمرايه ووجها بنقط مى وصارت تحكى مع حالها ... يالله ليش كل هالتوتر والخجل ما انا كل يوم بالمدرسه بحكى مع رجال وولاد من طلاب ومدرسين ولا عمرى هيك ارتبكت او انحرجت
صارت تغسل وجهها بالمى البارده على امل يروح الحمار شوى وباللحظه هى طلت عليها هبه وهى بتقول لها بكل حماس وبصوت واطى ... غاليه احكيلى شو صار؟ بدى اعرف كلشى بالتفاصيل...
طلعت فيها غاليه مستغربه وسالتها ليش انت بتعرفى ؟ وبعد ثوانى ثارت غاليه وصارت تحكى مع هبه وهى بتكز على اسنانها وتشوبر بايديها... بتعرفى وماقلتيلى والله انحطيت بموقف محرج كتير مع بابا ومع الرجال يالله ما اغلزك بس بتعرفى شو والله لو تطقى مارح اقول لك شو صار ... ياغداره
وتركتها ومشيت لبره لعند البنات بدها تروق وتنسى الى صار معها ... الكل حس عليها انها غير غاليه الى تركتهم من شوى بس ما حدا سألها شى لان شافوها مو مروقه ...وبعد ساعه رجعت غاليه لضحكها وروقانها ولعبها مع البنات وتمو على الحاله هى لحتى اخر الليل ورجعوا على بيت جدهم
خلال الاسبوعين الى مضوا جلست غاليه مع يعقوب عدت مرات بوجود والدها طبعا اعجبت بشخصيته كتير وعرفت عنه معلومات كتير عن دراسته و تخصصه و شو بده يعمل بالمستقبل وعائلته و هواياته ... لاحظت غاليه انه شخصيه عن جد مميزه وناجحه وواثقه وهو من عائله معروفه ومقتدره ماديا بس فيه عيب واحد ..... شكله ... شو تعمل بالمشكله هى.. شكله اقل من المتوسط وبشرته سمره كانت لما تقف تطلع بشكلها بالمرايه تفكر معقوله يكون زوجى هيك شكله؟ يالله مو متقبله شكله يعنى صوته هاه شوى تأقلمت عليه بس شكله مو قادره ابلعه ... صحيح هو فيه مميزات كتير بس اهلى مافكروا انا كيف حتقبله كزوج ؟ قالت بخوف وعيونها بتبحلق بصورتها بالمرايه... معقوله اجيب ولاد بشبهوه؟ لالالا يا ربى مو قادره واصلا انا لسى صغيره والطريق ادامى طويل و ان شاء الله الله ببعت لى واحد مميزاته حلوه وشكله حلو وهى عطيت الموضوع فرصه متل مابابا طلب يعنى ماعاد حدا له كلمه على اذا قلت لا مو موافقه.... بترجع بتقول لحالها.... بس فى شي مخلينى مرتاحه من جهته مابعرف ليش بحس بالراحه لما بقعد معه ... يالله شو هالحيره .... 100 مره استخرت ولهلا مو عارفه شو اقرر... على العموم بكره اخر مره بشوفه فيها لان بعدين بابا بده يسمع قرارى وان شاء الله لوقتها بكون وصلت لحل... يوه شو هالكلام انا مقرره .. الرفض طبعا
الجزء الرابع
على العصر اجى يعقوب لبيت جدها لغاليه منشان يشوفها وهالمره جدها الى قعد معهم لان ابوها كان مشغول كتير بالتجهيزات للسفر لان على نهاية الاسبوع هم راجعين على امريكا
غاليه استغلت فرصة ان جدها غفى وهو جالس معهم و بعد ما القت نظره على جدها وتأكدت انه نايم لفت ليعقوب وقالت له بجديه ممكن اسألك سؤال؟
حس يعقوب بنبرتها الجاده فرد عليها بكل هدوء وثقه.... طبعا تفضلى
رجعت سألته ..بس بترد على بصراحه
ابتسم لها يعقوب وقال ...... بوعدك بكل صراحه
نزلت غاليه نظرها لايديها الى بحضنها ... يالله هلا ترددت بطرح السؤال .... اخدت نفس عميق وسألته وهى بتطلع بايديها وبصوت واطى يادوب ينسمع... ليش انا؟
رد عليها يعقوب وهو بعقد حواجبه وبقدم جسمه شوى لأدام منشان يسمعها اوضح .. عفوا مافهمت؟
اخدت غاليه نفس تانى ورفعت راسه وحطت عينها بعينوه بدها تعرف اذا بقول الصدق او لا.....
