ليلي في شغلها دلوقتي بس كان واضح انها تعبانه ومش قادره تمشي علي رجلها
ادهم مش عارف يدخلها ولا هيعمل مشاكل ومش عارف مين الشخص اللي وصلها بس مفترض انه خالد اخوها
واقف عينه علي الشباك اللي هيا ديما بتشاور منه بس مفيش حد
اخيرا طلع شغله علشان اجتماع مهم وقاعد معاهم بس عقله مع ليلي
تليفونه رن فلقي رقم غريب مرضيش يرد وبعدها فكر ممكن تكون هيا راح ماسك التليفون ورد واخيرا سمع صوتها
ليلي : انا مستنياك ينفع تنزل ولا مشغول؟
ادهم : ولو مشغول هنزل برضه ثواني
قام وقف: انا اسف يا جماعه بس في حاجه طارئه ولازم امشي حالا
سابهم ومشي قبل ما حد يتكلم
ابوه هيتجنن من تصرفاته اللي مش مفهومه دي نهائي
نزل جري لحبيبته ولقاها مستنياه وقاعده علي الرصيف اللي هو كان قاعد عليه اول مره شافها فيها
ادهم : واخيرا شوفتك!!!!
ليلي بتحاول تقف علشان تسلم عليه فجري هو عليها وقعد جنبها
ادهم : ما تقفيش انا جنبك اهوه
ليلي : واخيرا شوفتك
ادهم : عامله ايه؟ ولما انتي تعبانه كده نزلتي ليه اصلا من البيت؟
ليلي : علشان اشوفك مقدرتش اكتر من كده
ادهم : ايوه انا كنت هموت اصلا والمحك حتي مش اشوفك بس مش علي حساب صحتك
ليلي : سيبك من صحتي المهم قولي اخبارك ايه واخبار شغلك ايه؟
ادهم : شغلي؟ انا كويس وشغلي كويس الحمدلله رجلك عامله ايه؟ وجعاكي
ليلي : شويتين ما تقلقش
ادهم : ما اقلقش؟ انا عيشت يومين يا ليلي ما اتمناهمش لعدوي
ليلي قربت منه وابتسمت بطريقه طيرت عقله
ليلي : احكيلي حسيت بايه؟
ادهم : مش عارف ليه حاسس انك مستمتعه بقلقي ده وبعذابي في بعدك
ليلي : ههههههه فوق ما تتخيل
ادهم : تعرفي انا ممكن حالا اقوم ارمي نفسي تحت اقرب عربيه واخليكي تحسي بنفس احساسي
ليلي : بعد الشر عليك مش لسه بتقول ما تتمناهوش لعدوك؟؟؟
ادهم : ماشي عدوي لكن انتي حبيبتي وفرحانه فيا اعمل ايه بقي؟
ليلي : تقولي قد ايه بتحبي
ادهم : امممم عايزه تعرفي قد ايه بحبك؟؟ عقابا ليكي مش هقول وبعدين مش واخده بالك ان انا اتكلمت وصرحت بمشاعري وانتي لسه؟؟؟
ليلي : انا لسه؟؟؟ امال لما قلتلك اني مستنيه اسمعها منك ده كان ايه؟
ادهم : ماشي تسمعيها بس لازم تقوليها انتي علشان يبقي ليها معني وطرفين المعادله يتوازنو ولا ايه؟؟
ليلي : ما اهو مش هقدر اقولها دلوقتي
ادهم : ليه بقي ان شاءالله؟
ليلي : ما ينفعش اقولها علشان انت طلبتها لازم تطلع لوحدها ساعتها هيكون ليها معني تاني وطعم تاني زيك كده كنت حاسسها بس جه وقتها وطلعت واعتقد انها طلعت لوحدها من غير ما تخطط تقولها
ادهم : انا خططت اقولها بمليون طريقه لكن ما تخيلتش ابدا اني هقولها وانا بزعق فيكي وفعلا هيا طلعت لوحدها
مسك ايدها وهيا بلطف سحبت ايدها منه وغيرت الموضوع
هو تقبل تغيرها ودردشوا مع بعض شويه
ليلي : انا لازم اقوم اخويا زمانه جاي قالي ساعتين وجاي يروحني
ادهم : صح هو اللي شالك ساعت الحادثه وهو اللي جابك النهارده؟؟؟
ليلي : ايوه هو اتطمن
ادهم : ايه اتطمن دي انا بس بسال عادي
ليلي : الغيره باينه في عنيك
ادهم : لا متهيالك
وقفها وسندها واول ما وقفت لمحو ماجده جايه
ادهم : ايه ده؟ ودي عرفت ازاي؟
ليلي : مراقبه الجو وقولتلها اول ما اقف تيجي
ادهم : اممم طيب مش تقوليلي ان المكان متراقب
ليلي : مش كده بس علشان تساعدني
ادهم : طيب ما انا موجود
ليلي : وبعدين وزمايلي لما يشوفوك ويسالوني مين ده؟؟؟
ادهم : قوليلهم حبيبي
ليلي : اممم بجد والله؟؟
ادهم : فين المشكله انا فعلا بحبك
ليلي : انت فاكرنا في امريكا هنا اوعي تتجنن وتيجي في مره تقولها قدام حد فاهم؟
ادهم : براحتك
مشيت وسابته وهو كمل شغله واخر النهار مروح بيكلمها في الفون ومبسوط وبعد ما خلص
حسين: صحتها ايه دلوقتي وعامله ايه؟
ادهم : الحمدلله بقت احسن
حسين: طيب الحمدلله بس مكنتش اعرف انك حبتها قوي كده!! اعترفتلها بحبك ده؟؟
ادهم : وانت مالك؟؟؟؟ علي العموم اه اعترفتلها بس صح هيا ليه رافضه ان حد يعرف علاقتنا وانها حبيبتي ايه المشكله يعني؟؟؟ ايه يعني لما الكل يعرف انها girl friend بتاعتي
حسين: احنا مجتمع شرقي مفيش حاجه اسمها علاقه او جيرلفريند دي
ادهم : امال هنا بيعترفوا بايه؟
حسين: بالخطوبه وبس دي اللي معترف بيها احنا هنا مش في امريكا اللي انت اتربيت واتعلمت فيها هنا البنات مختلفه وخصوصا بنت زي ليلي دي
احمد: مالها ليلي ؟؟؟
حسين: بنت بسيطه ومن الناس اللي عندهم قيم واخلاق غير وسطكم
ادهم : ايه وسطنا دي انت هتعمل زيها؟؟!
حسين: يا حبيبي ماتزعلش مش قصدي بس انت أهو بتقول جيرل فريند ده مش صح هنا ولا ينفع واللي بتصرح بحاجه زي دي بتبقي مش محترمه فهمت بقي؟؟
ادهم : فهمت بس مش مقتنع
حسين: هتقولها امتي علي حقيقتك؟؟؟
ادهم : لما اقرب منها اكتر وافهمها اكتر
حسين: بس خلي بالك الكدب الكتير مش حلو واخرته مش حلوه
ادهم: ربنا يسترها بقي
ليلي اختفت فتره لحد ما تتحسن وكل اللي بينهم تليفونات بس
ادهم اشتري موبيل هديه ليها علشان يعرف يكلمها براحته
اخيرا هترجع تاني ويشوفها تاني كان متحمس جدا انه يشوفها ويكلمها وهيا قصاد عينه
وهو رايح الصبح شغله
حسين: متحمس النهارده خير؟؟
ادهم : انت مش ملاحظ انك بتتدخل كتير في اللي مالكش فيه!؟!
