ليلي نزلت وجريت وهيا بتعيط
هو للحظه فكر ينزل وراها ويقولها تستني ويقولها انه بيحبها وانه ميقدرش يعيش من غيرها بس لأ هو شايف انها غلط وان الحب يديله حقوق اكتر من كده وان الجواز مش شرط ابدا
راح لاصحابه وسهر معاهم وشرب وسكر وراجع البيت يطوح يمين وشمال
ليلي روحت وفضلت تعيط طول الليل ومهما اصحابها قالوا الي انها مش بتبطل عياط
حتي شغلها مراحتوش
خالد اخوها فضل جنبها يسالها في ايه بس طبعا مقدرتش تقوله
محمد اخوها كان اقرب ليها فحكتله كل حاجه
محمد: بصي انا مش هكلمك كاخوكي واقولك ده صح او غلط او اقولك حرام وحلال
انتي من حقك تحبي وتتحبي بس اللي انتي عملتيه هو الصح هو ملوش حقوق ابدا
حقوقه ياخدها لما ياخدك انتي الاول بيته
وياخدك قدام الكل
ولو بيحبك بجد هيراجع نفسه وهيرجعلك يبوس القدم ويبدي الندم
ليلي: ههههه انت بتتريق؟؟
محمد: لا ابدا بتكلم بجد اديله بس فرصه يشوف الحياه من غيرك لو بيحبك بجد هيرجع ولو كل اللي كان عايزه يتسلي يبقي هيشوف غيرك وينساكي وده الاحسن في كلتا الحالتين ليكي
لو رجع هيبقي عرف قيمتك ولو مرجعش يبقي ربنا بيحبك وبيختارلك الافضل
اه هنتعب بس احسن ما تغلطي معاه وبعدها يقولك بخ معرفكيش صح ولا ايه؟ خليكي قويه وارفعي راسك كده
كلام اخوها رجعلها ثقتها في نفسها بس قلبها موجوع وللاسف ده ملوش علاج
ادهم كل يوم بيسهر في مكان شكل مع شله الانس
ابوه وامه بيضايقوا منه ومن سهره ورجوعه اخر الليل سكران
علي: وبعدين معاك هو كل يوم كده؟
ادهم: انت عايز ايه؟ مضايقك في ايه؟
علي: شغلك ابسط مثال ده غير صحتك
ادهم: شغلي انا منتظم فيه وبعدين انا متعود علي كده ايه المشكله ايزي
سابه ومشي ومبيديش لاي حد فرصه يتكلم معاه وخصوصا عم حسين اللي مش عاجبه حاله ابدا
وفي يوم سهر في كباريه وروح هو واصحابه علي شقه من شققهم وكل اصحابه معاه اولاد وبنات ومن ضمنهم واحده اسمها داليا ودلعها دولي وكانت بتحب ادهم جدا وهتموت عليه
دولي: مالك بس قولي ايه اللي تاعبك؟
ادهم: ومين قالك ان في حد تاعبني انا مفيش حد يقدر يتعبني
دولي: طيب امال مالك مش علي طبيعتك ليه ايه اللي مغيرك؟؟ انت كنت فريش اكتر من كده وكنا قريبين اكتر من كده
حتي لما كنا بنتقابل بره ايه اللي اتغير؟
ادهم: مفيش ما ترغيش كتير
دولي: انا بس عايزه اقولك اني لسه بحبك
ادهم: وانا لسه ما بحبكيش وسبق وقولتلك قبل كده دي مجرد رغبه نزوه تسليه مش اكتر وانتي وافقتي فمتجيش دلوقتي وتتكلمي عن الحب
دولي: خلاص مش هتكلم عن الحب هقول واحشتني ووحشتني كل حاجه فيك
ادهم: بقولك ايه فكك مني خالص وشوفي غيري لاني مش في المود نهائي
دولي: طيب اديني فرصه وانا هخليك في مود المود كمان
كل كلامها كان بدلع رخيص ومحاولات لاغرائه
بس هو زي ما يكون محصن او مش شايفها
قام يرقص معاها وطول الوقت حاسس ان ليلي واقفه وبتراقبه ونظراتها مليانه عتاب
وكل شويه يعند علي نفسه اكتر واكتر كانه بيعاقبها هيا بانه يكون مع حد غيرها
دولي: هاه قولت ايه؟
ادهم: قولت ايه في ايه؟
دولي: بقولك تعال ندخل جوه نبقي براحتنا اكتر وانا هنسيك الدنيا باللي فيها
ادهم افتكر ليلي لما اخدها الكافيه واتضايقت لمجرد انها في مكان شبه معزول معاه
لقي دولي بتشده علي اوضه النوم وهو دخل وراها وليلي مش مفرقاه وعقله بيضرب صفارات انذار وكلمه واحده بتردد جواه
خاين خاين خاين خاين
اخيرا النهار طلع واتفاجئ بحد بيصحيه
فتح عينه وقفلها تاني مش قادر يقوم او بتحرك او حتي يسمع اي صوت
ادهم: اششششششش مش عايز صوت نهائي
الصداع هيفرتك دماغي
حسين: ماهو لما تفضل تشرب للصبح لازم دي تكون النتيجه خنتها ولا لسه ولا هيا مش فارقه معاك؟؟؟؟
هنا ادهم قام انتبه لنفسه هو فين؟؟؟ وقالع هدومه ليه؟؟ ومين قلعه اصلا؟؟؟ اخر حاجة فاكرها هو دولي هنا لوحدهم وبس ضباب
حسين: ما انتاش فاكر اصلا اذا كنت خنتها ولا لأ؟؟؟؟
ادهم: اطلع بره وما تتدخلش في اللي مالكش فيه وياريت ما تنساش نفسك وتنسي انت مين وانا مين استني تحت لحد ما انزل اتفضل
ادهم مكنش عايز الخيانه ابدا قد ايه هو بيحبها؟؟؟ وقد ايه هيا واحشاه؟؟ وعنده استعداد يدفع عمره كله بس يضمها ولو مره
بس غلطاته كترت قوي فحتي لو سامحته علي كدبه مش هتسامحه علي خيانته ابدا
قام لبس ونزل علي شغله وطول الطريق ساكت وحتي عم حسين ساكت
ادهم روح البيت اخر النهار ورفض يشرب او يسهر،،تاني يوم ادهم نازل لشغله بس لقي سواق غريب مستنيه
ادهم: انت مين؟
السواق: انا السواق الجديد بتاع حضرتك واسمي سعيد
ادهم: ومين قال ان انا عايز سواق فين حسين؟
السواق: معرفش يا افندم انا علي بيه اتصل وطلبني وانا جيت اتفضل
ادهم سابه ودخل لابوه
ادهم: فين حسين؟؟
علي: صباح النور
ادهم: فين حسين انت طردته؟؟؟؟
علي: انا؟؟؟؟ انا برضه؟؟؟ ما تشوف انت عملتله ايه؟؟؟ هو قدم استقالته ومشي
ادهم سمع كلامه ومشي من غير ما ينطق حتي مع اعتراض ابوه ورغيه
السواق: علي الشركه؟؟
ادهم: لا سيبلي العربيه واتفضل انا هسوق بنفسي
السواق: بس يا افندم
ادهم: ادخل جوه لابويا شوفه ممكن يحتاجك لكن انا لأ
راح ادهم لحسين بيته واتفاجئ بيه حسين قدام بيته