ليش خطبتنى انا مع ان هبه اكبر منى وانسب لك من ناحية العمر او لجين هى احلى منى واصغر بس بسنه يعنى الى بياخد وحده اصغر منه ب 14 سنه مافرقت معه اذا كانت اصغر ب 15 سنه ..... فليش انا؟
ركز يعقوب نظره على عيونها الحلوين الوساع وشاف فيهم تضارب مشاعرها وحس انها متلخبطه مو عرفانه توافق ولا ترفض حكى مع حاله وهو لسى بتطلع بعيونها وعيونه بترسل لها الف رساله ورساله .... يالله يا غاليه لو تعرفى ليش انت؟
ابتسم لها يعقوب وقال بكل هدوء وكان صوته غريب المره هى فيه نبره حلوه ... لان هبه ما عندها عيونك و لجين ما عندها ضحكتك منشان هيك انت...
احمر وجها لغاليه من الخجل نزلت عيونها بسرعه وقالت لحالها ... ياويلى هدا بتغزل فينى والله لو سمعك بابا لكان دبحك هههه
ان شاء الله اكون جاوبت على سؤالك؟ ردت عليه بهزت راس من غير ما ترفع عيونها عن حضنها
فجئه وقف يعقوب وهى وقفت معه تلقائى وفى عيونها سؤال لوين ؟
رد عليها يعقوب وهو ببتسم ... لازم اروح هلا واترككم ترتبوا لسفركم سلمي لى على الوالد وقولى له انى بنتظر منه تلفون خلال اليومين هدول مع السلامه
هزت راسها وقالت له مع السلامه وخلال ثوانى كانت الغرفه فاضيه مافيها حدا غيرها وجدها النايم ... قربت غاليه من جدها و صارت تصحيه بهدوء وصوت واطى .. جدو جدو خلص راح يعقوب مابدك ترتاح بغرفتك احسن لك من هون ..
تانى يوم بعد الفطور قالت ام هبه لغاليه ... ماما حبيبتى ساويلى فنجان قهوه ولحقينى على البرنده بستناكى
هبه ولجين اتطلعو بغاليه وهم بضحكوا.. اطلعت فيهم غاليه وقالت لهم بعصبيه وهى بترفع ايديها للسما ..عقبال ما يجيكم نفس اليوم واردها الكم.. قولوا امين ..... وراحت تعمل القهوه لامها
فى البرنده جابت غاليه القهوه وحطتها قدام امها وهى بتقول بسرعه منشان تهرب.... تفضلى ماما ... عن اذنك
مسكتها امها من ايدها وبلطف شدتها منشان تجلس جنبها وقالت لها وهى بتبتسم ..وين وين .. بدى احكى معك مشتاقه لك كتير من زمان ماقعدنا مع بعض
ردت غاليه وهي متوتره ...والله وانا مشتاقه لك كتير ماما بس لسى ماخلصت ترتيب اغراضى وانت بتعرفى ستى بتزعل اذا تركنا لها الغرفه مكركبه
معليش حبيبتى فى عندك وقت هلا اقعدى معى بدى احكى معك
اخدت غاليه حسبها الله وراحت جلست محل ماشاورت امها وهى متوقعه الموضوع الى بدها تحكى معها فيه
سالتها امها ...شو حبيبتى وصلتى لقرار؟... ابوكى بده يخبر الجماعه....
