قبل الحلقه فين الكومنتات اللي بتتحاور معايا وتكلمني؟
فين الكومنتات اللي تفتح النفس؟
انتو عارفني مش بحب حلوه وتحفه والكلام ده بحب الحوار
اسيبكم مع الحلقة
ادهم قرر انه يقول لليلي الحقيقة
ادهم: ليلي انا ابقي!! يعني انا مش مجرد --- انا اصلا
ليلي: انا ابقي انا مش انا مجرد في ايه مالك!؟ ماتتكلم علي طول
ادهم: انا ابقي
تليفونه رن وكان ابوه
علي: انت فين؟ سيادتك ناسي ان في وفد المفروض تستقبله في المطار ولا ايه؟
ادهم: لا مش ناسي حاضر هكون في المطار وهستقبلهم ومش هتاخر ما تقلقش حضرتك
خلص مكالمته وقفل السكه وبص لليلي
ليلي: يالا بينا وصلني الشغل او اخد تاكسي وانت روح علشان ما تتاخرش
ادهم: هوصلك الاول يالا
ليلي: اوعي تنسي معادك الساعه 3 العصر كلمني وهبقي اقولك العنوان
ادهم: ربنا يسهل يالا بينا
راح شغله وطول اليوم بيفكر بطريقه يقولها بيها الحقيقه
راح ادهم المقابله علشان خاطر ليلي وصاحب الشركه اعجب بيه جدا وبافكاره وبذكاؤه وطلب منه يشتغل معاه بالراتب اللي يختاره
ادهم وافق علي شغله الجديد كان تجربه جديده ليه، واحساس مختلف انه يبقي شغال عند حد
ليلي فرحت جدا بقراره ده
اختها ماجده اتجوزت وكان فرحها شعبي وبسيط وفي الشارع حضره الاهل والجيران وبس
ادهم كان مستمتع بجو الفرح جدا. كان كل الناس فرحانه مفيش تمثيل ولا تزيف ولا حد بيحضر لمجرد يجامل او عنده غرض
الناس دي كل اللي بيجمعها الحب وبس
كان مستمتع كمان بالاغاني الشعبيه اللي اول مره يسمعها واتفرج علي ليلي وصحباتها بيرقصوا عليها
قرب من ليلي وهمس في ودنها
ادهم: عقبالك يا قمر
ليلي: انا وانت ان شاءالله في كوشه واحدة
ادهم: قريب قوي ان شاءالله
ليلي رقصت بطريقه جننت ادهم فاضطر براحه كده يسحبها
ليلي: في ايه مالك؟
ادهم: كفايه رقص
ليلي: ده فرح اختي
ادهم: خلاص ورقصتي شويه كفايه
ليلي: انا عايزه ارقص
ادهم: ليه علشان كل واحد يبصلك شويه ويتخيلك بترقصيله شويه
ليلي اخدت بالها انه غيران وغيران جدا كمان وده عجبها قوي
ليلي: انا برقص علشانك انت
ادهم: وانا مش عايزك ترقصيلي قدام مليون واحد خلاص
ليلي: ما تقولها!!
ادهم: اقول ايه؟
ليلي: قول انك غيران
ادهم: غيران؟؟؟ مش حكايه غيره الغيره دي بتبقي من حد مثلا خايف انه ممكن يكون ند ليا او ياخدك مني
لكن دي مش غيره دي!!! دي!!!
مش عارف دي اسمها ايه؟ بس اللي عارفه ان ده مضايقني
ليلي ابتسمت: دي اسمها غيره بس غيره علي عرضك لو انت بتعتبرني ملكك!!