ادهم: هتقولي ادخل ولا هتقفل باباك في وشي
حسين: لا اتفضل هو انا قليل الاصل ولا معنديش دم زي ناس كده؟؟؟
ادهم: هعديها ماشي معنديش دم بس ده مش معناه انك تسيب الشغل
حقك عليا انا اسف اني ضايقتك كنت متضايق وتعبان وانت كنت قصادي حقك عليا
حسين: لا العفو يا باشمهندس بس انا ما سيبتش الشغل علشان كلمتين انت قلتهم في ساعه غضب انا مش صغير واللي بينا عشرة عمر
ادهم: طيب امال ايه؟ فين بقي عشره العمر دي
حسين: انا اسف بس ما ينفعش افضل معاك
ادهم: ليه في ايه؟؟
حسين: اللي عندي مش هيعجبك فخليني ساكت احسنلك
ادهم: لا اتفضل قول اللي عندك
حسين: انت دخلتيني معاك في لعبه صغيره وانا غلطي اني سكت من الاول
ادهم: دي مكنتش لعبه
حسين: لا لعبه طالما رميتها بالمنظر ده تبقي لعبه
ادهم: ليلي مش لعبه ابدا
حسين: ولما هيا مش لعبه بتكسر قلبها ليه؟
ادهم: هيا اختارت بنفسها
حسين: هيا برضه اللي اختارت؟؟؟
ادهم: ايوه هيا حتي اسالها
حسين: انا ما اسالش انا بشوف بعيوني
بنت بسيطه غلبانه كانت ورده مفتحه انت دخلت حياتها شقلبتها ولخبطتها ضحكت عليها ولعبت بيها وكدبت عليها وسكت لانك قولت انك بتحبها بس محتاج تتاكد انها بتحبك لشخصك ولا لأ والبنت فعلا بتحبك وبتعشقك بس انت الله اعلم زهقت ولا مليت ولا لقيتها مش قد مقام الباشا فرميتها زي حاجه رخيصه
ادهم :ليلي مش رخيصه وانا ما اسمحلكش تتكلم كده
حسين: تسمح ولا ما تسمحش انا مش شغال عندك يبقي اتكلم براحتي وانت تسمع وبس
انا استحملت كتير قوي منك لكن لحد الخيانه وهنا لازم اقولك لأ لحد هنا واقولك انت بتعدي الخطوط الحمرا
واقولك ان الطريق ده ملوش رجعه
كله الا الخيانه كلا الا الزنا ربنا بيقول "" ولا تقربوا الزنا انه كان فاحشه وساء سبيلا """" بس طبعا انا مين علشان اقولك كده؟؟ ولاني مش هينفع اشوف ده ومش هينفع اشارك في معصيه زي دي واسكت قدمت استقالتي فهمت بقي
ادهم: اولا انا مخنتهاش
حسين: اه فعلا بس كنت عريان وسكران تعد النجوم
ادهم: من غير تريقه لو سمحت ايوه انا كنت مع دولي وكنت صاحي مشوش بس بعدها افتكرت كل حاجه انا مشيت دولي من عندي لاني مقدرتش اعدي الخطوط الحمرا اللي انت بتقول عليها ومقدرتش اخون ليلي
بس هيا السبب هيا اللي حطتنا في الوضع ده
هيا قالت ان انا ماليش اي حقوق عليها
هيا اختارت انها تبعد
هيا ما بتحبنيش كفايه ولا بتثق فيا كفايه
هيا بترفض حتي لمسه ايدي يبقي هتكون معايا ازاي!؟؟
وبعدين بتشرط عليا يا اتجوزها يا مالمسش اي شعره منها يبقي ده تسميه ايه ده؟
حسين: انا اسميه ايه؟؟؟ انا اسميه عزه نفس واحترام اسميه دين واخلاق
ادهم: افندم؟
حسين: امال انت تسميه ايه؟انت عارف اصلا انك تقابلها لوحدكم ده في حد ذاته حرام مالكش حتي حق انك تشوفها بس انتو الدين معدش بيفرق معاكم اصلا
ادهم: الدين بيقول ان الواحد يتجوز عمياني كده؟
حسين: لا الدين بيقول تشوفها مره واحده وفي بيت اهلها وبس
وليلي حبيتك وسمحتلك تشوفهاوتكلمهاوبعدين ليلي واحده محترمه مش زي النوعيه اللي كنت سهران معاها
انت نفسك كنت قرفان من النوعيه دي ومن الناس دي وكنت عايز تهرب منهم وفعلا هربت
ولقيت ليلي وحبيتها علشان هيا نظيفه ومختلفه عن الجو اللي حواليك ده جاي دلوقتي تلومها؟؟؟
مش انت كنت عايز حد بسيط يحبك انت مش فلوسك ولا مركزك ولا شكلك؟؟؟
ادهم: بس انا حبيتها وقولتلها اني عايز اتجوزها مش علاقه وبس ده مش كفايه؟
حسين: لا طبعا مش كفايه؟؟
ادهم: امال ايه اللي يكفي؟؟؟
حسين: انها تبقي في بيتك
ادهم: انت هتتكلم زيها؟؟؟
حسين: انا عايز اسالك سؤال تجاوبني عليه بصراحه
ادهم: انا بحبها مش ده سؤالك؟؟؟
حسين: لا مش ده سؤالي
ادهم: طيب اتفضل قول سؤالك
حسين: انت بحكم شغلك بتسافر كتير تآمن لمين في بيتك وتصدق انها هتصونك وتصون اسمك في غيابك ليلي ولا دولي دي؟؟؟؟
واحده زي ليلي اللي هتكون انت اول راجل يلمسها؟؟؟ ولا واحده زي دولي الله اعلم كام واحد لمسها قبلك وبعدك؟؟؟ مين اللي تستاهل تبقي في بيتك؟؟؟ واوعي تقولي انك متربي بره وانك عادي كده انت شرقي ودمك حامي والا مكنتش حبيتها من الاول
ادهم سكت ومردش
حسين: ايه مرديتش ليه؟
ليلي بتحبك وانت عارف كده كويس
يبقي تصلح اللي حصل وتروح تبوس ايديها ورجلها لانك لو خسرتها عمرك ما هتعوضها ابدا
ادهم: الحب عندي ثقه وهيا ما بتثقش فيا
حسين: لو ما بتثقش فيك مش هتسلمك قلبها ولا هتحبك ولا هتخرج معاك ولا هتركب عربيتك
ادهم: لو بتثق فيا وفي كلامي كانت صدقتني لما قولتلها اني هتجوزها
حسين: وهيا صدقتك وبناءا عليه خرجت معاك ووثقت فيك اكتر واكتر لكن اللي انت بتطلبه ده ملوش علاقه بالثقه وعارف لو هيا وافقت انك تلمسها كنت انا اول واحد هقولك ابعد عنها
لكن اللي باخلاقها دي بقولك اهو اوعي تخسرها اوعي يا ادهم هتندم كتير وهتخسر حب حقيقي في حياتك اوعي وفي الاول والاخر انت حر
ادهم: هيا اللي بعدت وهيا اللي اختارت
حسين: هو انت تحط العقده في المنشار وتقول هيا اختارت
ادهم: عقده ايه ومنشار ايه؟؟؟؟ علي العموم انا جاي علشان ترجع معايا الشغل
حسين: اسف مش هرجع من غير ما تصلح امورك مع ليلي وتبعد عن السكه اللي انت ماشي فيها