ظهرت علامات الحيره على وجه غاليه وبنبرت صوتها وهى بتقول..... مابعرف لسى ماقررت
طيب وليش لهلا متأخره هى صار شفتوا بعض شى 5 مرات لسى باقى عندك استفسارات يعنى ؟
لالا ماما مو هيك بس بصراحه *****ه مو عرفانه شو اختار
قربتها امها لحضنها وقالت لها وهى بتضمها ....وشو محيرك قوليلى يمكن اساعدك
لفت غاليه امها وخبت وجهها بصدرها وهى بتقول.... مستحيه اقول لك
مسحت الام على راس بنتها وقالت لها مشجعه ..... قولى حبيبتى ولا تستحى منى يالله شو المحيرك
رفعت غاليه راسها من حضن امها واطلعت فيها بنظره خجوله .... مو قادره اتقبل شكله
سالتها امها .....وشو كمان ؟
ردت عليها بسرعه... ولا شى بس شكله مو عاجبنى والا شخصيته حلوه وماشاء الله ناجح و عنده مخططات للمستقبل كبيره واكيد لو ماكان انسان منيح كان بابا ماخلى الموضوع يصل لى و بصراحه يا ماما بحس بالراحه لما بقعد معه قلبي بطمن
ابتسمت الام لبنتها وقالت لها وهى بتمسك وجها بين ايديها ... اهم شى راحت القلب حبيبتى مدام بتطمنى له وبترتاحى معه معناها هى علامه ممتازه وعلامة تيسير
طيب وقضية الشكل .... ردت عليها امها.... شبه شكله حبيبتى... شكله رجال ولا بدك واحد متل شباب الايام هدول ما تعرفى تفرقي اذا هو مره ولا رجال؟ وبعدين ياماما شو بنفعك وسامته اذا كانت اخلاقه مو منيحه او تعامله معك مو منيح؟ والله وقتها بتقرفى وسامته من سوء اخلاقه
بخجل قالت لها غاليه..... انا مو قصدى هيك ماما بس لما بقف جنبه بحس فى فرق كبير بالشكل هو اسمر كتير وانا بيضا يعنى حتى شكله اقل من المتوسط ... احمرو خدودها وهى بتضيف .. بعدين مو لازم افكر بولادى؟
ابتسمت لها امها ... هدول بايد رب العالمين مو بايدك ولا بايده وبعدين ياحبيبتى الاخلاق المنيحه والروح النضيفه بتجمل الشكل.. ابتسمت امها وهى بضيف ....وبعدين يا عيون ماما انت بدك واحد احلى منك ؟
هون ضحكت غاليه وقالت لها لا مو احلى منى بس .... انت فهمت قصدى صح؟
اى حبيبتى فهمت بس مع هيك برجع بقول لك سدقينى يا ماما اذا الرجال اخلاقه منيحه وبكرم مرته فهدا من اجمل الرجال واذا كان العكس فهو من اقبح الرجال ... الرجال بتقيم بافعاله مو بلون بشرته او حلاوة ابتسامته ... انت استخيرى لاخر مره واليوم بالليل ابوكى بده يخبر الجماعه.. طيب
وقفت وهى بتقول ...حاضر .... انا بستأذن هلا ماما بتريدى منى شى؟
لا حبيبتى وفكرى منيح بالى قلناه ............