حسين: بطمن بس عليك وبعدين شايف معاك هديه اكيد لليلي ؟
ادهم : ماشي يا عم واه لليلي بس مش هديه بالمعني ده،،، ده مجرد موبيل بدل موبيلها اللي اتكسر
حسين: طيب ممكن اسالك بكام الموبيل ده؟
ادهم : انت بجد حشري قوي
حسين: لا مش حكايه حشريه
ادهم : امال ايه بقي؟ my god
حسين: حكايه ان التليفون ده احدث حاجه في السوق صح؟
ادهم : طيب وفيها ايه؟
حسين: لا فيها كتير
اولا المفروض ان حضرتك سواق فمينفعش تروح تجيب موبيل هديه لحبيبتك بفوق 5000 جنيه
ثانيا حتي لو هتقولها حوشت وفداها الفلوس هيا مش هتقبله
ادهم بتفكير: وليه بقي ما تقبلوش؟؟
حسين: لانها مش هتعرف تبرر وجوده معاها في بيتها تقولهم جابته منين؟ سرقته ولا لقته ولا ايه لان دي راتبها ما يوصلش ل 500 جنيه هاه؟؟
ادهم : هو انت بتعقد كل حاجه ليه؟؟
حسين: مش انا انت قلتلها انك علي قد حالك يبقي تمشي معاها علي قد حالك
ادهم حدف علبه التليفون قدام جنب حسين
ادهم : حلال عليك الهديه لبنتك
حسين: لا العفو يا باشمهندس خليه ولما تخطبها اديهولها هديه
ادهم : لا خلاص قفلت منه خده يا هرميه من الشباك اختار
ادهم راح واتقابل هو وليلي والمفروض انهم هيخرجوا مع بعض لاول مره
خرجت بدري من شغلها واتقابلت معاه كان واقف علي عربيته واول ما شافها ابتسم وقرب منها وسلم عليها
ادهم : اخيرا هنغير منظر باسكت الزباله ده ونخرج
ليلي : ادهم مش عايزه اتاخر
ادهم : يالا بس
ويدوب هتمشي لقت نفسها هيا في اتجاه وهو في اتجاه
ادهم : انتي رايحه فين؟
ليلي : انت اللي رايح فين يالا
ادهم : طيب اركبي يالا
ليلي : اركب ايه؟ العربيه دي؟ لأ طبعا
ادهم : ليه بقي ان شاءالله؟
ليلي :اولا مش بركب عربيات حد
ثانيا مش هركب عربيه مع حد
ادهم باستغراب: افهم بس ايه الفرق بين اولا وثانيا دي الاتنين واحد
ليلي : لا طبعا العربيه دي مش بتاعتك بتاعت الشغل ولو جرالها حاجه وانت بتتدلع بيها هتلبس ثانيا بقي انا مش بركب عربيات مع حد
ادهم : اولا ملكيش دعوه بالعربيه واللي هيجري ثانيا يعني ايه ما بتركبيش مع حد انا مش حد المفروض اني حبيبك ولا ايه؟
ليلي : حبيبي اه بس برضه مش هنركب عربيه مع بعض
ادهم : انتي محسساني اني بقولك تعالى شقه مفروشه ولا تعالي نامي معايا دي مجرد وسيلة مواصلات
ليلي : ارجوك يا ادهم انت بتضيع الوقت يالا بقي ولا هنقضيها خناق
ادهم مخنوق ومتضايق من تفكيرها بس مضطر يجاريها
احمد: ok let's go
ليلي : افندم؟
ادهم : sorry يالا بينا بس هناخد تاكسي مش مترو deal؟
ليلي : ديل وايد ورجل واي حاجه يالا بينا
مشيوا ويدوب هيمسك ايدها سحبتها براحه
وقف وبصلها باستغراب
ليلي : الناس هنا عرفيني ما ينفعش ارجوك
سكت ادهم ووقف تاكسي ومشيوا
اتفاجئت ليلي بانهم واقفين قدام مطعم شكله فخم جدا
ليلي وقفت وما اتحركتش وادهم بيتكلم بس ملقهاش جنبه بص لقاها وراه رجعلها تاني
ادهم : في ايه مالك وقفتي ليه؟
ليلي : ايه المكان ده؟
ادهم : مطعم ماله؟ هيعجبك يالا
ليلي : انت عارف مكان زي ده منين؟
ادهم فكر للحظه: صاحب الشغل بيجي هنا كتير وانا ببقي معاه علشان كده عارفه
ليلي : طيب اديك قولت صاحب الشغل مش احنا يالا يا ادهم من هنا
ويدوب مشيت خطوتين
ادهم : انتي مالك النهارده؟ حد مصلطك عليا؟
الاول مش هركب عربيه وبعدها لا متمسكش ايدي ودلوقتي لا ما ادخلش المطعم في ايه بالظبط؟
ليلي : في انك غريب بتحاول تعيش عيشه مش عيشتك انا عندي استعداد اخدها مشي معاك لاي مطعم في وسط البلد علي قدنا او غالي سنه بس اهو نغير جو وناكل حتي ولو فول وطعميه المهم ابقي معاك لكن انت عايز تركب عربيه مش بتاعتك وتمشي زي صاحب الشغل ولابس بدله معرفش ليه مع انك المفروض انك خارج معايا مش يونيفورم بتاع الشغل وجايبني مطعم هندفع فيه 3000 او 2000 جنيه علشان ناكل اكله منعرفش اسمها انت اللي ايه ده؟؟؟ بتعمل كده ليه؟؟؟ انا مش عايزه كل ده
انا ممكن اقعد معاك ساعه علي الكورنيش ناكل دره وابقي اسعد انسانه في الدنيا
ادهم واقف مش عارف يرد ويقولها ايه؟
يقولها ان ده لبسه الطبيعي؟ ولا دي عربيته؟ ولا ده طبعه ولا مطعمه ولا ايه ولا ايه ولا ايه؟ كدب كدبه ولا زم يكملها للاخر
ادهم : طيب يا ليلي اوك شوفي عايزه تروحي فين و انا معاكي
مشيت وهو وراها وقفت علي المحطه
ادهم : ممكن اسال انتي واقفه هنا ليه؟
ليلي : هنركب
ادهم : نركب ايه بالظبط؟
ادهم بيسالها وهو عارف الاجابه
ادهم : اوعي تتخيلي للحظه اني ممكن اركب اتوبيس انا وانتي اوعي
راح شدها ووقف تاكسي وركبوا
ساكتين هما الاتنين والسواق بيسالهم رايحين فين وهما الاتنين ساكتين
ادهم : ما تردي علي الراجل وقولي رايحين فين
ليلي : حاضر
ردت علي السواق ووصلهم ونزلو
ليلي : يالا تعال
ادهم : ايه ده؟
ليلي : ايه هو اللي ايه ده؟ انت محسسني انك خواجه كشري ايه متعرفش الكشري مجيتش هنا انت واصحابك قبل كده؟ ده اشهر محل كشري في وسط البلد
ادهم : يعني اول خروجه لينا تبقي محل كشري؟
ليلي : انا بحب الكشري يالا
شدته من ايده ودخل وراها ودي كانت اول تجربه لادهم بالكشري المره دي هيخرج ازاي بقي منها وهيتحجج بايه!!!!
ادهم : ايه الريحه دي؟
ليلي : ريحه الكشري في ايه يا ادهم مالك؟
ريحه الدقه والصلصه ركز بقي
قعدوا يدردشوا وجه الجرسون وطبعا ادهم ما فهمش اي مصطلح من مصطلحات الجرسون وفتح بقه وبص لليلي
معرفش يعني ايه نص ولا كماله ولا عادي ولا اي حاجه تانيه
ادهم : هو مش انتي توليتي الخروجه من اولها كملي يالا ساكته ليه؟
ادهم عالج الموقف
ليلي : ماشي بس انت عايز حراق ولا ملكش في الحراق؟
ادهم : هاكل اللي انتي هتاكليه
ليلي : اوك اتفقنا
ومكنش عارف انه هيندم علي اختياره ده
جه الكشري قدامهم وادهم بيبصله ايه ده؟
مكرونه ولا رز وايه البني ده؟
ليلي : بتبص كده ليه؟ كل وهو سخن
بصلها لقاها بتقلبه قلب زيها بتحط دقه حط زيها حطت شطه مسك القزازه راحت ماسكاها منه
ليلي : هو فيه شطه جرب الاول قبل ما تزود انا بحب الشطه زياده
جرب فعلا ويدوب حط معلقه في بوقه حس بنار طالعه من ودانه ووشه احمر
ليلي : هههه شكلك مالكش في الشطه
ادهم مش عارف يتكلم اصلا لانه لو فتح بقه هيصوت زي العيال
اكل كام معلقه والنار بتزيد وهيا بتاكل عادي جدا ومستمتعه جدا
ادهم : في حمام هنا صح؟
ليلي : اه هناك اهوه
ادهم : طيب بعد اذنك
قام بسرعه وهيا ضحكت لانه اكل شطه علشان خاطرها واستحملها
ادهم جري وغسل بوقه بميه بس مفيش حاجه بتبرد النار دي وفضل واقف مش عارف يعمل ايه؟ يمشي ويسيبها ولا ايه؟ ايه اللي هو بيورط نفسه فيه ده وليه كل ده؟
الاجابة كانت واضحه وبسيطة
بيحبها وبس
هنا سكت وخرجلها وقعدوا يتكلموا مشيوا هما الاتنين جنب بعض وكل ما بيحاول يمسك ايدها بترفض بالذوق
واخيرا وصلها لحد المترو واختها كانت مستنياها
ليلي : هتركب معايا وتوصلني
ادهم عايز يقول اه بس كان تعبان جدا ولازم يروح لانه حاسس ان الكشري هيطلع علي عنيه
ادهم : لا معلش ورايا شغلانه لازم اخلصها تتعوض اشوفك بكره اوك
ليلي : اوك اول ما اعرف اكلمك هكلمك سلام
مشيت مع اصحابها واختها وهو جري علي عربيته وروح بسرعه
اول ما وصل ابوه بينادي عليه وامه بس ما ردش علي حد وجري علي اوضته
على: لا ابنك زودها قوي
طلع وراه وامه كمان بتهدي في جوزها
دخلو الاوضه عنده مفيش حد بس سمعوه صوته في الحمام بيرجع
امه ريهام: ظلمت الولد تعبان اهو
دخلت عنده لقته قاعد في الارض
ريهام: ايه يا حبيبي مالك قوم
ادهم : لا متقلقيش لخبطت بس في الاكل شويه...