ادهم: هو انت كمان بتشرط عليا؟؟؟؟ عارف انا ولا عايزك ولا عايز ليلي انا حياتي احسن كتير من غيركم بعد اذنك
سابه ومشي وهو متلخبط حاسس ان كلام عم حسين صح وفي نفس الوقت متضايق ومخنوق
لقي نفسه قدام بيت دولي نزل ودخلها فتحتله الشغاله وسال عليها عرف انها نايمه
دخل والشغاله راحت تناديلها لان عندها اوامر ان ادهم بالذات حالة خاصة
دخل وهو بيسال نفسه هو جاي هنا ليه؟ عايز ايه من دولي؟ هيا معندهاش اي شيئ هو عايزه
لحظه وجت دولي تجري بقميص نومها الشفاف القصير اللي مبين اكتر ما مغطي
بصلها من فوق لتحت وتخيل ولو لحظه ليلي هيا اللي واقفه قدامه بس معرفش يتخيلها ولا يتخيل رد فعله
دولي رمت نفسها في حضنه بدلع وهو واقف عادي
دولي: مطلعتش علي طول فوق ليه هو انت غريب؟؟
افتكر كلام عم حسين
ليلي اللي عمر ما غيرك لمسها ولا دولي اللي الله اعلم عنها
واهي فعلا قدامه بتقوله يدخل اوضه نومها وبتقابله بقميص نوم
قعدت دولي وقعدته معاها ولازقه فيه وبتحاول تجذب انتباهه ليها او تغريه بس حاسه انه في عالم تاني
قامت وقعدت علي رجليه وايديها حوالين رقبته ووشها علي وشه وبتتكلم بدلع
دولي: مش حالق دقنك ليه بتشوك
ادهم: بتشوك يبقي ابعدي عنها
مشت خدها علي دقنه
دولي: لا انت في كل حالاتك عاجبني بس بتبقي احلي لما تحلقها
افتكر ليلي وهيا معاه
( ليلي: عارف شكلك احلي بكتير وانت دقنك خفيفة كده
ادهم: يعني ايه اربيهالك؟؟
ليلي: لأ بس خفيفه كده شكلك لذيذ
ادهم: طيب اتفضليني طالما لذيذ
ليلي: طيب تعال اتفضلك اكتر))
فاق علي صوت دولي
دولي: ايه قولت ايه؟
ادهم: قولت ايه في ايه؟
دولي: بقولك لسه بدري تعال نريح فوق شويه
ادهم: فوق ده اللي هو في سريرك؟؟؟؟ انتي فين باباكي ومامتك؟؟؟
دولي: وانت مالك ومالهم الله اعلم هما فين مسافرين شغل وبعدين هما عارفين ان انت special case
ادهم: خليني واضح معاكي انا ما بحبكيش
دولي: ومين جاب سيره الحب دلوقتي؟ تعال
( ليلي حبيبته وبيعشقها ورافضه يلمس شعره منها ودي مش بيحبها وبتقدمله نفسها
صوت عم حسين جواه
"" تامن لمين في بيتك تصونك وتحفظك؟ "")
فاق علي دولي شفايفها علي شفايفه بتبوسه
كان جامد مش عارف يندمج معاها وكل اللي بيفكر فيه ليلي وبس وفجأه حس انه قرفان
قرفان من دولي وقرفان اكتر من نفسه
زقها بعيد عنه ووقف
دولي: في ايه مالك؟
ادهم: افتكرت عندي اجتماع مهم بعد اذنك
خرج ومشي والامور بقت اوضح قدامه
ليلي حب عمره ومش عارف يكمل من غيرها ومحتاجها في حياته باي ثمن واي طريقه
وصل شغله لقي نفسه رايح يدخل المدخل الخلفي يمكن يشوف ليلي
بس ما شفهاش فجاه لقي حد بينادي عليه
:: ادهم ادهم استني "
"الحلقة السادسة
ادهم دخل لقي حد بينادي عليه
ادهم ادهم استني
بص لقي واحد مش عارفه بس فاكر انه شافه قبل كده
ادهم: افندم
الراجل: انت مش فاكرني؟؟؟ انا صاحب المطعم اللي جنبكم ده
فاكر لما جيت انت وعم حسين تسألني علي البنت اللي خبطتها العربيه ليلي اللي شغاله في محل الرياضة ده
ادهم: اه اه افتكرت افندم خير؟
الراجل: معلش لو مفيهاش غلاسه هو انت تعرف ليلي دي كويس؟؟؟
ادهم اتردد يقوله ايه بس افتكر ليلي لما حذرته انه يقول انهم مرتبطين
ادهم: اه اعرفها شويه يعني عادي جيران شغل
الراجل: اه طيب تعرف اخلاقها ايه؟
ادهم: اخلاقها؟ حضرتك اسئلتك غريبه بس هيا انسانه محترمه بس ليه الاسئله دي؟
الراجل: ابني الكبير جالي هنا وكانت بتشتري اكل وشافها واتكلم معاها وعجبته قوي وعايز يتعرف عليها اكتر ويخطبها فقولت اعرف انا عنها كل حاجه الاول قبل ماهو يرتبط بيها
ادهم بيسمع الكلام ده والنار بتولع جواه اكتر واكتر وسيطر علي نفسه بالعافيه علشان ما يضربش الراجل ده
ادهم: اممم طيب انا معرفش حاجه عنها بعد اذنك
سابه ومشي لانه مش ضامن نفسه لو وقف اكتر هيعمل ايه
طلع مكتبه زي المجنون رايح جاي وكل ما حد يدخله يطرده بره
افتكر عم حسين وهو بيقوله لو ضاعت منك هتندم واهو فعلا هيتجنن
بيتخيلها تضحك وتهزر مع واحد تاني غيره ده ممكن يقتلها
ايه ده من امتي هو غيور كده؟؟؟ ماهو ارتبط ببنات قبل كده بس عمره ما حس بنار جواه كده؟؟؟ عمره ما حس انه عايز يقتل حد قبل كده؟؟؟
ابوه دخل عليه ولسه ادهم هيزعق
ادهم: قولت مش عايز حد
قاطعه علي: ده انا في ايه مالك؟
ادهم: اسف مفيش
على: هتولع في الناس والشركه وتقول مفيش مالك فيك ايه!؟؟؟ مره مبسوط ومره فرحان ومره عاقل ومره مجنون فيك ايه؟
ادهم: قولت لحضرتك مفيش
على: مين هيا؟؟؟
ادهم: مين هيا ايه؟
علي: اللي عامله فيك كل ده؟؟ انت ابني وانا عارفك اكتر من اي حد؟؟ ومفيش حاجه تجنن الراجل غير واحده فمين هيا اللي قلبتك حالك كده؟؟؟
ادهم: _____
على: ايه مش هتقول لابوك؟
ادهم: مش حكايه مش هقول بس الموضوع انتهي فملوش لازمه الكلام
على: ومين اللي نهاه ونهيتوه ليه؟
ادهم بعصبيه: علشان هيا متخلفه ___ متخلفه وغبيه وغبيه
على: متخلفه مرتين وغبيه مرتين اممممم ده الموضوع كبير بقي طيب ايه رايك لو تحكي لابوك الراجل العجوز الموضوع من اوله وتسيبني انا احكم اذا كانت هيا المتخلفه و الغبيه ولا انت؟؟؟