ان شاء الله .... طلعت غاليه وراسه بلف من كتير التفكير... لك غاليه شو لعب ولاد هدا.. ليش ماقلت لامك انك مابدك اياه؟ ..يووووه على الدوشه ليش انا قدرت وهى بتعطينى محاضره خلص بس اكيد لما بسألنى بابا اليوم رح اقول له..... يارب ساعدنى
قبل المغرب بشوى دخل عليها ابوها وهى بتلملم بغراضها وبتجهز شنتة السفر .... شلون الحلوين
لفت غاليه لعند ابوها وحضنته وهى بتقول بدلع ....مشتاقين وزعلانين
رد عليها ابوها وهو بمسح على شعرها ..... وليش الزعل خير ان شاء الله
يعنى بدك يكون سفرنا بعد بكره وما ازعل اى والله حاسه حالى رح اموت من زعلى
ضحك ابوها وهو بقول.... لا سلامتك حبيبتى وانت بتعرفى ان مابنقدر نطول اكتر منشان جامعة اختك ودراستها والحمد لله اطمنا عن الجميع وشفنا الكل وان شاء الله كلها كم شهر وبنرجع لهون
تنهدت غاليه وهى بتقول ان شاء الله
قعد وابو هبه على السرير وقعدت غاليه جنبه ..و بنبره جاده.. قالت لى امك انها حكت معك اليوم بموضوع يعقوب
احمر وجه غاليه وهى بتسمع كلام ابوها وقالت لحالها بس ماتكون ماما قالت له شو حكينا يافضيحتك يا غاليه .. ردت على ابوها بتوتر.... وانت شو رايك بكلامى ؟
امك ماقالت لى تفاصيل الحوار بس قالت لى ان كان عندك شويت اسئله وهى وضحت لك بعض الامور وانا هون لاسمع قرارك النهائى لان الرجال بده يعرفه قبل سفرنا
تلبكت غاليه وبين الشى هدا على وجها ماعرفت شو تقول هى لساتها حايره عاجبها ومو عاجبها ... يالله ليش مستعجلين هيك عطونى وقت زياده ... لك اى وقت مو انت مقرره ترفضيه شو بتستنى قولى لابوك وخلصينا.... ياربى شو الورطه هى اصلا انا لسى صغيره منشان هيك مو قادره اقرر..... اوووووف غاليه انت عنجد صغيره وكل وقت براى.....
حاوط ابوها وجها بايديه وصار يطلع بعيونها الحيرانه وحس باللخبطه الى بداخلها قال لها بحب ..حبيبتى عطى الموضوع فرصه
مأنا هيك عملت عطيته فرصه متل ما طلبت منى اول مره
رد عليها ابوها ....لا يابابا قصدى عطيه فرصه منشان تعرفى اذا كان مناسب الك ولا لأ يعنى انت بالاول عطيتيه فرصه منشان تتعرفى عليه وانت تعرفتى عليه وشفتى ان الرجال مابنعاب
قالت غاليه لحالها اى صح الا شكله
كمل ابوها ...وهلا بدى تعطيه فرصه منشان تعرفى اذا مناسب الك ولا لأ واذا كان هدا الشى الى بدك اياه ولا لأ
طلعت غاليه بابوها *****ه وقالت ...يعنى شو اعمل؟
رد عليها ..يعنى اذا خطبتوا وبعدين عجبك او ماعجبك بصير الشى الى بدك اياه مافى شى مكتوب ع الحجر يا بابا ولا فى شى بالغصب منشان هيك عطيه فرصه...........
قالت له *****ه يعنى رأيك اوافق ؟
قال لها ابوها وهو ببتسم لها ابتسامه ابويه.. هذا قرارك يابابا و الامر راجع لك وانت استخرتى و هلا انا بس بعطيك مشورتى وانا ماقلت الكلام هدا الا لانى حاسك مرتاحه له
ردت عليه صح
قال لها ابوها وهو بتفحص عيونها .....يعنى انت قلبك مرتاح له ؟
قالت بخجل..... اى برتاح لما بقعد معه وقلبى بطمن
قال لها ابوها مستغرب ....لكان شو بدك اكبر من هيك دليل !!