ادهم: ايه طبعا بعتبرك ملكي وبتمني بجد يجي اليوم اللي تلبسيلي فيه الفستان الابيض وهعملك فرح ما اتعملش لاي حد قبل كده وده وعد مني
ليلي: بجد يا ادهم؟؟
ادهم: بجد يا عيون ادهم وقلب ادهم وروح ادهم
ادهم مسك ايدها وباسها وهيا سحبت ايدها
لانها لمحت حد جاي اتوترت بس لقته محمد
محمد: انتو هنا خالد بيدور عليكي
ليلي: حاضر هروحله
مشيت ليلي وسابتهم ومحمد وقف مع ادهم
محمد: انت بتحبها بجد؟؟؟
ادهم استغرب ان محمد عارف علاقتهم
محمد: اه عارف علاقتكم ليلي ما بتخبيش حاجه عني
ادهم: اه بحبها بجد
محمد: ولما انت بتحبها بجد ما بتخافش عليها ليه؟
ادهم: انا مش بخاف عليها؟؟؟ ازاي بقي؟؟؟
محمد: لما تطلب منها حاجات مش من حقك وتهددها انك هتسيبها لو معملتوش يبقي ما بتخافش عليها ( ادهم هيتكلم فمحمد شاورله) اخلص كلامي الاول
لما توقف معاها في الظلمه وما يهمكش حد يشوفها ويتكلم عليها يبقي مش بتخاف عليها
ادهم: خلصت!؟ اولا الموضوع الاول خلص وانا اتاسفتلها وصلحنا الوضع ده
ثانيا انا مش قصدي اقف معاها في الظلمه زي ما بتقول انا بس ضايقني رقصها وطلبت منها تبطل رقص
محمد: ده فرح اختها والموجودين اهل كلهم
ادهم: برضه مضايقني
محمد: ليلي متربيه هنا والكل عارفها وبيحترمها
ادهم: برضه مضايقني
محمد: طيب انتو حرين بس راعي ان هنا منطقه شعبيه والناس ما بتصدق تتكلم
ادهم: حاضر هراعي ده واسف اوك
يوم وري يوم وادهم نفسه يخلي ليلي تقعد من الشغل بقي وخصوصا بعد جواز ماجده بس في نفس الوقت خايف ميعرفش يشوفها تاني
بتعدي الايام وري الايام وكل يوم ادهم بيحاول يقول الحقيقه بس ديما حاجه بتقاطعه
في يوم صاحب الشركه جه البيت وقابل عم فتحي وكان متضايق جداوبيزعق كمان
: بقي دي اخرت معروفي وجميلي فيكم انا دخلته علشان خاطرك انت وبنتك. ودي جزاتي
عم فتحي: اهدي حضرتك بس وقولنا في ايه انا مش فاهم حاجه؟
صاحب الشركه: اهدي؟ اهدي؟ انا خسرت شركتي بسببك وتقولي اهدي
خالد: جري ايه يا راجل انت!؟! انت جاي ترمي بلاك علينا ولا ايه واحنا مالنا ومال شغلك؟؟
عم فتحي: بس ياخالد انت واسكت قولنا بس يا باشا ايه اللي حصل؟
هنا ليلي دخلت البيت وشافت الجو متوتر
اول مره ترجع بدري كده بس كانت مصدعه شويه واستاذنت بدري
ليلي: في ايه اللي بيحصل هنا؟ خير؟
صاحب الشركه: خير وهيجي منين الخير بس
خالد: انت يا راجل انت يا تقول في ايه يا تتفضل من هنا
عم فتحي: قولت بس يا خالد
احنا بس عملنا ايه لحضرتك؟؟
صاحب الشركه: الراجل اللي انت وبنتك اترجتوني علشان اشغله عندي
ليلي قلبها بيدق بسرعه وخايفه من اللي هيتقال عن ادهم
بتردد سالت: ماله ادهم في ايه؟
صاحب الشركه: انتي لسه بتسالي في ايه؟ بتساعدوه علشان ينصب عليا وياخد مني شركتي؟ يخليني أآ منله وانتو تشكروا فيه وانا البس في الحيط صح؟ ياتري بقي قبضتو كام منه؟؟ علشان تبيعوني ليه؟؟؟ تهون عليك يا راجل العشره ده انا طول عمري بيتي مفتوح ليك؟
خالد: انت اكيد اتجننت نبيع ايه ونقبض ايه؟