ريهام: اكلت ايه وفين،؟
ادهم : متشغليش بالك انتي
قام ادهم وخرج ولقي ابوه هو كمان واقف
ادهم : مالكم في ايه؟ اول مره تشوفو حد بيرجع غريبه _____ آه
ريهام: اجيبلك دكتور
ادهم : لا يا ماما بس شويه وهفوق عندي حرقان في صدري ومعدتي مش متظبطه
ريهام: طيب انا هجبلك حاجه للحرقان بس قولي اكلت ايه الاول؟
ادهم : كشري
علي وريهام: ايه كشري؟؟؟ كشري ايه ده؟
علي: وليه تاكل كشري عرفتو منين ده اصلا؟
ريهام: ولما انت عايز تاكل حاجه زي كده قولي وانا اخلي الشغالين يعملولك هنا حاجه نظيفه
ادهم : ايه انتو الاتنين؟؟؟ عيل صغير انا؟؟ كلته وخلاص خلص الموضوع مش تحقيق هو
على: لا مخلصش اهو ما انت عمال ترجع ووشك اصفر وحالتك متنيله
ادهم : طيب خلاص ممكن تسيبوني ارتاح بقي
عند ليلي هيا واصحابها اللي هما جيرانها
هبه ولقبها عجيبه لانها سمرا شويه
شرين ولقبها عبدو وساكنه وفوقهم
وفاء وسمر واختها ماجده طبعا
وفاء: احكيلنا عملتو ايه ورحتو فين!؟
سمر: بالتفصيل الممل
ليلي : اولا كان عايزنا نخرج بعربيه الشغل وانا رفضت وبعدها خدنا تاكسي روحنا مطعم كده من النوع الهاي قوي بس رفضت وروحنا ابو عماد بتاع الكشري
سمر: جتك نيله بقي يقولك العربيه تقولي لأ ويوديكي مطعم فخم تروحي للكشري اضربها دي ولا اعمل ايه؟
هبه: سيبهالي هو انت هبله ولا هبله بقي حد يرفض مطعم فايف ستار ويروح للكشري واحشك يا اختي الكشري!!!!
وفاء: ايه يا بنات الماده مش كل حاجه هيا مش عايزه تكلفه ايه اللي فيها يعني؟
شرين: الطم ولا اجيب لطامه يارب مش طالبه غير واحد كده طويل عريض حليوه وياخدني مطعم نجمه واحده حتي يارب
ليلي : هههه يارب يا اختي يرزقك من اوسع ابوابه
شرين: طيب والنبي بيلي ريقنا باي حته رومانسيه كده اي كلمه اي لمسه اي حاجه ده احنا غلابه
ليلي : رومانسيه ايه يا عبدو بقولك اتخانقنا علي العربيه والمطعم وبعدها روحنا للكشري وهو شكله مالوش فيه ولا في الشطه وحطيتله شطه كلها وايه قام يجري يا عيني علي الحمام يطفي النار وبعدها قعدنا شويه ووصلني للشغل واعتذر وجري
هبه: ياعيني عليك يا ولدي من ليلي العسكري واللي هتعمله فيك
ليلي : والله بحبه بس مش عارفه بحب اغلس عليه
ماجده: مالك سرحتي في ايه كده؟
ليلي : مش عارفه بحس احساس غريب وانا معاه؟؟ مش عارفه ميعرفش المترو!! مبيحبش الزحمه!!! ساعات بيتكلم انجليزي كتير ولكنته حلوه مش مصطنعه كانه مولود بره!!! بيصرف مش بيهمه!!! النهارده حسيت انه ميعرفش يعني ايه كشري اصلا واول مره يدوقه!!! انسان غريب
وفاء: ولا غريب ولا حاجه هو بس من جاور القوم،،، كل اللي حواليه ناس نظيفه وهو من كتر ما عاشرهم بقي زيهم وانتي مع الوقت هتبقي زيه
شرين :: ههههههههه وتقول ياي ايه ده؟ ايه اللي بتكوله ده ياي؟ سوفاج
قلبوها هزار وضحك واهي لمه بنات
اخر الليل ليلي كلمت ادهم والبنات جنبها بعد اصرارهم انها تتطمن عليه
ليلي : ازيك عامل ايه بعد علقه الكشري؟؟؟
ادهم : الحمدلله كويس
صوته كان واطي وتعبان
ليلي : صوتك ما بيقولش كده انت تعبان ولا ايه؟
ادهم : يعني شويه معدتي مكركبه حبتين مش اكتر just don't worry
ليلي : ايه اخر جمله دي؟
ادهم : سوري ما تقلقيش انتي وما تشغليش بالك وانا الصبح هبقي كويس واشوفك ان شاءالله
ليلي : ولو مش هشغل بالي بيك هشغله بمين
البنات: تيراراتيرراا
ادهم : مين جنبك؟
ليلي : ما تاخدش في بالك دي شله المجانين
ادهم : الساعه كام دلوقتي علشان سهرانين كده مع بعض
ليلي : الوقت متاخر بس احنا ساكنين جنب بعض كلنا اللي فوق واللي في الوش واللي تحت كده يعني ومن صغرنا بنسهر مع بعض
عدت الليله علي ادهم وهو تعبان الليله كلها وقرر انه ما ياكلش حاجه ما يعرفهاش تاني
يومين وادهم اقنع ليلي انهم يفطروا مع بعض وانها تيجي الشغل بدري شويه وفعلا اتقابلو وخناقه كل مره المكان والعربيه والمره دي ليلي اخدته فلفه ودي كانت تجربته مع الفول والطعمية الاكل عجبه جدا واستمتع بالوجبه جدا بس بعد ما رجع شغله معدته اشتغلت وفضل تعبان النهار كله
اخر النهار مروح لانه مش قادر يفضل اكتر من كده اتصل بليلي واعتذرلها وروح
حسين: وبعدين معاك هتفضل كده لامتي؟ انت مش متعود علي الاكلات دي وهيا بتحاول توفرلك علشان ماتصرفش كتير قولها الحقيقة
ادهم : مش وقته وبعدين الحياه تجارب
حسين: بس انت بتتعب جامد ومعدتك مش مستحمله يا خوفي المره الجايه لتاخدك مصمت
ادهم : تاخدني ايه مصم ايه؟ دي بتاع ايه ده كمان؟؟؟
حسين: كرشه وفشه ولحمه راس وكوراع
ادهم : ايه الكرشه والفشه دي ده عباره عن ايه؟ حسين: مصارين البقر ورجليه
قاطعه ادهم : بس خلاص يا عم حسين اسكت واوقف علي جنب بسرعه
وقف وهو فتح الباب وفضل يرجع وعم حسين بيضحك عليه
ادهم : اااااه انت بتضحك عندك حق ماهو انت مش حاسس بيا
حسين: اسف يا ابني بس تخيلتك كده اول ما تدخل هتقولها ايه؟ ولا هتسيبها وتجري هههه
ادهم : اضحك اضحك براحتك انت، اول مره اعرف ان الحب بهدله كده
ليلي خرجت مع اصحابها ونزلو الجيزه فانتهزت الفرصه واتصلت بادهم
ليلي : احمد مشغول؟
ادهم : ليه؟
ليلي : جاوب الاول مشغول ولا فاضي
ادهم : اتردد هو مشغول بس لو في فرصه يشوفها بعيد عن الشغل مش هيضيعها
ادهم : مش فاضي ولا مشغول وده يعتمد علي الوضع
ليلي : يعني لو الوضع اني اشوفك هتقول ايه؟
ادهم : هقول حددي المكان وخمس دقايق وابقي عندك
ليلي : ينفع تيجي الجيزه؟
ادهم : اه ينفع بس فين في الجيزه؟
ليلي : تعال بس واوصفلك في الطريق بس مبدئيا كده عند الميدان
ادهم : مش عارف حاجه في الجيزه فسال حسين ووصفله المكان
ادهم اتصل بليلي