فكرت غاليه لثوانى وبعدين قالت وهي بتطلع بابوها بجديه ... خلص بابا انا موافقه
لفها ابوها وباس راسها وهو بقول.... حبيبتى بنتى الواعيه
تركها ابوها وطلع وبعد ما سكر الباب وقفت غاليه وحست حالها بدها تركض لابوها وتقول له لالالا مالى موافقه حست بتوتر بجسمها وقلبها .. وعقلها صار يقول لها وقعتى بالفخ يا غاليه ..... استحت تقول لابوها منشان مايقول عنها انها لسى صغير حطت ايدها على قلبها وقالت ربى سلمت امرى اليك وتبرأت من حولى وقوتى وعلمى والتجأت الى حولك وقوتك وعلمك يا رب العالمين.. بعد الدعاء هدا ارتاحت شوى وسلمت امرها لله ... ليش قلقانه مدام بابا قال ان اذا بعد الخطوبه اذا قلت ما بدى مو مشكله خلص شوفى شو بصير و الله بيسر لى الخير
انزاع الخبر بين الاهل ان غاليه وافقت على يعقوب وماوقفت الاتصالات لتهنى غاليه بالعريس ... فرحت غاليه بالاهتمام هدا ومديح الكبار ليعقوب وحست بالفخر كل ما حدا قال لها ونعم الاختيار الله بتمم على خير
على الساعه 9 دخلت عليها امها وهى بتقول... غاليه يالله بسرعه قومى معى
ردت عليها غاليه وهى بتقوم من سريرها... شو ماما بتريدى شى؟
اى ياماما بسرعه .....غيرى غراضك بدنا نلحق السوق قبل مايسكر باقى ساعتين
رجعت غاليه لسريرها وهى بتضحك...... لا ماما مابدى اروح خدى هبه او لجين مالى نفس اطلع لمكان نعسانه
وبنبره سريعه قالت امها .......يالله غاليه بسرعه بقول لك لازم تروحى معى منشان تقيسى الفستان لان بكره تلبيس خاتمك
نطت غاليه من سريرها وهى بتقول........ بكره شو؟
هلا انت البسى بسرعه وانا بقول لك بالطريق
طبعا السيد يعقوب ما سدق سمع ان غاليه وافقت الا وطلب من ابوها انهم يلبسو الخواتم منشان الكل يعرف انها مخطوبه له ويسكر الباب على كل الخطاب وابوها وافق
تانى يوم على المغرب كان كل اهل يعقوب موجودين امه وخواته وخالاته وعماته كل نسوان العائله الكريمه مع اهل امها واهل ابوها منشان حفلة تلبيس الخاتم .... غاليه كانت لابسه بدله ناعمه كتير لونها فوشى ومطرزه بالفضى على صدرها و دوارها ..البدله كتير ناعمه وحلوه وموديلها بالتطريز الى فيها وكان ظهرها كله مفتوح بس مربوط مع بعض بحبال من التطريز الفضى كان كتير متناسب مع لون بشرتها.. و ميكايج جدا راقى ومرتب وتسريحه حلوه على النازل لان شعراتها قصار مو طوال كتير طلعت غاليه ايه من الجمال و النعومه ..والمكياج خلاها تبين اكبر من عمرها المهم ان كل خالات وعمات العريس ماتوا عليها و ماوقفوا زغريد لها .. وهى كل ماله وجها يحمر والفرحه تغمرها اكتر
اتفاجئت غاليه لما شافت خوات يعقوب وقالت بقلبها يا الله خواته حلوات ليش هو ما بشبهم !! بس الحمد لله فى امل لولادى يطلعوا حلوين ... ضحكت على حالها وصارت تقول يا الله ليش انت هيك مستعجله ههههه
بعد الرقص والزغريد والتعارف صار وقت ان ام يعقوب تلبس غاليه خاتم الخطوبه ... تفاجئت غاليه و كل الموجودين بجمال الخاتم و كبر احجاره ولما قامت امه منشان تلبسها الخاتم قالت لها.. حبيبتى بقولك يعقوب اذا ما عجبك زوقه انزلى على السوق ونقى الى بدك اياه