عم فتحي: مش هقول تاني اسكت انت
يا باشا احنا مش فاهمين انت بتتكلم عن ايه خالص ولا بيعنا ولا اشترينا وادهم ده ولد غلبان ساكن جنبنا هنا بقاله فتره واحنا اتوسطناله في شغل ولا اكتر ولا اقل؟؟
صاحب الشركه: وانت متخيل ان انا هصدق كلامك ده وانك متعرفش ادهم ده يطلع مين؟
ليلي اخيرا نطقت
ليلي: ادهم سواق في شر كه الخطاب جروب جنبي في الشغل في وسط البلد وجه سكن جنبنا وهو انسان كويس وعلشان كده اتوسطناله في الشغل عندك ادهم انسان كويس
صاحب الشركه: يا سلام ماهو يا انتي هبله يا مشتركه معاه في نصبه؟؟؟
ليلي: نصب ايه بس؟؟؟
عم فتحي: يا بيه كل اللي نعرفه عن ادهم انه مهندس وشغال سواق
صاحب الشركه: يعني ضحك عليكم انتو كمان ادهم يا حلوين مش سواق في الخطاب جروب ادهم هو الخطاب نفسه هو صاحب الشركه كلها وحاليا استولي علي شركتي كمان
ليلي: استحاله ادهم يعمل كده؟
صاحب الشركه: استحاله؟ اهو عمل __ ياتري بقي هو هنا استولي علي ايه تاني؟ ولا وعدكم بايه؟
خالد: ولا وعد ولا استولي وتلميحاتك دي مش عجباني
صاحب الشركه مشي بعد ما عرف انهم ما يعرفوش حاجه عنه والكلام مالوش لازمه
هو مشي وساب حاله صمت مسيطره علي الكل
وفجأه ليلي خرجت وسابتهم وخالد جري وراها وبينادي عليها
خالد: استني هنا رايحه فين؟
ليلي: سيبني لو سمحت يا خالد ساعه وجايه
خالد: هتروحيله صح وبعدين؟
ليلي بتبصله باستغراب
خالد: ايه بتبصيلي كده ليه فاكراني مش عارف انك بتحبيه؟؟ انتي فاكراني مش واخد بالي منكم ولا ايه؟ ولا مش هعرف عيون اختي الصغيره لما تلمع وقلبها لما يدق؟؟
ليلي عنيه دمعت
ليلي: يبقي تسيبني لو سمحت اروح مشواري ده يا خالد
خالد: اولا محدش في الدنيا دي يستاهل دموعك
ثانيا هسيبك تروحي بس بشرط اوصلك انا
ليلي: خالد ارجوك سيبني لوحدي
خالد: لا مش هسيبك يا اوصلك يا مفيش خروج اصلا وبعدين معايا عربيه الشغل يالا
طول الطريق وهيا ساكته وخالد احترم سكوتها لانه حاسس بالحرب اللي جواها
اخيرا وصلو قدام الشركه وركن وبصلها.
خالد: تحبي اركن عند الباب الخلفي؟
افتكرت ليلي كل مره اتقابلوا فيها هناك
ليلي: لأهنا احسن
خالد: اطلع معاكي؟؟؟
ليلي: لأ معلش انا محتاجه اواجهه لوحدي بعد اذنك
طلعت ليلي وهيا بتقدم رجل وتاخر رجل وكل لحظه عاشتها معاه بتمر زي الشريط قدامها
سالت واحد ماشي بصينيه علي كوبايات شاي
ليلي: لو سمحت مكتب المدير منين؟
الفراش: المدير الكبير ولا الصغير؟؟
ليلي: الصغير
الفراش: ثالث دور اخر الممر هتلاقي باب وهتلاقي السكرتير هو هيدخلك بس لو معندكيش معاد مش هتدخلي لانه ما بيقابلش اي حد
ليلي: متشكره قوي
طلعت ليلي زي ماقالها نادي الفراش عليها
الفراش: يا انسه في اسانسير اركبيه
ليلي: متشكره بس مش عايزه
ليلي عايزه ترتب افكارها او تحدد هتقول ايه او تقنع نفسها ان ممكن يكون في لبس في الموضوع وادهم مظلوم
مشيت ووصلت لحد قدام الاوضه
السكرتير: اي خدمه يا افندم حضرتك عايزه مين؟
ليلي: ده مكتب المدير؟