ادهم: انا مش غبي ولا متخلف
علي: انت هتقولي ما انا عارفك
ادهم: قصدك ايه بقي هاه؟
علي: مقصديش احكيلي الاول
ادهم: انت عندك شغل
على: في داهيه الشغل المهم ابني حبيبي ميبقاش هيتجنن كده قولي الحكايه من اولها
ادهم فضل مع ابوه وحكاله من اول يوم لحد النهارده
ادهم: بس وهو ده اللي حصل من اول يوم لحد النهارده مين بقي اللي غلطان؟؟؟؟
علي: سيبك من مين الغلطان انا هسالك سؤال واحد تجاوبني عليه بصراحه
ادهم: اتفضل
علي: انت بتحبها ولا هيا مجرد بنت عاديه؟؟؟؟؟ ودولي دي ايه بالنسبالك انت تعرفها اهو من كام سنه وكل سنه كانت بتسافرلك وتقضي معاك كام اسبوع ولا شهر
ادهم: دولي دي سوري بس just for fun
No thing serious
علي: طيب وهيا عارفه كده؟
ادهم: عارفه وكل يوم بقولها ان انا مبحبهاش
وهيا مجرد _____ يعني انت فاهم اكيد
علي: فاهمك طيب وليلي؟؟؟
ادهم: ليلي!!! ليلي حاجه مختلفه! مختلفه عن اي شيئ مريت بيه او حسيت بيه
عندها مقدره غريبه انها تخرجني من قمه الحزن لقمه الفرح والعكس بتجنني بلحظه
مش عارف اقولك ايه عنها مجنونه هيا؟؟ تخيل بترفض دعوتي في مطعم five star علشان تروح محل كشري او تركب عربيتي وتتنطط في مواصلات غريبه انسانه غريبه
علي: كده انت جاوبتني علي سؤالي
هيا انسانه بسيطه بترضي بحاجات بسيطه وانت كدبت عليها وفهمتها انك زيها فليه مستغرب دلوقتي؟ وبعدين انت عشت في وسط متحرر جدا وده يمكن يكون غلطي انا
انا خليتك تعيش معظم حياتك بره مصر وده خلاك تتطبع بطباعهم وتنسي طباعنا هنا
وللاسف يا ادهم انا سيبتك بره كتير ومكنتش اب كويس لاني معلمتكش اهم مبادئ دينك وعرفتك الحرام والحلال وسيبتك وقولت اهو شاب خليه يعيش سنه بس للاسف كان المفروض اعلمك الحرام والحلال
اللي انت بتطلبه من ليلي ده مش ثقه ده بالنسبالها هيا بتتخلي عن دينها و قيمها ومبادئها
ادهم: ماهي دولي اهي بتتمني بس اشاره مني وهتبقي في السرير معايا
علي: دولي عايشه في نفس الوسط بتاعك ولا قيم ولا اخلاق
علاقتك اللي بدولي اللي بتسميها
Just for fun
دي حرام جدا ومن اكبر الكبائر كمان اما ليلي فدي بنت نظيفه ولسه بريئه حافظ عليها هتصونك وتحافظ عليك
وبعدين انت قرفان منها ومش طايقها ليه بقي عايز ليلي تبقي زيها؟؟؟
ادهم: انا مش عايزها زيها بس عايزها تسمحلي اقرب منها اكتر
علي: مش هتسمحلك وده اللي مجننك عليها ولو بتحبها صح هتقبلها كده زي ماهيا
اتمني انك تعرفني عليها بس ده اكيد بعد ما تكشف ورقك قدامها
ادهم: مش دلوقتي لو كشفته هخسرها مش دلوقتي.... هكمل معاها واشوف هتوصلني لحد فين
علي: وابقي طمني عليك
ادهم حاول يكلم ليلي بس هيا رفضت حتي تديله اي فرصه علشان يكلمها فيها
اخيرا استناها وهيا مروحه بيتها واول ما خرجت من المحل لقته بيشدها من دراعه ويسحبها بعيد عن اختها وصاحبتها ويدوب صاحباتها هيلحقوها فماجده منعتهم وقالتلهم يسبوهم لوحدهم يصفوا امورهم
ادهم: سيادتك ما بترديش عليا ليه؟
ليلي: وارد عليك ليه؟ انت كنت واضح في كلامك لما مشتني وطردتني بره عربيتك ولا نسيت؟
ادهم: ده كان اختيارك انتي؟
ليلي: اه صح نسيت اصل انا اللي شرط عليك يا اما ارضي مزاجك ورغباتك يا ما تلزمنيش
ادهم: انا مقولتش كده ابدا
ليلي: ده معني اللي طلبته مني
ادهم: ماعلينا مش ده اللي عايزك فيه
ليلي: امال سيادتك جاي ليه؟
ادهم: يا الله منك.... المهم انتي ايه اللي بينك وبين ابن صاحب المطعم؟؟؟
ليلي: مطعم ايه وابن مين انت بتتكلم عن مين؟
ادهم: متعمليش فيها عبيطه انتي عارفه انا بتكلم عن ايه
ليلي: لا مش عارفه انت بتتكلم عن ايه
ادهم: اه امال ابن صاحب المطعم عايز يخطبك كده لله في لله كده ولا اتسحر من نظره
ليلي: انا مش فاهمه انت بتتكلم عن ايه وبعدين انا مش ملزمه اوضح لحضرتك اي حاجه بعد اذنك
ويدوب هتمشي مسكها من دراعها جامد
ادهم: انا مخلصتش كلامي ردي علياايه اللي بينك وبينه وعايز يخطبك ليه لما هو ما يعرفكيش؟
ليلي: اولا مفيش حاجة بينه وبينه
ثانيا مش كل الناس زي سيادتك لازم يجربوا الاول قبل ما ياخدوا خطوه جديه في ناس بتكفيها الاخلاق والسمعه
ادهم: قصدك ايه هاه؟ وبتلمحي لايه سيادتك؟
ليلي: ما بلمحش ولعلمك لو فعلا ابن صاحب المطعم اتقدملي هوافق عليه بعد اذنك
ادهم: بقي كده ماشي براحتك بس لعلمك انتي انا كل يوم في الفتره اللي فاتت كنت بنام في حضن واحده وبتديني كل اللي عايزه مش مجرد بوسه او مسكه ايد بعد اذنك
سابها ومشي وهيا اتجمدت مكانها
ايه اللي قاله ده؟؟؟ هو معقوله ده؟ هو في ناس كده؟ لألأ ممكن بيقول كده بس علشان يضايقها زي ماهيا قالت انها هتوافق علي غيره علشان تضايقه ايوه اكيد كده اكيد كده
ماجده جت واخدتهاوروحو وهيا طول الطريق ساكته مصدومه مش عارفه تتكلم
ادهم ركب عربيته وساقها ولقي نفسه علي الكورنيش في المكان اللي قعد فيه مع ليلي اخر مره واتخانقوا فيه وبيسال نفسه
هو ليه قالها كده؟ هو من يوم ما عرفها ما لمسش واحده ابدا وندم علي اي علاقه عاشهاقبلها؟؟؟ ليه بدال ما يصالحها زعلها اكتر؟ هو بس كان ناوي يقولها قد ايه بيحبها وبدال كده جرحها
ليلي طول الليل تعيط واصحابها مهما يقولو او يعملوا معرفوش يخرجوها من حالتها