ادهم : انا في الميدان انتي فين؟
ليلي فضلت تقوله اماكن كتيره وهو مش عارفها
ليلي : طيب عند عمر افندي
ادهم : ويطلع ايه عمر افندي ده وهو فين؟؟
ليلي : ااااه هتجنني طيب السنترال واوعي تقولي سنترال ايه ده الميدان عباره عن السنترال
ادهم : لحظه كده اه اه شوفته انا قدامه اصلا
ليلي : ثواني وهبقي عندك خليك معايا وقولي انت واقف فين بالظبط؟
اخيرا وصلوا لبعض وطبعا معاها اصحابها وعرفتو عليهم
شرين: هو انت معندكش اخوات صبيان يا اخويا
ادهم : لأ ليه؟
شرين: خساره يالا المهم فرصه سعيده اكابتين
ادهم : انا اسعد اتشرفت بيكم يا بنات جميعا
يالا يا ليلي يدوب انتي بتقولي ساعتين
ليلي : انت جاي بالعربيه تاني؟
ادهم : يعني نفترض ان حد اتصل بيا اقوله استني والنبي ارجع اجيب العربيه خليكي منطقيه بقي شويه
ليلي : ماهو
ادهم : ماهو ايه؟ قولي حاجه يا ماجده
ماجده: العربيه هتسهل الطريق وبعدين لو حصل حاجه يعرف يجيبك بسرعه روحي
ادهم : تصدقي انا هبدا احبك
ماجده: ماشي بس عد الجمايل
احمد: يا باشا انت فوق راسي
اخدها واتحركو كانت مبهوره بالعربيه وفخامتها فضل سايق شويه وبيفكر يروح فين ليلي : ده شارع البحر العظم هتلاقي فيه اماكن كتيره يتقعد فيها او اركن جنب الكورنيش كده وخلاص
ادهم : نفسي اعرف مش عايزانا نقعد في مكان محترم ليه؟
ليلي : نظرتنا للاحترام مختلفه انا اي مكان بسيط هيعجبني انت بتحكم بفخامته
اهوه استني
ادهم : استني ايه؟
ليلي : نادي النقابة بتاع المهندسين تعال ندخل بالكارنيه بتاعك
ادهم : كرنيه ايه؟
ليلي : كرنيه النقابه مش انت مهندس ولا ايه؟
ادهم : اه ماشي نركن بس ____ يالا تعالي
نزلو وماشين وكالعاده كل ما بيحاول يمسك ايدها بتسحبها وتبتسم
ادهم : ماشي براحتك
دخلو وقعدوا وجالهم الجرسون بيسالهم تشربوا ايه؟
ادهم : فيه موكا
الجرسون: افندم؟
وبيبص ليلي
ليلي : ما تبصليش انا معرفش ايه الموكا دي
ادهم : اوك خلاص كابتشينو ولا ده كمان مش موجود؟
الجرسون: موجود يا افندم والانسه؟
ليلي : زيه ولا اقولك في عصاير فرش
الجرسون: ايوه يا فندم
ليلي : لو سمحت عصير مانجه
مشي وهما بيبصوا لبعض والاتنين مستغربين بعض
ليلي : تطلع ايه الموكا دي؟؟؟
ادهم : نوع من انواع النسكافيه بس احلي شويه منه واقوي
ليلي : امممم ماشي
هما الاتنين ساكتين لحد ما جه الجرسون بطلباتهم
ليلي : انا بعشق المانجه بكل اشكالها
ادهم بابتسامه: وايه كمان؟؟
ليلي : وايه كمان ايه؟
ادهم : بتحبي ايه كمان؟ عايز اعرف كل حاجه عنك كل حاجه بتحبيها
ليلي : بحب الشوكولاته وخصوصا بنت الابالسه مارس غاليه بس حلوه
ادهم : مفيش اي شيئ في الدنيا دي يغلي عليكي فاهمه؟
ليلي ابتسمت واتكسفت وشغلت نفسها بالعصير
ادهم بيبصلها وسؤال جواه بيلح يخرج بس مش عارف يقوله ازاي؟ هيقوله من غير تزويق احمد: ليلي !!
ليلي : هاه
ادهم : تتجوزيني؟؟؟؟ "
"الحلقه الرابعه
ادهم بيبصلها وسؤال جواه بيلح يخرج بس مش عارف يقوله ازاي؟ هيقوله من غير تزويق ادهم : ليلي !!
ليلي : هاه
ادهم : تتجوزيني؟؟؟؟
ليلي مش مستوعبه سؤاله او مش متاكده من اللي سمعته
ادهم : علي فكره انا مستني اجابه لسؤالي
ليلي : وعلي فكره المواضيع دي مفيهاش هزار فلو سمحت يا ادهم متهزرش
ادهم: هزار؟؟؟؟ هزار ايه؟ علي فكره انا جد جداانا عايز اتجوزك
ليلي : انت بتقول ايه؟ طيب ليه؟
ادهم : وهيا دي فيها ليه؟ علي العموم اقولك ليه
علشان عايز اخر الليل ارجع الاقيكي في بيتي
وعايز انام في حضنك انتي
وعايز افتح عيني الاقيكي انتي
وعايز لما ازعل اعيط في حضنك انتي
ولما افرح افرح معاكي انتي
من الاخر عايز اشاركك في كل حاجه
تقبلي تشاركيني يا ليلي في كل حاجه؟؟؟
ليلي مش مصدقه اللي بتسمعه ومش لاقيه صوت ترد بيه
ادهم : اوكي خلاص لو كلامي ضايقك اعتبري نفسك ما سمعتيش حاجه يالا بينا
ويدوب هيقوم يقف مسكت ايده
ليلي : استني بس انت ايه علي طول متسربع كده؟؟؟ انا المفاجأة لجمتني معرفتش ارد
ادهم : والمفاجأة دي حلوه ولا صدمه؟
ليلي : صدمه طبعا( ادهم كشر فلحقته) بس مفاجأة حلوه ومش عارفه انت ازاي لسه بتسال ومستني اجابه!!!
ادهم : لان المواضيع دي لازم تكون الاجابه صريحه وواضحه مفيهاش افتراضات
ليلي : موافقه يا ادهم اشاركك حياتك كلها
اجابه صريحه ولا؟؟
ادهم : ليه؟؟
ليلي : ليه ايه؟
ادهم : ليه موافقه؟؟
ليلي : امم انت عايز تسمع ايه؟ تسمعني اقولك علشان بحبك وبموت فيك!؟
ادهم : مثلا
ليلي : ادهم انا بحبك من زمان قوي من قبل حتي ما نتكلم مع بعض،، كنت بشوفك من بعيد وبتمني اكلمك ولو كلمه
ادهم : وايه اللي منعك؟؟؟ وليه ضيعتي الوقت ده كله؟؟
ليلي : كنت هقولك ايه هاه؟ هاي انا ليلي بشوفك من الشباك كل يوم وبحبك؟؟؟ كنت هتقولي ايه ساعتها؟؟؟
ادهم : اممم احتمال كبير اجري منك
ليلي : هاه شوفت
التليفون رن وكانت ماجده بتستعجل ليلي علشان اخوهم بيتصل ومستعجلهم يروحو
ليلي طبعا قامت تجري وادهم وصلها بسرعه
روحو بيتهم واول ما دخلوا لقوا خالد في انتظارهم
خالد: اتاخرتو كده ليه؟ هو في بنات تتاخر بره لحد الساعه 11 كده؟
ماجده: كنا بنشتري حاجات وبعدين الدنيا صيف والناس ماليه الشوارع
خالد: برضه متتاخروش كده المهم اشتريتو ايه؟
بيسال وبيبص لليلي ومستني الاجابة منها وطبعا هيا معندهاش اي فكره هما اشتروا ايه
الوضع اتأزم للحظه بس الباب خبط
ليلي فتحت لقت البنات اصحابها
شرين وهبه وسمر ووفاء
شرين: ايه يا جنجا عامل ايه؟
خالد دلعه جنجا والكل بيندهله بالاسم ده
خالد: احسن منك بقولك يا بت يا عبدو انتي ما تيجي اتجوزك واهوه كله بثوابه!!