السكرتير: ايوه يا افندم بس حاليا في اجتماع مع مدراء الاقسام فلو حضرتك عندك معاد اتفضلي استني شويه
ليلي بصتله بس مش سمعاه كل اللي سمعاه مدير ومدراء ومعاد بس مش مركزه
بصت للباب وقدمت منه ومدت
السكرتير: انسه قولت لحضرتك مش هينفع تدخلي
قام من مكتبه علشان يوفقها بس هيا فتحت الباب بسرعه علي اخره ووقفت متنحه
الكل طبعا بصلها باستغراب اما ادهم فاول ما رفع راسه وشافها وقف بسرعه ولسانه اتعقد ما عرفش ينطق وهيا وافقه بتبصله ومش مصدقه ابدا
السكرتير: اسف يا افندم ___ اتفضلي حضرتك بالذوق يا اما هطلبلك الامن
ويدوب هيمد ايده يشدها
ادهم: سيبها يا محمود خلاص روح انت
السكرتير: انا اسف يا افندم بس هيا
قاطعه: قلتلك خلاص
ادهم: ليلي انا _____
ليلي: انت ايه؟ كداب ومخادع ونصاب كمان
الكل بيبص لادهم ومليون سؤال عن البنت اللي بتشتم المدير قدام ابوه كمان
ادهم: ليلي انا كنت هقولك بس في الوقت المناسب
ليلي: واديني عرفت... طيب انا وسيادتك بتتسلي و
قاطعها: انا ما بتسلاش
ليلي قاطعته: انت تسمعني وتسكت ما تتكلمش انا مش جايه هنا علشاني
انت نصبت علي الراجل ليه؟ بقي ده جزاته انه عمل خاطر ليا ولبابا؟
ادهم: راجل ايه ونصب ايه؟
ليلي: كفايه كدب بقي ورد على سؤالي
ادهم: انا ما بكدبش عليكي مش فاهم انتي بتتكلمي عن ايه؟ ؟
ليلي: عن الراجل اللي سمع كلامي ووافق يشغلك عنده وفي الاخر سيادتك تتطمع في شركته وتاخدها ايه ما بتشبعش؟؟ ولا اي حاجه بتشوفها بتبقي عايزها ولا ايه؟
ادهم: انا ما اخدتش حاجه ومش فاهم حاجه
ليلي دمعه نزلت غصب عنها ومسحتها بسرعه
ادهم: ليلي ارجوكي اديني فرصه اشرحلك
ليلي: احنا فتحنالك بيتنا واعتبرناك ________ (الدموع غصت صوتها) فارجوك رجع للراجل شركته وما تخليهوش يندم ان عرف بابا في يوم من الايام الراجل ده جمايله علينا كتير ارجوك مش هطلب من حضرتك اكتر من كده بعد اذنكم واسفه لو قطعت اجتماعكم
جريت ليلي وادهم وافق مش عارف يعمل ايه؟
اخيرا بص لابوه
ادهم: انا حكيتلك عن الشركه انت ليك دخل باللي هيا بتتكلم عنه ده؟ ؟
علي: انا بزنس مان ولما سنارتي بتغمس بشدها
ادهم: يعني ايه مش فاهم؟
علي: يعني شفت شركه كويسه وهتفدنا كتير في شغلنا فضمتها لشركاتي فين المشكله؟
ادهم: فين المشكله؟ وانا؟؟ مفكرتش فيا الاول؟؟
علي: اللعب والتسليه حاجه والشغل حاجه تانيه
ادهم: وهو مين اللي بيلعب وبيتسلي؟؟؟
علي: امال انت بتعمل ايه هاه؟ اللي انت فيه ده تسميه ايه غير تسليه لعبه جديده عجباك وبتتسلي بيها
ادهم: ليلي مش لعبه ابدا... افتكرت انك اكتر واحد قريب مني وفاهمني تقوم انت اللي تعمل فيا كده؟ طيب قولي الاول كنت اتصرفت ليه كده؟
علي: محستش انك جدي معاها
ادهم: هههه محستش سيبت شغلي هنا معاك وسيبت بيتي لمجرد اني ابقي قريب منها وتقولي ما حسيتش..... ليلي هيا حياتي ولو ما سامحتنيش يبقي مبروك عليك الشركه الجديده وياريت تكون مستاهله انك تدمر حياه ابنك علشانها
ادهم مشي وسابهم ونزل يلحق ليلي
علي الكل وافق بيبصله