واخيرا كل واحده راحت بيتها
وفاء وهيا داخله بيتها لمحت محمد جاي ابتسملها اول ما شافها وهيا ردتله ابتسامته
محمد: ده ايه الصدف الجميله دي؟
وفاء: اخبارك ايه؟ وشغلك اخباره ايه؟
محمد: الحمد لله تمام هانت اهي
وفاء: ايه هيا اللي هانت؟
محمد: يعني اخلص شويه التزامات وحاجات كده وساعتها هعرف اخد خطوه
وفاء: خطوه ايه بالظبط؟
محمد: خطوه اقرب فيها من اللي عايزه
وفاء: وايه هو اللي انت عايزه؟
محمد: مش ملاحظه ان اسئلتك كتير؟؟ ؟
وفاء: مش ملاحظ ان كلامك الغاز ؟؟؟؟
محمد: ولا الغاز ولا حاجه كلامي واضح بس للي بيفهم
وفاء: واللي ما بيفهمش؟؟
محمد: يستني بقي الايام تفهمه
وفاء وفاء
وفاء: ايوه يا ماما حاضر طالعه
مامتها: اطلعي يا بنتي الوقت اتاخر
محمد: مساء الخير يا ست الكل
مامتها: مساء النور يا شكوكو ما تتطلع
محمد: لا زي ما حضرتك قولتي الوقت متاخر
تصبحوا علي خير
وفاء: صح قبل ما تدخل شوف ليلي وحاول تتكلم معاها
محمد: هيا كانت كويسه ايه اللي حصل تاني؟
وفاء: اتكلم انت معاها تصبح علي خير
طلعت لامها اللي واقفه مستنياها
مامتها: يعني لو حد شافكم واقفين كده في نص الليل مع بعض يقول عليكي ايه؟
وفاء: اولا محدش شافنا وبعدين احنا جيران ومحدش هيتكلم علينا
غير كده بقي مش مهم اي حد
مامتها: ومالك مبسوطه قوي كده هو قالك ايه؟
وفاء: هو ما قالش بس لمح انه هياخد خطوه
مامتها: هياخد خطوه مين قالك ان الخطوه دي بقي لصالحك؟؟
وفاء: هو قال ان الحدق يفهم تصبحي علي خير
محمد دخل لاخته وفضل يرغي معاها شويه وهيا مسهمه ومش بترد
محمد: الظاهر ان انا بتكلم مع نفسي
ليلي: اسفه يا كوكو بس متضايقه حبتين
محمد: هو ادهم اخباره ايه مفيش جديد؟
هنا ليلي اتفجرت في العياط
محمد: هو ده بقي السبب اللي واخدك مني احكيلي ايه اللي حصل
حكتله ليلي علي الحوار اللي دار بينهم
محمد: بصي بقي احنا مش عايزين نسبق الاحداث بس معني انه يتجنن كده لما يسمع ان حد اتقدملك انه لسه بيحبك وعايزك هو بس محتاج وقت يراجع فيه نفسه
ليلي: واللي قاله انه كل يوم مع واحده!!!
محمد: ليه دنجوان هو!!!!! لا هو بس قال كده علشان يغيظك زي ما انتي غيظتيه وقولتيله انك هتوافقي علي الراجل لو اتقدملك هو واجهك بنفس السلاح اللي واجهتيه بيه الغيره
ليلي: يعني مفيش بنات؟
محمد: ما اظنش وبعدين هيجيب منين بنات كل يوم
ليلي: وهيا البنات قليلة انت اصلا ما شفتوش هو شكله ايه اصلا
محمد: شكله ايه يعني؟ اهو راجل زي اي راجل
ليلي: لا طبعا ادهم امور جدا شعره طوله عرضه لبسه ابتسامته طريقه كلامه كله علي بعضه كده بيسحر
محمد: بتتكلمي علي واحد من بتوع السيما سيادتك
ليلي: اهو شبهم كده عامل زي احمد عز بطوله وعرضه بس علي احلي
محمد: احلي كمان لا ده الموضوع كبير كل ده وسواق
ليلي: ساعات بحس انه مش سواق اصلا عامل زي الناس الارستقراطيين كده
زوق اتيكيت طريقه اكله لبسه كلامه غريبه
محمد: انا فعلا من كلامك كده مش حاسه سواق ابدا
بس يمكن يكون ابن ناس يعني من الطبقه المتوسطه ولا غني ولا فقير واتعلم كويس
ليلي: ممكن تقريبا كده هو خريج مدارس لغات لانه بيتكلم انجليزي كتير وبطريقه حلوه
محمد: يمكن علي العموم نامي دلوقتي والصبح ربنا يسهلها
ادهم الليل كله بيتخيل ليلي بفستان ابيض طويل وواقفه قصاده واول ما بيقرب منها بتجري وتروح لغيره وكل شويه يقوم من نومه مفزوع ومستني النهار يطلع باي طريقه
ليلي بتحلم طول الليل بادهم وحواليه بنات كتير وكلهم في حضنه وكلهم بيبصولها ويشاورو عليها ويضحكوا وهو بياخد واحده وري التانيه في حضنه
اخيرا انتهي الليل بكوابيسه قامت هيا واختها ونزلو شغلهم واول ما وصلت لقت ابن صاحب المطعم مستنيها واسمه امجد واول ما شافته افتكرته هيا كانت نسياه خالص هيا فعلا اتكلمت معاه مره او اتنين مش اكتر وهيا بتجيب اكل
امجد: صباح الخير انسه ليلي
ليلي: صباح النور
امجد: انا امجد ابن
قاطعته: انا عارفه حضرتك خير
امجد: كنت عايز اتكلم معاكي شويه
ليلي: اتفضل قول
امجد: لا هنا مش هينفع
ليلي: وغير هنا مش هينفع برضه
امجد: يبقي في بيت حضرتك اديني عنوانكم وهنيجي انا والدي البيت ونخليه ينفع ايه رايك؟
ليلي: افندم؟؟؟ انت بتقول ايه؟
امجد: بقول لحضرتك اديني العنوان
ليلي بتضحك باستغراب وشيئ لا ارادي خلاها تبص حواليها لمحت ادهم وافق بعيد ساند علي عربيته بيتفرج عليها والنار طالعه من عنيه بصتله نظره طويله قبل ما تجاوب علي امجد"
"الحلقة السابعه
ليلي واقفه مع امجد وهو مستني اجابتها انها تديله عنوانهم وبصت وراها لقت ادهم واقف ومراقب الموقف بصتله نظره طويله وبعدها بصت لامجد ساعتها عرفت انها عمرها ما هتقدر تكون مع اي حد غير ادهم وبس
امجد: هاه عنوانكم ايه؟
ليلي: انا اسفه يا استاذ امجد بس انا في حد في حياتي فمش هقدر ادي لحضرتك العنوان
امجد: امممم يا بخته المحظوظ ده
ليلي: الله اعلم بقي اذا كان يا بخته ولا امه داعيه عليه
ضحكوا هما الاتنين وبعدها امجد مد ايده يسلم علي ليلي
امجد: على العموم فرصه سعيده جدا يا ليلي
ليلي: انا اسعد واسفه
امجد: لا لا ما تتاسفيش المهم اشوفك علي خير وابقي اعزميني لما تاخدوا خطوه