شرين: اخرس انا اتجوزك انت فشر
خالد: بكره تعنسي.... تيجي انتي يا بت يا سمر
سمر: لا يا اخويا شكرا
هبه: متشوفلك سكه كده يا جنجا ويالا يا بنات نقيس الحاجات اللي جبناها
فعلا خالد سابهم وخرج وفضلو البنات لوحدهم
معلومه صغيره
ليلي اخواتها بالترتيب
ناديه متجوزه ومعاها ولدين وبنتين
خالد واعزب
نجوي متجوزه ومعاها ولدين وبنت
ماجده ومخطوبه يدوب
محمد ولقبه شكوكو
واخيرا ليلي اخر العنقود
ابوهم بيشتغل طباخ وامهم ميته وحاليا خالد بيعتبر نفسه المسؤل
نكمل بقي
البنات مع بعض
ماجده: ايه روحتو فين ولا عملتو ايه؟
ليلي :ادهم اتقدملي
البنات: ايه؟ بجد.؟ وساكته ده كله يا واطيه
ليلي : ما انا بقولكم اهوه
وفاء :وقولتيلو ايه وقالك ازاي؟
هبه: احكي بالتفصيل الممل
حكتلهم كل كلمه
ماجده: طيب هيجي يتقدملك هنا امتي؟
ليلي : مقالش او احنا ما اتكلمناش في النقطه دي
ماجده: وليه ان شاءالله؟
ليلي : يعني اول ما يقولي اقوم اقوله تعال البيت؟
ماجده: ايوه طبعا ده الصح
وفاء: كلها بكره ولا بعده وهيقولها اكيد ما تستعجليش
سهروا البنات
وفاء: هو محمد بيجي امتي من شغله؟
ليلي : بيجي علي 12 كده لو جه علي البيت علي طول اشمعني؟؟!
وفاء: لا عادي اصله يعني بيتعب جامد
شرين: اه ياعيني
وفاء: بت بطلي
سمر: هيا السناره غمزت ولا ايه؟
وفاء: لا انتو بتخرفو انا هسيبكم واطلع انام سلام
ويدوب فتحت الباب لقت محمد في وشها
محمد: مساء الخير فوفا ايه ماشيه بدري ليه؟
وفاء: لا ده انا كنت هشوف ام امل قفلت ولا لسه فاتحه؟
البنات بيضحكوا عليها
محمد: قوليلي عايزه ايه وانا اجيبلك وخليكي انتي
شرين: هيا بس ولا ايه؟ لا ده انا اصورلكم قتيل
محمد: اخرسي يا بت يا عبدو
هبه: طيب انا يا كوكو ده انا حبيبتك
محمد: تصدقوا انا غلطان روحي يا وفاء هاتي اللي انتي عايزاه هيا مش ناقصه
وهيا خارجه مسكها
محمد: قولي بس عايزه ايه؟ انا بهزر اقعدي
سهروا مع بعض وماجده وليلي بصوا لبعض نظره فاهمينها الظاهر ان اخوهم وقع
ادهم مستني النهار يطلع علشان يشوف حبيبته بس للاسف النهار كله كان عنده اجتماعات مع عملاء بره الشركه ومعرفش خالص يشوفها
كام يوم عدي وهو برضه مش عارف يروح يقابلها واضطر انه يسافر بره مصر فكلمها بسرعه بس طبعا معرفش يقولها انه مسافر
ليلي الكل بيلعب في دماغها لاحسن يكون حس انه اتسرع وندم وعلشان كده بيهرب منها
وبعد اسبوع بيكلمها
ليلي : هو انت لسه فاكر؟ ده انا نسيتك اصلا
ادهم : متقدريش تنسيني المهم وحشتيني قوي
ليلي : لا ما وحشتكش ولا انت فاكرني اصلا ؟ يالا روح للي كنت مشغول فيه ومتخافش مش هدبسك في عرضك ولا هفكرك بيه
ولو كنت رجعت في كلامك او اتسرعت عادي يعني مش محتاج تتهرب وتقفل تليفونك الفتره دي كلها ما تخافش مش هفرض نفسي عليك
قالت كلامها وقفلت السكه وقفلت تليفونها خالص ومعرفش يرد عليها حتي
فضلت طول الليل تعيط حتي صاحبتها معرفوش يسكتوها او يشغلوها
ادهم الليل كله هيتجنن متخيلش ابدا انها هتفكر بالشكل ده
الكدب له ثمن برضه لو كان قالها الحقيقه كان قالها انه مسافر شغل
الصبح طلع قام بسرعه ونزل وهو ماشي
علي: صباح النور
ادهم : اسف مخدتش بالي صباح الخير عليكم صباح الخير يا ست الكل
امه: صباح النور يا قلبي اقعد افطر
ادهم : لا معلش عندي مشوار مهم: :
علي: اه بس لسه فاضل ساعه علي الاقل علي وصول الوفد
ادهم : وفد ايه؟ انت بتتكلم علي ايه؟
علي: بتكلم علي الوفد اللي انت رحت مضيت عقد معاهم المفروض انك هتستقبلهم في المطار امال مشوار ايه اللي وراك؟
ادهم كان ناسي تماما الموضوع ده
ادهم : سوري يا بابا بس انا فعلا ورايا مشوار مهم لازم اروحه الاول ولو خلصت هروح للوفد مخلصتش يبقي معلش روح انت
على: مشوار ايه الاهم ده؟
ادهم : معلش بعدين سلام
علي: لا استني هنا ادهم
بس كان خرج ومشي ومردش عليه
حسين: انت بتلعب بالنار علي فكره
ادهم : والنبي يا عم حسين مش ناقصاك هيا كفايه ليلي اللي افتكرت اني بهرب منها دي
حسين: امال انت فاكر ايه؟ لما تطلب ايديها وبعدها تختفي يبقي انت ندمت
ادهم :والنبي اسكت
حسين: كفايه يا ادهم وقولها الحقيقه متكدبش اكتر من كده
ادهم راح وحاول يكلمها بس قافله تليفونها فضل يشاورلها بس طنشته
راح داخلها المحل ماجده اول ما شافته ارتبكت هو بصلها ولسه واحد من العمال هيقرب عليه راح طلع علي فوق علي طول
ليلي اول ما شافته اتفاجئت بيه
ليلي : انت اتجننت؟
ادهم : اه اتجننت اعملك ايه يعني؟ مش انتي كنتي عايزه كده؟
ليلي : امشي ارجوك قبل ما حد يطلع ابن صاحب المحل تحت ورخم
ادهم : رخم علي نفسه
وفعلا طلعلهم فوق وكان اسمه ماجد
ماجد: هاه لقيت طلبك
ادهم : لسه بشوف
ادهم بص حواليه وليلي خرجت كام ترنج رياضي وعملت نفسها بتوريهملو
ادهم : مقاسهم ايه؟
ليلي: مقاس حضرتك اعتقد لارج صح؟
ادهم : مظبوط اوك هاخد دول
مسك تلاته وهيا بتبصله باستغراب لان اسعارهم غاليه
ادهم: اعملي الفاتوره
ليلي عملتله الفاتوره وهو اخدها ونزل بس قبل ما ينزل قالها انه مستنيها والا هيرجع تاني
بعدها بشويه استاذنت وطلعتله
ليلي : انت مجنون ولا فاكر نفسك ايه؟ انت بتعمل ايه بالظبط؟
ادهم واقف لابس نظارته الشمس وساند علي عربيته وحاطط رجل علي رجل ومن غير ما يتعدل كلمها
ادهم : انتي اللي حطيتينا في الموقف ده
ليلي : انا قلت لسيادتك تيجي تشتري ترنجات تمنها الف جنيه بتهرج؟؟؟؟
ادهم : اهدي واتكلمي بطريقه كويسه لاني بكره الصوت العالي فوق ما تتخيلي
ليلي : انت عارف ملوش لازمه الكلام اصلا بعد اذنك
مشيت خطوتين وكانت متوقعة انه هيوقفها بس هو ما اتحركش من مكانه نهائي
ليلي :هو انا مش فارقه معاك خالص كده؟ ؟
هنا دمعه نزلت من عنيها غصب عنها
هنا هو اتحرك وقرب منها ومسح دمعتها
ادهم: اولا انتي مهمه فوق ما تتخيلي بس كان عندي ظروفي وانتي مسمعتيهاش
ثانيا في داهيه الفلوس ما بتفرقش معايا
ثالثا مبعرفش اتكلم مع حد صوته عالي بسيبه يهدي وبعدها اتكلم
لكن ده مش معناه ابدا انه مش فارق معايا فهمتي بقي؟؟
ليلي : انت كنت فين الفتره اللي فاتت دي؟؟
ادهم : اهو ده السؤال اللي كان المفروض تبدئي بيه
علي العموم يا ستي انا كنت مسافر في شغل مع المدير ويدوب راجع امبارح واول حاجه عملتها اني كلمتك وكنت مضغوط جامد علشان كده معرفتش اكلمك
ليلي : بقي تسافر من غير ما تقولي؟؟
ادهم :اهو انا ما رضيتش اقولك لا تقولي اني بتهرب منك وقولت هتقدري انشغالي عنك لكن برضه مقدرتيش وبرضه افترضتي اللي كنت خايف منه اني اتسرعت وندمت وبهرب منك