اطلعت غاليه على الخاتم كان قمه بالجمال و كتير احجار الالماس فيه كبيره غير انه كان على مقاسها بالضبط ردت على ام يعقوب وهى بتبتسم لها ابتسامه حلوه كتير ... لا خاله حلو كتير وعاجبنى تسلمى
بعد هيك انحط البوفيه و الكل تعشى وقبل ما تنتهى الحفله اجت لجين تركض حامله جوال غاليه .. اخدت غاليه الجوال من اختها وشافت مين المتصل طلع الرقم غريب بس مع هيك قامت من مكانها منشان تبعد عن الضجه وتسمع ... فتحت الخط ......... الو
الف مبروك يا عروس ..... وقع قلب غاليه مع الجمله هى.. وبدى قلبها ينبض بسرعه
الله يبارك فيك شكرا .. ااا كيف عرفت رقمى ؟
ضحكه صغيره سبقت كلامه وهو بقول.. اخدته من والدك واستأذنته ان اتصل وابارك لك ... ان شاء الله عجبك الخاتم؟
عيونها بلا شعور نزلت على الخاتم وقالت له ووجها محمر من الخجل .. يسلمو ايديك حلو كتير بس معزب حالك والله
سكت شوى يعقوب وبعدين جاوبها بنبره هادئه وكان فى صوته هزه بسيطه رجف معها جسم غاليه .. الغاليه ما بلبق لها الا الغالى
ردت عليه بخجل واضح بصوتها ..تسلم كلك زوق
رجع صوت يعقوب طبيعى وهو بيقول انا استأذنت من والدك ان اطلع على المطار بكره منشان اودعكم بس ماعرفت اى ساعه طالعين
ان شاء الله على الساعه 6 المسا لازم نكون بالمطار لان رحلتنا على 8 خالوا ابراهيم حيوصلنا
طيب خلص انا برتب مع ابراهيم ...سكت يعقوب شوى قبل مايقول بصوت واطى ونبره حلوه الف مبروك مره تانيه يا احلى عروس وبشوفكم ان شاء الله بكره... مع السلامه
مع السلامه سكرت غاليه التلفون وهى بعالم تانى كان وجها مثل الفراوله من الخجل و قلبها بدق بسرعه قعدت تتذكر نبرت صوته وكلامه كان كتير زوق واكابر معها .... يالله شبنى!! الى بشوفنى هيك بقول على بحبه ههههه ما اصغر عقلك يا غاليه هههه .... طالعها من افكارها صوت هبه وهى بتدخل عليها بسرعه وبتقول .. غاليه تعى بسرعه بيت حماكى ماشين.............
بسرعه لحقتها غاليه وبين القبلات والسلامات انتهت الحفله
يوم السفر كان لبكه كتير لان من الصبح تلفونات وناس جاى تودع ...وبين ترتيب الشنط واستقبال الموديعن الكل كان بركض
قبل صلاة العصر فضى البيت من المودعين والكل دخل على الغرف منشان يجهزو حالهم للطلعه على المطار..وعلى الساعه خمسه بالضبط كانت الشنت عند الباب و ابو صالح وام صالح وافقين بودعو ابوهبه واهله ..خلال اللحظات هى دق جرس الباب نطت غاليه و لجين وقالوا انا بفتح ..وركضوا مع بعض لعند الباب وهم بتسابقوا مين حتصل اول بس ضحكت غاليه جمدت على شفايفها لما شافت مين على الباب
السلام عليكم شو متفاجئه لهالدرجه ؟ كان هدا يعقوب بطلع على غاليه وهوبحاول يمسك ضحكته على شكلها كانت متفاجئه لدرجه ان تمها شوى ارتخى
لجين انسحبت بهدوء وهى بتضحك على شكل اختها وراحت قالت لابوها ان يعقوب عند الباب