ليلي: باذن الله
طبعا ادهم شاف ضحكهم وشاف ايديهم في ايدين بعض فعرف ساعتها انه خسرها وانه هيبدا يندم انه ضيعها من ايده
عطاهم ضهره ومشي
ليلي بصت وراها بس ما لقتش ادهم واقف مكانه فجريت علي المكان يمكن تلحقه بس مالقتلوش اثر
وقفت مكانها تفكر تعمل ايه؟ تدخله تسال عليه ولا ايه بالظبط؟
ويدوب هتدخل سمعت ماجده بتنادي عليها
راحتلها
ماجده: وبعدين صاحب الشغل كل شويه يسال عليكي انجزي ادخلي
ليلي: عايزه اشوف ادهم فين الاول
ماجده: مش وقته خالص ادخلي وبعد شويه
ابقي اخرجي تاني
فضلت ليلي اليوم كله عينها علي المكان اللي ادهم ديما بيقعد فيه بس ما ظهرش
حاولت تتصل بيه موبيله مقفول
واخر النهار حاولت برضه تشوفه معرفتش او يفتح تليفونه بس برضه مفتحوش
الليل كله بتحاول تكلمه بس نفس النتيجه
واول ما النهار نور نزلت جري وراحت وقفت قدام مدخل الشركه بحيث تشوفه اول ما يوصل فضلت مستنيه والكل بيبصلها باستغراب والكل بيسال واقفه ليه هنا وعايزه ايه يا تري؟
اخيرا عربيه ادهم شافتها وقف قدام الشركه وركن العربيه كان معاه باباه ومامته
نزل من العربيه وواقف فلمح ليلي واقفه وللحظه معرفش يعمل ايه بس بعدها راح ناحية ابوه اللي راكب جنبه فتحله الباب وفتح لمامته الباب
علي: ده ايه الادب ده كله؟
مامته: روح قلبي حبيبي
الاتنين بيضحكوا وهو جامد ملامحه
ليلي: لو سمحت يا ادهم ممكن للحظه؟
الكل بصلها باستغراب ويدوب مامته هتتكلم فادهم بص لابوه انه يلحقه
طبعا ابوه شك ان دي ممكن تكون هيا حبيبه ابنه فابتسم
علي: يالا يا ريري بينا فوق وانت خلص بسرعه وتعال عايزك
ادهم: حاضر ثواني
ريهام: ايه ده لحظه؟؟
علي: تعالي عايزك فوق يالا
سحبها ابوه ومشي لانه عارف ان مراته مش هيعجبها اي شيئ من اللي بيحصل
اول ما طلعوا وسابوهم
ادهم: انتي اتجننتي؟؟؟؟ واقفه هنا ليه؟ وعايزه ايه؟
ليلي: انت قافل تليفونك من امبارح ليه؟
ادهم: اعتقد ان ده شيئ ما يخصكيش
ليلي: لا طبعا يخصني،، اي شيئ يخصك يبقي يخصني
ادهم: يا سلام!!! وده من امتي؟ وسي امجد يطلع ايه ان شاءالله؟
ليلي: يطلع مجرد واحد طلب ايدي واترفض مش اكتر ولا اقل
ادهم بصلها بانتباه ولمعه في عينه
ادهم: اترفض؟؟؟؟؟
ليلي: ايوه اترفض
ادهم: ورفضتيه ليه؟ مش هو واحد بيفهم صح ويتصرف صح واحسن مني!؟؟؟
ليلي: مفيش حد في الدنيا دي كلها احسن منك فاهم؟ مفيش حد ابدا ابدا ممكن يحل محلك في قلبي
اول ما بصتلك امبارح وانت واقف بعيد وعينك عليا عرفت ان عمري ما هحب حد غيرك ابدا
عرفت اني بحبك انت وبس
ليلي بتتكلم وادهم واقف وحاسس ان الدنيا هترجع تضحكله من تاني بعد الكابه اللي عاشها ليله امبارح
لمح كذا عربيه بتقف قدام الشركه فمسك ليلي من ايدها وشدها وراه
اخدها عند المدخل الخلفي للشركة في المكان اللي بيتقابلو فيه بس المره دي فتح الباب ودخلوا جوه
ليلي: حد ممكن يجي هيبقي شكلنا وحش
ادهم: لا ما تقلقيش السبب الوحيد اللي خلاني اختار المكان ده لما احب اهرب انه معزول ومحدش بيجي فيه ابدا المهم خلينا في المهم
ليلي بتقرب منه: وايه هو المهم؟
ادهم: انتي مش قد القرب ده ونتيجته فخليكي بعيد احسنلك
ليلي: وحشتني قوي يا ادهم
ادهم: وانتي كمان وحشتيني الفتره اللي فاتت عرفت اني مقدرش ابعد عنك ابدا وان حياتي من غيرك فاضيه وملهاش طعم انا عايز افضل جنبك باي شكل او طريقه انتي تحدديها
ليلي: لا شكل ولا طريقه كل اللي عيزاه انك تفضل جنبي وموجود في حياتي وبس
ادهم: وده نفس اللي انا عايزه خلاص؟
ليلي: لا مش خلاص
ادهم: ايه تاني في ايه؟
ليلي: انت قلتلي انك كل يوم كنت في حضن واحده شكل وانك نمت مع بنات تانيه ده صح؟
ادهم: انتي شايفه ايه؟
ليلي: انا مش شايفه انا بسالك
ادهم: لا يا ليلي اه روحت وسهرت في اماكن زي كده واتعرض عليا بس معرفتش ابص لواحدة تانيه غيرك صورتك كانت قدامي طول الوقت ما فارقتنيش ابدا
ليلي: انت كنت عايز تنام مع واحده تانيه بجد؟
ادهم: مش حكايه انام مع واحده تانيه الحكايه اني كنت عايز اثبت لنفسي انك مش مهمه قوي في حياتي وفشلت فشل ذريع
ليلي: وانت متضايق انك فشلت؟؟؟
ادهم ابتسم: لا مش متضايق اينعم كنت متضايق ساعتها بس حاليا انا مبسوط اني فشلت
ليلي: ما تيجي تسكن عندنا؟؟؟
ادهم: افندم؟ ؟ اسكن فين؟
ليلي: في شقه جنبنا فضيت وطقت في دماغي اقولك تيجي فيها
ادهم: شقه جنبكم؟؟؟؟
ليلي: هيا مش شقه شقه يعني؟؟
ادهم: مش فاهم يعني ايه مش شقه شقه؟؟؟
ليلي: اولا هيا دور ارضي
ثانيا هيا اوضه واحده واسعه وطرقه فيها مطبخ وحمام وبس
ادهم مستغرب هو في ناس ممكن يعيشوا في اوضه واحده وبس
ادهم: اممم اوضه واحده؟؟؟
ليلي: انت واحد وبعدين هنكون مع بعض الصبح في الشغل قصاد بعض واخر النهار برضه قصاد بعض ايه رايك؟ ؟
ادهم: اديني فرصه ادرس الموضوع وارد عليكي
ليلي: هترد امتي علشان نكلم صاحب البيت؟؟
ادهم: اخر النهار اوك
ليلي: اوك هسيبك بقي واروح شغلي باي
ادهم: خليكي معايا شويه
ادهم مسك ايدها وهيا المره دي سابته لانها خافت انه يسيبها هيا لو سابت ايده
ادهم: غريبه ما سحبتيش ايدك ليه؟
ليلي بصت للأرض: علشان!!!