شوفي انا مفيش شيئ في الدنيا دي كلها يقدر يجبرني اعمل حاجه مش عايزها فاهمه؟
ليلي : فاهمه بس برضه ده ما يديكش عذر تبعد كل ده عني وتسيبني كده
ادهم: حقك عليا اسف يا ستي واوعدك اني قبل ما اتحرك هبلغك الاول اتفقنا بس انت بلاش افتراضات ارجوكي
ليلي: حاضر مش هفترض تاني وهسمعك الاول
ادهم: تمام بقولك حاولي تستاذني بدري وتعالي نخرج نتغدي مع بعض
ليلي: اشمعني؟؟
ادهم: اشمعني ايه بالظبط؟
ليلي: اشمعني نتغدي مع بعض؟
ادهم: اسباب كتيره اولهم ان الناس بتتغدي وبتجوع
وبعدين انا جعان اصلا من دلوقتي
واهمهم انك واحشاني جدا
ليلي: كان المفروض تبدأ بده الاول
ادهم: امم ماشي كده اتعادلنا يا ستي المهم هاه قولتي ايه؟
ليلي: هشوف لو عرفت هكلمك
ادهم: خلاص مستني منك تليفون
مشي وسابها هيا راحت شغلها وهو كمان طلع مكتبه بس مش علشان يشتغل لكن عشان ينام
حسين دخل لقاه هينام
حسين: طيب روح ارتاح انت جاي من سفر
ادهم: لا مش هينفع عايز اكون قريب
حسين: طيب اجلها بكره والنهارده ارتاح
ادهم: هو انا اللي تعبان ولا انت؟؟ انت راجل غريب يالا اتكل علي الله وسيبني انام ولو جد جديد صحيني
حسين: حاضر لما نشوف اخرتها معاك ايه
ادهم: ان شاءالله خير بس انت ادعيلي يا راجل يا طيب
حسين: ربنا يسترها معاك ويعديهالك علي خير
ادهم: امين ان شاءالله
فعلا استاذنت ليلي بدري واتصلت بادهم يقابلها
ليلي: ايه فاضي تنزل ولا ايه؟
ادهم: ايوه طبعا ( صوته نايم تماما)
ليلي: ايه ده انت نايم؟؟ طيب خلاص ارتاح واشوفك بكره ان شاء الله
ادهم: بكره ايه ثواني وهكون تحت
قفل السكه قبل ما تتكلم وقام غسل وشه ونزل جري ليها
ابتسمت اول ما شافته
ليلي: انت نايم فين بقي؟
ادهم: فوق في مكتب فاضي وعلي الكنبه اعمل ايه بقي واحشاني
ليلي: للدرجه دي واحشاك؟
ادهم: واكتر كمان يالا بينا من هنا
ركبت معاه واتحركو
ادهم: تحبي تروحي فين بس ابوس ايدك ولا كشري ولا فول وطعميه ولا كبده
ليلي: هههههههه خلاص النهارده اختار انت بس ما تخادش علي كده ده علشان جاي من السفر بس
ادهم: اممم ماشي
ركبوا العربيه واول ما ركبوا قالها
ادهم: افتحي التابلوه قدامك
ليلي فتحته واتفاجئت باللي موجود
ليلي: دي ليا انا؟؟ بجد؟؟
ادهم: اه طبعا ليكي انتي مش بتحبيها؟؟
ليلي: بعشقها مارس دي بعشقها ويمكن اكتر منك كمان
ادهم: بقي علي اخر الزمن تقارني حبي بالشوكولاته ماشي يا لوليتي
ليلي: لا ده انت المفروض تفرح انت مش متخيل اصلا انا بحبها قد ايه بس مكنتش تجيب علبه كفايه واحده او اتنين
ادهم: علشان اوفر صح؟؟؟
ضحكوا هما الاتنين
اخدها علي مكان هادي جدا وشكله تحفه من بره معرفتش هو ده كافيه ولا نايتكلب ولا مطعم ولا ايه بالظبط
ادهم: ايه مالك واقفه كده ليه؟؟
ليلي: لا بس شكل المكان غالي
ادهم: ابوس ايدك سيبيني بقي مره براحتي
ليلي: ماشي ادخل يالا
جه يمسك ايدها ويدخل بس هيا شدتها براحه هو اخد باله بس معلقش عليها
اول ما دخلت حست ان الدنيا ظلمه وكانت هتقع فمسكها هو
ليلي: شكلهم قافلين الدنيا ظلمه قوي
ادهم: لا يا حبيبتي مش قافلين ولا حاجه هو الجو هنا هادي بس انتي علشان جايه من الشمس حاسه انك مش شايفه هاتي ايدك لحد ما ندخل
مسك ايدها لحد ما قعدوا واول ما قعدوا سحبت ايدها
ليلي: المكان ده مش مريحني
ادهم: ليه بقي ان شاءالله؟
ليلي: حاساه مشبوه كده تحس ان احنا معزولين كده ناقص سرير
ادهم: مكان بيحترم الخصوصيه ايه الغلط في كده؟
ليلي: الخصوصية دي غلط،،، الخصوصيه تبقي في البيت مش مكان عام واهو لا محصل عام ولا خاص مش فاهمه انا ايه ده؟
ادهم: مش فاهم انا ايه اللي مضايقك هنا؟
ليلي: مش عارفه بس احنا لوحدنا قوي
ادهم: طيب وايه المشكله؟
ليلي: معرفش يا ادهم بس مش مرتاحه وبعدين انت بتدافع عن المكان كانه بتاعك؟؟؟
ادهم مرضيش يقولها ان فعلا المكان ده بتاعه وبيحبه جدا واتضايق من رايها ده
استاذنها يدخل الحمام وخرج وراح للعمال جوه اتفق معاهم انهم يعاملوه كزبون عادي ورجعلها
ادهم: ما علينا هتاكلي ايه؟
مسكت المانيو وفضلت تقلب فيه ومش عاجبها حاجه وهو ملاحظها ومراقبها
ادهم: ايه مفيش حاجة عجباكي؟؟
ليلي: لا وانت الصادق مفيش حاجة عارفاها
مش لاقيه حاجه عارفاها
ادهم ابتسم: اختارلك انا؟؟؟
ليلي: ياريت
ادهم: بتحبي المكرونه والفراخ؟؟؟
ليلي: طبعا بس فين دول؟
ادهم: مكتوبين بس مش بنفس الاسم
ليلي: لازم الفزلكه يعني ما علينا
ادهم: فز ايه؟
ليلي: ما علينا منك انت كمان المهم اطلب الاكل لو ناوي تاكلنا
طلبو الاكل وطبعا الاكل كان بالشوكه والسكينه وليلي ملهاش فيهم
ادهم: في ايه تاني؟؟؟ مش عاجبك الاكل؟؟
ليلي: لا بس مليش في الشوكه والسكينه اما انت ما شاء الله تحس انك مولود بتستخدمهم
ادهم: بقالي فتره كبيره في شغلي ده وزي ما قلتي اتاثرت بيهم مش اكتر
ليلي: ساعات بحس انك انت منهم اصلا
ادهم: ممكن تاكلي قبل ما الاكل يبرد وانا هساعدك
قطعلها ادهم الفراخ بحيث تاكل بالشوكه عادي وفعلا اكلوا وهيا بتبصله باستغراب كانها بتدرس فيه
خلصوا اكل وشرب وقعدوا ادهم قرب منها وحاول يمسك ايدها بس هيا بعدت براحه عنه
ادهم: وبعدين لحد امتي؟
ليلي: لحد امتي ايه؟
ادهم: لحد امتي كل ما قرب تبعدي؟؟
ليلي: متهيألك بس انا قريبه منك اهوه
ادهم: امال بتسحبي ايدك ليه من ايدي؟
ليلي: المكان مش مريحني حاسه ان كل اللي بيدخلوه بيبقي علشان ياخدوا راحتهم فحاسه ان سمعه اي بنت تدخلوا مش حلوه ومش حابه حد يبصلي بطريقه مش حلوه من اللي شغالين هنا
ادهم: اولا مفيش حد هنا يقدر يبصلك باي طريقه
ثانيا كلامك مش منطقي اللي عايز يعمل حاجه هيروح شقه مش هيجي كافيه
ثالثا سمعه الكافيه ده محترمه
ليلي: براحه واحده واحده كده مش قصدي اعيب في المكان بس ده معمول لناس غيرنا مش زينا مش اكتر
ادهم: انا مش فاهمك هو الناس انواع يعني؟
ليلي: طبعا في ناس عندهم عادي نظام الارتباط وتقول للكل ده صاحبي وتخرج معاه قدام الكل وكله عارف انهم مرتبطين حتي اهلها احنا بقي نوعيه معندناش الكلام ده ولا معترف باي حاجه غير خطوبه او جواز وبس
ادهم: طيب علاقتنا دي انتي بتسميها ايه؟
ليلي فكرت شويه: انا بسميها حب لكن مش معترف بيها
ادهم: يعني ايه مش معترف بيها؟
ليلي: يعني لو مثلا حبيت تعرفني علي باباك او مامتك هتقولهم ايه؟ صحبتي؟؟؟ ولا بلاش لو قابلنا خالد صدفه وانا وانت مع بعض اقوله ايه؟؟؟ ده صحبي يا خالد؟؟؟
ادهم: ولو قولتيله ان انا وانتي بنحب بعض؟؟؟