اجى ابو هبه وهو مبتسم وبطلع على الساعه وقال وهو بصافح يعقوب ... لا ماشاء الله مواعيدك مضبوطه تفضل يا ابنى تفضل
دخل يعقوب وسلم على الكل من الباب وقال وهو بشيل الشنت ... لازم تنحرك هلا بسرعه منشان نلحق نكون بالمطار بالوقت المناسب انا رح ابدا بتنزيل الشنط لحتى تخلصوا سلام.... وشال شنتتين ونزل ....باللحظه هى وصل ابراهيم وبعد ما سلم بدى بتنزيل الشنت لسيارته وسيارت يعقوب خلال ربع ساعه كان الكل بالسيارات ..ابو هبه و غاليه ولجين كانو مع يعقوب و ام هبه و هبه كانوا مع ابراهيم ... غاليه كانت جالسه بالمقعد خلف يعقوب و بتحاول قدر الامكان ان عينها ما تجى على المرايه الى قدامه منشان ما تشوفه فتنحرج ويحمر وجها اكتر كانت بتستمع بصمت للحوار الهادئ بين ابوها ويعقوب عن العمل والدراسه وابحاث جديده وكان من فتره لفتره ابوها ببدى اعجابه بمعلومات يعقوب وتحليلاته المنطقيه للامور ... وصلوا على المطار وطول الطريق غاليه ساكته وماحركت راسها لا ييمين ولا يسار منشان ما تنحرج بشى نظره كل الوقت كانت لافه لجهت الشباك بس لما وصلو لفت منشان تاخد شنتت ايدها وباللحظه هى لا شعوريا رفعت عينها واجت عينها بعين يعقوب بالمرايه احمر وجها كتير وهى بتعطيه ابتسامه وبتنزل بسرعه من السياره وبتوقف جنب امها .... نزلو الشباب الشنت واخد يعقوب التذاكر من ابو هبه وراح لكونتر الحجز دخل الشنت وسحب البوردنج وعطاه لابوهبه ....
لحظة السلامات الاخيره كان الكل بودع الخال ابراهيم ولما اجى دور غاليه كانت بتلف خالها وبتبوسه من خده وهو بوصيها على دراستها وامها وان تبطل مشاغبه وهى بتضحك من كلامه ... يعقوب كان واقف جنب ابراهيم لما اجت غاليه تودعه وبطلع عليها بنظرات مليانه مشاعر .. لما خلصت غاليه من خالها لفت لعند بعقوب ووفقت قدامه وصارت تلعب بخاتم الخطوبه الى بايدها من خجلها وقالت بصوت واطى مع السلامه يعقوب
رفعت عينها له وهى بتبتسم بخجل رد لها يعقوب الابتسامه وقال لها وهو بطلع بعيونها وبقول لها بنبره مليانه مشاعر... مع السلامه غاليه استودعتك عند رب العالمين .. توصلو بالسلامه
ابتسمت غاليه بخجل ردت.... الله يسلمك وشكرا مره تانيه على الخاتم عنجد عجبنى
رد بابتسامه واسعه ... بتستاهلى يا غاليه ولا تنسى..... انت الغاليه
ضحكت له بعيونها ولوحت له بايدها مع السلامه ومشت ورى اهلها ليدخلو للبوابه .. بعد ماقطعوا التفتيش والبوابه لفت غاليه لورى شافت خالها مو موجود بس يعقوب موجود وبطلع عليهم وعليها بالذات فقبل ما يغيب عن عيونها لوحت له مره اخيره مع السلامه ودخلت من البوابه لوحلها يعقوب ومشى ... باللحظه هى نخزت هبه غاليه من خصرها وقالت لها وهى بتضحك يا عينيى يا عينى كل ده حب يابنت ... وصارت تضحك
دفتها غاليه بلطف وقالت وهى منرفزه يا سقيله اسكتى
دخلو الطيياره والكل اخد مكانه و كانت الرحله طويله ومليئه بالافكار و الذكريات بالنسبه للجميع وخصوصا غاليه