ادهم: علشان ايه؟
ليلي: علشان خايفه
ادهم قربلها ورفع راسها بايده بكل رقه علشان تبصله
ادهم: خايفه من ايه؟
ليلي: خايفه تزعل مني وتسيبني تاني
ادهم مسك وشها بايده الاتنين وبصلها في عنيها وهو قريب منها قوي
ادهم: شوفي انا مش هنكر اني بتضايق لما تسحبي ايدك من ايدي او تحطي مسافه بينا اه بتضايق واه بتخنق بس عمري يا ليلي ما هسيبك علشان حاجه زي كده ومهما ابعد هرجع تاني فاهمه؟ من هنا ورايح مش عايزك تعملي حاجه غصب عنك ولا تخالفي دينك ومبادئك وتربيتك حتي ولو علشاني انا فهمتيني حبيبه قلبي؟؟
ليلي: حبيبه قلبك؟ بجد يا ادهم حبيبه قلبك؟
ادهم: واكتر كمان
ليلي سندت راسها علي صدره وسحبت نفس طويل مليان ارتياح وهو واقف عايز يضمها جامد بس خايف من رد فعلها فيدوب ايده حواليها براحه كانها شيئ هش
ليلي شيئ جواها بيترجاها تتمادي اكتر واكتر وتضمه اكتر واكتر
ادهم حس بالحرب اللي جواها فسهلها عليها وبعد هو عنها
ادهم: روحي شغلك دلوقتي وهبقي اكلمك
ليلي بتبصله باستغراب
ادهم: ايه مستغربه ليه؟
ليلي: علشان انت كنت عايز ده
ادهم: ومازلت عايزه بس عايزه برضاكي من غير الحرب اللي جواكي دي عايزك لما تسلميلي نفسك يبقي برضا واقتناع وفي مكان طبعا غير ده
ليلي: في بيتك صح وقدام الكل مش سرقه
ادهم ابتسم: في بيتي وفي النور ان شاءالله
اديني بس فرصه وانا هظبط كل حاجه بس المهم انك توعديني انه مهما يحصل تفضلي جنبي اوعديني
ليلي: اوعدك انك طول ما بتحبني وعايزني في حياتك عمري ما هبعد عنك ابدا اوعدك
راحت ليلي شغلها وهيا الدنيا مش سايعاها من الفرحه
ادهم كمان طالع فرحان ابوه فهم انهم اتصالحوا لكن الفضول هيقتل امه اللي ادهم رفض يعرفها اي حاجه وقالها انها مجرد بنت عايزه حاجه وخلاص
ادهم قال لابوه علي عرض ليلي انه يسكن عندهم
علي: هههههه هههههههه هههههههه
ادهم واقف ايديه في وسطه ومستغرب
ادهم: ممكن اعرف انت بتضحك ليه؟
علي: عليك طبعا؟ انت تسكن في مكان شعبي ولوحدك وفي اوضه؟؟؟ انت اتجننت ولا ايه؟
ادهم: اتجننت ليه؟ فين المشكله؟؟ هروح يدوب علي النوم
على: هتاكل ازاي؟ هتنظف المكان ازاي؟ هتعيش ازاي؟
ادهم: سيادتك ناسي انا عشت كام سنه بره لوحدي ولا ايه؟
علي: لا مش ناسي بس حضرتك الظاهو انك ناسي ان انت كنت قاعد في فيلا فيها خدم وحشم وطول بعرض مش اوضه ولوحدك
ادهم: هجرب مش هخسر حاجه
على: الموضوع بيكبر والكدب بيكتر وده مش حلو ابدا انت عايز توصل لايه؟
ادهم: عايز اعيش حياتها واشاركها فيها قبل ما اخدها هيا لحياتي
على: وانت هتاخدها فعلا لحياتك؟؟؟
ادهم: طبعا انا بحبها بجد
علي: لا بس هيا مزه الصراحه
ادهم: مزه؟؟ بقي في اب يقول لابنه علي حبيبته انها مزه ابهات اخر زمن
على: خلاص يا عم ما تزقش المهم والدتك مش هتتقبلها بسهولة
ادهم: اممم وهنا يجي دور سيادتك انت تقنعها
على: امك مش هتقبل واحده عاديه تدخل عالمها
ادهم: والله هيا مش هيكون قدامها خيارات اصلا يا تقبلها يا تخسرني
على: ربنا يستر
ادهم كلم ليلي وقالها موافق يسكن عندها وهيا كلمت محمد اخوها علشان يقابل صاحب البيت مع ادهم ويتفقوا وفعلا اخر النهار ادهم راح معاهم وقابل محمد وشاف الاوضه وكانت صدمه عمره
الحيطان واقعه والارض بلاط ومكسر وكل حاجه متبهدله واستغرب ازاي في ناس عايشه كده؟
اتفقوا وادهم فعلا اجر الشقه ومحمد اخدوا البيت عندهم
اخيرا ادهم بقي في بيت ليلي
بيتهم كان بسيط جدا 3 اوض صغيرين
اوضه لليلي وماجده واوضه لابوهم واوضه لخالد ومحمد وصاله صغيره فيها كنبه وتليفزيون وكراسي بلاستك والارض مفروشه حصاير شقتهم كلها كانت قد اوضه نومه بس
ابوي ليلي كان شخصيه كوميديه جدا
راجل طيب وبيحب الهزار والضحك وعلي طول اي قعده هو فيها بيبقي الكل بيضحك
ادهم حس باحساس دافي في بيتهم البساطه وعدم التكلف واحساس العيله عجبه قوي
وطبعا عم فتحي ابو ليلي عجبه جدا بخفه دمه وهزاره
ليلي كانت خايفه من مقابله ادهم لعيلتها بس الكل حبه وهو حب الكل
طبعا صاحباتها كل واحده بتيجي باي حجه علشان تشوفه
ادهم اي تردد جواه ناحيه الاوضه اختفي بعد مقابلته لاهل ليلي
طبعا جاب عمال يحولو الاوضه لمكان يصلح للسكن
العمال شغالين وفعلا الاوضه بدات تتغير
وجه وقت الدهان
ليلي معده في الشارع كان الشباك مفتوح فوقفت لقت ادهم واقف وبيدهن بنفسه الحيطان
ليلي: الشده
ادهم: افندم؟
ليلي: امم عمي الامريكاني ازيك قصدي
ادهم: كويس وانتي رايحه فين كده؟
ليلي: مالكش فيه
ادهم: افندم؟
ليلي: ايه افندم افندم اللي طالعلي فيها دي؟
ادهم: رايحه فين؟
ليلي: هشتري حاجه من على الشارع هجيب اكل هاه ارتحت
ادهم: تحبي اروح انا؟
ليلي: تسلم بس لا المهم بتدهن بنفسك يعني؟
ادهم: هوايه بس غريبه انتي واقفه كده عادي
هيا ام امل مش قاعده في محلها ولا ايه؟
ليلي: لا مش قاعده ولا هيا ولا جوزها وبعدين دي بقاله صغيره مش محل المهم
ادهم: قولي يا عيوني المهم