ليلي: اممم كل اللي هيعمله انه هيحبسني في البيت وهيقعدني من شغلي ومعدش هيثق فيا تاني ابدا
ادهم: كل ده ليه يعني؟؟؟
ليلي: لانه مش بيعترف بالعلاقات ده ماجده مخطوبه ورسمي ولما خطيبها يحب يشوفها يبقي في البيت وما يخرجوش لوحدهم ابدا
ادهم: ما علينا كفايه رغي بقي غيري الموضوع
ليلي: ما قولتليش انت سافرت فين؟
مش عايز يكدب كدبه جديده هيقولها ايه؟ انه سافر بره مصر يعمل صفقه جديده ولا ايه؟
ادهم: اتكلمي في اي حاجه بعيده عن الشغل
ليلي: امم نتكلم في ايه؟ طيب قولي وحشتك قد ايه بقي؟؟
ادهم بابتسامه: اخيرا حاجه تفتح النفس شويه وحشتيني قد ايه؟ عارفه لما تغطسي بيوحشك الهوا قد ايه؟ انتي الهوا بتاعي
بتوحشيني زي الهوا بالظبط
مش عارف ليه يا ليلي بس عايزك علي طول قدامي ( ادهم مسك ايدها وهيا حاولت تسحبها) ما تسحبيش ايدك
انتي حاجه غريبه قوي سيبي ايدك في ايدي
ليلي مردتش وسكتت بس قلبها بيدق بسرعه
هيا مش متعوده حد يمسك ايدها ابدا
ادهم: ساكته ليه؟
ليلي: ابدا مفيش
ادهم: مالك كده؟ مش علي بعضك وقلقانه ومتوتره ليه؟
ليلي: ابدا بس خايفه حد يعدي من الناس او اللي شغالين هنا ويشوفنا
ادهم: يشوفنا،؟؟ يشوفوا ايه بالظبط؟؟؟
ليلي: يعني واحنا ماسكين ايدين بعض
ادهم: انتي بتهرجي صح؟؟؟ انتي بتتكلمي بجد؟؟؟
ليلي: لا علي فكره انا بتكلم بجد
ادهم: معنديش اي رد بس علشان تتطمني
قام ادهم وراح قفل الستاره
( هما قاعدين في ركنه وليها ستاره تتقفل لان الكافيه عباره عن ترابيزات عاديه وركنات خاصه تتقفل بستاير)
ليلي:: يا سلام وده ايه ده؟ يعني انا قلقانه من ماسكه ايد تقوم قافل الستاره خالص علشان
قاطعها: علشان ايه هاه؟
ليلي: علشان كل واحد يفكر بمزاجه احنا بنعمل ايه؟؟ لا طبعا لو سمحت افتحها
ادهم: لا مش هفتحها اقعدي
ليلي: لا اسفه مش هينفع كده
وقامت بنفسها وفتحتها وربطتها زي ما كانت
هو واقف وايديه في وسطه ومستغربها
وفتحها للستاره كان النهايه
ادهم نادي للجرسون
ليلي: في ايه عايزه ليه؟
مردش عليها لحد ما الجرسون جه عندهم
ادهم: الحساب لو سمحت
ليلي: وبعدين؟؟؟ في ايه؟؟؟
ادهم: مفيش تعبان ومحتاج ارتاح عندك مانع؟
ليلي: لا براحتك
ليلي زعلت جواها وسكتت لانها مش عارفه هو زعلان ليه
حاسب وخرجوا من غير ولا كلمه طول الطريق صمت وبس لحد ما وصلها لمكان شغلها علشان تروح مع اختها
وقف ومستنيها تنزل وهيا مكانها مش عايزه تنزل وهو زعلان
ليلي: طيب علي الاقل قولي زعلان من ايه؟
ادهم: وانتي مين قالك اني زعلان قولتلك تعبان
ليلي: لا انت زعلان هو انا مش عارفاك؟؟
ادهم: انتي عارفاني؟؟؟؟ ما علينا انزلي علشان اروح انزلي
ليلي: قولي زعلان من ايه؟ كلمني ارجوك
ادهم: اقولك ايه هاه؟؟؟ اولا من ساعه ما دخلنا الكافيه وانتي شغاله ما شاء الله نقد وبس
نقد في المكان في الخصوصية في المعامله في الاكل في كل حاجه
حتي علاقتنا مسلمتش منك
سبق ورحت معاكي علي مطعم كشري انا ما بحبش الاماكن دي ولا بحب الكشري عملت ايه هاه؟؟ عادي شوفت انتي عايزه ايه وعملته
ولا نقدت المكان ولا الاكل ومشيت معاكي لاخر المشوار علي الرغم ان مفيش شيئ عجبني نهائي بس عملت خاطر ليكي
مبحبش الزحمه وعادي ولا الدوشه ولا ريحه الاكل ولا الاكل نفسه وتعبت جدا بعد ما روحت بس ولا للحظه حسستك بده
وانتي من ساعت ما خرجنا نقد نقد نقد
انا مش فاهم انتي عايزه ايه بالظبط؟ وبعدين لما انتي ما بتثقيش فييا بتخرجي معايا ليه؟؟
ليلي: انا بثق فيك والا مكنتش خرجت معاك
ادهم: ههههه ضحكتيني قاعده بيني وبينك متر ولو مسكت ايدك بتشديها واول ما قفلت الستاره اتجننتي هيا فين الثقة دي؟؟
ليلي: انا مش عارفه اقولك ايه؟ بس مش قصدي
مش قصدي انقد اختيارك؛ المكان بس غريب عليا اسفه مش قصدي
اما فتحي للستاره وبعدي عنك فده لاني ما بثقش في نفسي مش فيك انا بحبك وبحبك قوي كمان انت بالنسبالي حلم واهو معايا وقدامي فمش عارفه ايه اللي ممكن يحصل لو كنا لوحدنا مش اكتر
ادهم: خلاص يا ليلي ارجوكي انا فعلا تعبان ومرهق من السفر ويمكن علشان كده مش مستحمل ارجوكي روحي دلوقتي وبكره نبقي نتكلم براحتنا ارتاح بس
ليلي: طيب ماشي بس ارجوك ما تشكش ابدا في حبي ليك
ادهم ابتسملها ومشي بس من جواه هو مخنوق جدا لانه حس قد ايه هما مختلفين عن بعض
روحت وهيا مع اصحابها سهرانين كانت معاهم ومش معاهم ابدا
كلهم بيهزروا وبيضحكوا وهيا في عالم تاني
فضلوا يكلموها واخيرا حكتلهم كل اللي حصل واصحابها انقسموا بين مؤيد ومعارض
ماجده: انتي صح اثبتي علي رايك
سمر: لا طبعا كده هيطفش منها محدش بيحب البنت الخنقه
ماجده: ومحدش بيتجوز البنت السهله اه يحبها ويمشي معاها لكن ما يتجوزهاش
شرين: طالما بيحبها ايه المشكله لازم يكون في ثقه وبعدين ايه يعني لما يمسك ايدها ما الشباب بيعملوا اكتر من كده؟؟؟؟
هبه: لا طبعا النهارده مسكه ايد بكره بوسه وبعده الله اعلم انتي صح يا بت يا ليلي
وفاء: اعتقد ان مسكه الايد عادي
ماجده: لأ مش عادي طالما مجاش هنا البيت يبقي مالوش اي حق يلمس ولو شعره منك
ليلي: طيب ولو سابني؟؟؟ اعمل ايه ساعتها؟
ماجده: تحمدي ربنا انه بان علي حقيقته واتكشف قدامك بدري
الراجل اللي يطلب حاجه مش من حقه مالوش امان
لو بيحبك هيفضل معاكي وهتكبري في عينه وهيحترمك اكتر واكتر وثقته فيكي هتكون من غير حدود
ليلي مقتنعه بكلام اختها بس في نفس الوقت خايفه انها تزعل حبيبها او تخسره
عدي يوم واتنين وادهم مش بيكلمها وهيا مستنيه ان هو اللي يكلمها واخيرا اتنازلت وكلمته
ليلي: ادهم ازيك اخبارك ايه؟
ادهم: الحمدلله كويس
ليلي: امال ايه انت فين؟؟؟ ما كلمتنيش خالص؟؟
ادهم: قولت اسيبك براحتك شويه تعرفي فيها انتي عايزه ايه؟؟
ليلي: انا عارفه اناعايزه ايه
ادهم: وايه هو اللي انتي عايزاه؟؟
ليلي: عايزاك انت ___ انت وبس يا ادهم _ وده شيئ واضح بالنسبالي وضوح الشمس
ادهم: امال ليه انا مش حاسس بده؟؟
ليلي: انت ما بتحسش اعمل ايه انا؟؟؟
ضحكت وقلبتها هزار معاه وهو استجاب لهزارها وضحكها
ليلي: المهم ينفع اشوفك اخر النهار ساعه كده؟
ادهم: ينفع كلميني قبلها بنصايه كده وهجيلك اوك مستنيكي
اخر النهار كلمته وجالها وركبت معاه
ادهم: تحبي تروحي فين؟؟
ليلي: مش اي حته خلينا كده بالعربيه تعال علي الكورنيش او اي حته هاديه
ادهم: اي حته هاديه؟؟؟ اممم اوك ماشي
فضل ماشي بالعربيه واهم بيرغوا ويتكلموا
واخيرا ركن في حته علي النيل والدنيا كانت ليلت وبقي الجو ظلمه وقف وطفي العربيه
ادهم: بقي معجبكيش الكافيه وعجباكي العربيه غريبه انتي!!!