( بقاله ام امل في وش شباك ادهم بالظبط وام امل دي شخصيه طيبيه بس حشريه حبتين وعندها كل اخبار الشارع)
ادهم قرب من ليلي ومسك ايدها وباسها
ليلي استغربت واتفاجئت وسحبت ايدها بسرعه
ليلي: انت بتعمل ايه؟
ادهم: انا عملت وخلاص المهم قولي المهم بتاعك
ليلي: امم عايزه الاوضه لونها موف في بينك معرفش ازاي وعايزه في الحيطه اللي في وشي دي قلب كبير موفي غامق وتحته هيكون السرير والحيطه دي اللي جنبي يبقي فيها ورد والحيطه اللي في وشها الدولاب
وهنا تحت الشباك كنبه كده مريحه وهنا جنب الشباك شاشه كبيره والناحيه دي التسريحه
اما الطرقه بره تحط فيها تربيزه سفره صغيره
ادهم بيسمعها بابتسامه عريضه
ليلي: ايه مالك مش عاجبك كلامي؟
ادهم: لا ياقمر عاجبني بس حسستيني انها الشقه اللي هنتجوز فيها
ليلي: وماله فيها ايه نتجوز فيها انا موافقه
ادهم: موافقه تتجوزي في اوضه؟؟؟
ليلي: اه موافقه المهم ابقي معاك وبس
ادهم: انتي غريبه
# ازيك يا ليلي # ازيك يا ادهم
ادهم: اهلا يا ام امل اخبارك ايه؟
ليلي: ازيك يا ام امل هاه حد عايز حاجه من علي الشارع؟
ادهم: لا متشكر
ام امل: شكرا يا حبيبتي
ليلي جريت بسرعه وسابتهم
يوم وري يوم بيعدي وادهم قافل شباكه ومش بيفتحه نهائي ومشغول كمان عن ليلي
وفي يوم ليلي راجعه هيا وماجده من شغلها لقت الشباك مفتوح وصاحبتها شرين وهبه ووفاء بيتفرجوا وقفت معاهم واستغربت من اللي شافته
شافت كل حاجه زي ما قالت بالظبط
القلب الموف المرسوم الورود اللي طلبتها
اوضه النوم كانت وهم
كل الالوان متجانسه مع بعض بطريقه اجمل من اللي اتخيلتها
وفاء: دي بقت تحفه ايه ده!!!
سمر: بقي دي الاوضه المعفنه الكسره بقت كده!
هبه: دي ولا القصر بصوا اوضه النوم نفسها عامله ازاي ولا الشاشه كل حاجه تحفه
ماجده: بت يا ليلي انتي تنحتي ليه؟
ليلي: ما تخيلتش ابدا انه هيعمل زي ما قلتله
هنا ادهم كان خارج من جوه ولابس برنس الحمام واول ما شافهم ابتسم
ادهم: ده انا نسيت انه بث مباشر
البنات ضحكوا وجريو وباركوله وهما ماشين
ليلي وقفت لحظه
ادهم: عجبتك!؟؟!
ليلي: طبعا دي احلي من اللي كان في خيالي
كده انا مش هتنازل عنها ابدا
ادهم: مش يمكن اسكنك في قصر احلي منها مليون مره!!!
ليلي: دي عندي بمليون قصر سلام بقي دلوقتي
ادهم مستغرب منها ومن قناعتها باي شيئ بسيط
لازم بقي يواجهها بالحقيقه في اقرب وقت
اتعرف علي جيرانها واخواتها وقرب من الكل
وفي يوم لقي ليلي مصره تقابله بره
فخرجو مع بعض الصبح قبل الشغل
ادهم: خير اول مره تصري كده ان احنا نتقابل بدري كده؟
ليلي: عندي مفاجأة ليك
ادهم: ربنا يستر قولي
ليلي: بقولك مفاجاه
ادهم: خلاص ماشي اتفضلي قولي يا قمر
ليلي: انا واحد من اللي بابا شغال عندهم صاحب شركه كبيره هو بيعز بابا قوي وجه عندنا حتي البيت كذا مره وعارفنا كلنا
ادهم: اهممم وبعدين؟
ليلي: جه عندنا امبارح اتغدي معانا وانا كلمته عنك ووافق
ادهم: كلمتيه في ايه ووافق علي ايه بالظبط؟
ليلي: عنك انك تشتغل عنده بشهادتك
ادهم: ومين قالك اني عايز شغل؟؟
ليلي: هتشتغل مهندس يا حبيبي وبراتب كويس مش سواق
ادهم: وانتي مين قالك اني راتبي حاليا مش كويس؟ ولا انتي مش عايزه ترتبطي بسواق؟
ليلي: لا طبعا انت عارف ان ده مش قصدي بس دي فرصه كويسه تشتغل في مجالك وحتي لو براتب ااقل بس بشهادتك الفلوس مش مهمه يا ادهم
ادهم: يعني ايه الفلوس مش مهمه؟؟
ليلي: يعني مش مهمه المهم راحتك النفسيه وتشتغل في مجال انت بتحبه اكيد دخلت هندسه علشان تشتغل مهندس مش سواق ولا ايه! وبعدين جرب مش هتخسر حاجه روح شوف الشركه وقابل الراجل واتكلم معاه وبعدها قرر براحتك علشان خاطري وافق علشان خاطري
ادهم: ليلي حبيبتي خاطرك علي راسي بس انا مش عايز شغل انتي مش فاهمه حاجه
ليلي: طيب فهمني ايه اللي مش فهماه؟
ادهم: افهمك ايه بس؟ انا مش محتاج شغل
ليلي انا اصلا
ليلي: انت اصلا ايه؟ مالك متردد ليه؟
ادهم: توعديني الاول انك تفضلي جنبي مهما يحصل؟
ليلي: ايه لازمته الكلام ده دلوقتي؟
ادهم: اوعديني علشان خاطري انه مهما يحصل تفضلي معايا
ليلي: هو ايه اللي ممكن يحصل يا ادهم؟؟
ادهم: توعديني ولا لأ؟؟؟
ليلي: طبعا اوعدك اني افضل معاك علي طول مهما يحصل
طول ما انت عايزني جنبك هفضل
ادهم: وانا عايزك علي طول جنبي
ليلي: يبقي انا هفضل علي طول جنبك
ادهم قرر انه لازم يصارحها بكل حاجه وكفايا يخبي عليها بقي
ادهم: انا في حاجه لازم تعرفيها عني؟؟
ليلي: ايه هيا؟؟ متجوز؟
ادهم: لا طبعا
ليلي: اتجوزت قبل كده او كنت خاطب مثلا او
ادهم: بس بس الموضوع مالوش اي علاقه بالستات اصلا
ليلي: يبقي ما يهمنيش
ادهم: بس انتي لازم تعرفيه
ليلي: خلاص براحتك طالما انت عايز تقولي قوله بس خليك عارف ان مفيش حاجه تفرق معايا طالما ان انت بتحبني
ادهم: يعني ده المهم حبي ليكي؟؟
ليلي: طبعا ده الاساس
ادهم: طيب يا ليلي انا ابقي "