ليلي: انا كده بتعجبني حاجات بسيطه
ادهم: ماشي يا عم البسيط انت
فضلوا يتكلموا شويه
ليلي: هاه مقولتليش بقي انت بتحب ايه فيا؟؟
ادهم بصلها شويه: يعني مش عارف عمال افكر مش لاقي اي اجابه نهائي
ليلي خبطته علي صدره
ليلي: لا بجد بقي قولي بتحب ايه فيا؟
ادهم: طب ما نعكس السؤال وتقوليلي
انتي بتحبي ايه فيا؟
ليلي: بحبك انت كلك علي بعضك
بحب خوفك ولهفتك عليا
بحب نظراتك دي ليا
بحب لما تعمل حاجه مش عجباك لمجرد انك تبسطني
بحب اهتمامك باصغر التفاصيل علشاني
بحب جنونك وعدم اهتمامك باي حد لمجرد انك تكلمني زي ما جتلي المحل او لما جيت لماجده وكل مره تتدبس في حاجات قد كده
بحب نرفزتك وهدوئك وجنونك وعقلك
بحبك لما تتنرفز عليا واحس انك هتضربني بس احس في نفس الوقت انك هتاخدني في حضنك
من الاخر كده بحب كل حاجه فيك
ادهم بهمس: ولما انتي بتحبيني كده بتبعدي عني ليه وكل ما اقرب تبعدي؟!؟!؟
ليلي: انا مش ببعد انا قريبه منك جدا
هيا المره دي حطت ايدها في ايده وهو ضغط عليها حست ان الضغطه دي علي قلبها مش ايدها
ادهم مسك ايديها الاتنين وشدها قربها منه قوي حطت وشها في الارض فرفعهولها
ادهم: بوصيلي ما تهربيش مني
قرب ادهم منها قوي لدرجه انه كان هيلمس شفايفها
الجو كله بقي مشحون حواليهم هو بيقرب وهيا عقلها بيضرب صفارات انذار
هربت من شفايفه بانها حطت راسها علي صدره ودفنت وشها فيه
حست بقلبه هو كمان بيدق بسرعه زيها
ادهم فضل ضاممها للحظات بس هوعايز اكتر من كده فبعدها براحه عنه وحاول تاني انه يبوسها بس هيا رافضه ده فحطت ايدها علي شفايفه
ليلي: ارجوك لأ
ادهم: لأ ليه؟
ليلي: ادهم
ادهم بصوت عالي: نعم!!! انتي عايزه ايه؟؟؟ انتي لسه اهوه بتقولي بتحبيني!!!
ليلي: ايوه بحبك
ادهم: هو فين الحب ده؟؟؟ باماره ايه بتحبيني؟؟؟ وكل ما اقرب تصديني؟؟؟؟؟!
ليلي: مش ده الحب ابدا؟؟؟
ادهم: ايوه مش ده الحب عارف بس اللي بيحب حد بيحاول يريحه يفرحه يعمل اي حاجه تبسطه صح ولا ايه؟؟؟ لكن انتي بتشوفي ايه اللي بيضايقني وتعمليه
ليلي: اسفه بس قرب بالشكل ده لأ ما ينفعش
ادهم: يعني ايه ما ينفعش حبني بس من بعيد لبعيد
ليلي: مش من حقك
ادهم: لا من حقي انا بحبك يبقي من حقي
ليلي: لا طبعا من غير ما ابقي مراتك وشايله اسمك يبقي مش من حقك
ادهم: هو ابتزاز ولا ايه؟ هو الحب ملوش اي حقوق عندك؟؟؟
ليلي: حقوقه اني ابادله الحب باكتر واني اصونه واحفظه واراعيه لكن اكتر من كده لأ
ادهم: يا سلام ده اي منطق ده؟؟؟ طيب انا عايز اتمتع بيكي عايز اخرج معاكي وامسك ايدك واخدك في حضني وابوسك كمان عايزك كلك علي بعضك كده
ليلي: وانا كمان عايزه كل ده؟؟؟ بس كل اللي بتتكلم عنه دي حقوق الزوج مش الحبيب
الحبيب ملوش غير حق الحب وبس وانا بحبك
ادهم: وانا مش عاجبني كلامك ده
ليلي: وانا اسفه معنديش غيره
ادهم: طيب خلاص ايه رايك احب فيكي واشوف واحده تانيه اعمل معاها اللي انا عايزه وخليكي انتي للحب الافلاطوني ده؟
ليلي بزعل: والله يا ادهم انت حر.حياتك وانت حر فيها لكن انا مش هقبل واحده تشاركني فيك انت سبق وطلبت تتجوزني واناوافقت اكتر من كده معنديش
ادهم: وانا مازلت عند كلامي بس ظروفي حاليا ما تسمحش
ليلي: خلاص وانا ما ضغطتش عليك وقولتلك براحتك
ادهم: امال اللي انتي بتعمليه ده ايه مش ضغط ده؟ مش هتلمسني غير لما تتجوزني ده ايه ده؟؟؟
ليلي: ده اللي اتربيت عليه
محدش يلمسني قبل جوزي
جوزي اول راجل يبوسني ويمسك ايدي وياخدني في حضنه محدش قبله ابدا
ادهم: وانا هبقي جوزك
ليلي: خلاص يبقي لما تبقي
ادهم: متلويش دراعي
ليلي: انا ما بلويش دراعك افهمني
ادهم: لا اسف مش فاهمك ولا فاهم وجهه نظرك ولا مقتنع بيها
ليلي: وانا اسفه مش هتنازل عن مبادئ
ادهم: انتي كده بتجيبي اخرها يا ليلي
ليلي: لو ده اللي هيجيب اخرها معاك يبقي هاته انا اسفه انا بحبك اه لكن بالطريقه دي لأ
ادهم دور العربيه ووصلها لحد شغلها وهيا طول الطريق دموعها بتنزل بصمت وقف العربية ومستنيها تنزل
ليلي: وبعدين؟
ادهم: مفيهاش بعدين انتي بتحبي بطريقه وانا بحب بطريقه
انتي اثبتي ليا في كذا حاجه اننا غير بعض
طرقنا مختلفه اسف فرصه سعيده يا ليلي
ليلي: ههه يعني يا تبوسني يا تسيبني؟؟؟
ادهم: لا مش كده
ليلي: لا هيا كده بالظبط
ادهم: خلاص هيا كده عايزه ايه؟
ليلي: مش عايزه حاجه بس كنت بااكد لنفسي اني اتمسكت بيك لاخر لحظه وانت اللي بعتيني علشان بس ما الومش نفسي
ادهم: طيب ومستنيه ايه اتفضلي"