علي: انتو واقفين كده ليه خلاص العرض خلص اتفضلو كل واحد يروح شغله
ليلي نزلت تجري ودموعها سابقاها وركبت بسرعه
ليلي: اطلع بسرعه ارجوك
طلع خالد ومشيوا وهيا طول الطريق بتعيط
خالد: ايه اللي حصل فهميني؟
ليلي: هو فعلا صاحب الشركه
خالد: ام طيب بطلي عياط خلاص
ليلي بتعيط اكتر واكتر
خالد: هو انتي بتعيطي ليه؟ انتي عملتي حاجه غلط معاه ندمانه عليها؟؟؟
ليلي للحظه مش فهماه
ليلي: انت ازاي تفكر كده اصلا!! لا طبعا ادهم ما لمسش شعره مني
خالد: عارف بس لما لقيتك بتعيطي قوي كده خفت تكوني ندمانه علي حاجه سلمتيهاله باسم الحب
ليلي: سلمتله قلبي ما ينفعش اندم عليه!!! انا حبيته قوي يا خالد قوي
خالد: هو من الاول كده يا ليلي ما كنش طبيعي في حاجات كتيره ما كانتش منطقيه
ليلي: ارجوك انا مش عايزه اتكلم دلوقتي
وصلو البيت وهيا اول ما وصلت دخلت اوضتها وفضلت تعيط
خالد قالهم اللي حصل وشويه والباب خبط
فتح خالد لقي ادهم في وشه
خالد: انت ليك عين تيجي هنا ؟
خالد بيتكلم بعصبيه وهيمسك في خناقه وفعلا ماسكه من هدومه
طلع عم فتحي: خالد بس افندم يا ابني
ادهم: عايز اوضح اللي حصل
خالد: واحنا مش عايزين توضيح اتطرق
عم فتحي: خالد عيب كده خليه يدخل انا عايز اسمعه
ادهم دخل ولقي الكل واقف في الصاله الصغيره بيبصوله باتهام واستغراب ولوم
محمد خالد ناديه ماجده وعم فتحي
ادهم: ما تبصوليش كده ارجوكم
عم فتحي: وانت عايزنا نبصلك ازاي بعد اللي عملته خنت ثقتنا وضحكت علينا واخرها تصغرني قدام الراجل اللي لحم اكتافي من خيره
ادهم: لا واحده واحده عليا
هنا ليلي فتحت الباب وخرجت
ليلي: انت جاي هنا ليه هاه يا سياده الباشا الكبير وبعدين البيت مش قد المقام
ادهم : ليلي ارجوكي
ليلي: سيادتك تترجي عيب ما يصحش انت اؤمر علي طول والعب بحياه الناس عادي
عم فتحي: اسكتي بقي وخليه يتكلم
ليلي: وانا مش عيزاه يتكلم ويبرر ويضحك علينا بكلمتين
ادهم: انا مش بضحك علي حد بكلمتين
ليلي: اه اسفه انت بس بتلعب بحياه الناس
ادهم: ما تسكتي بقي وتسمعيني الاول
خالد: واد انت ما تعليش صوتك عليها انت فاهم لقسما بالله اروح فيك اللومان
عم فتحي: وبعدين معاكم يا تخرسوا خالص يا كل واحد يدخل اوضته
اتكلم وقول اللي عندك
ادهم: اولا انا ما نصبتش علي حد ولا اخدت شركات حد
ليلي: اكدب اكدب براحتك
ادهم: ممكن تسيبيني اكمل وبعدها قولي اللي انتي عيزاه
الشركه انا كنت اتكلمت مع والدي عنها وهو اللي راح واشتراها ودفع تمنها ما اخدهاش او نصب زي ما انتو ما بتقولو ودفع اكتر من تمنها كمان وده تقدروا تتاكدوا منه بسهوله لو سالتو الاستاذ محمد عبد السلام اما ان انا ضحكت عليه فده محصلش ومخنتش ثقته فيا وانا روحتله الاول ووضحتله اللي حصل واعتذرتله عن سوء التفاهم ده وهو قبل اعتذاري واديته فرصه لحد بكره يقرر فيها لو عايز يحتفظ بشركته او يبعها فليه مطلق الحريه
ده بالنسبه للشغل ولحضرتك يا عم فتحي انا مصغرتكش قدام حد
ليلي: طيب ده الشغل وانا؟؟؟ ليه لعبت بيا كده؟ ؟
ادهم: ليلي انا ما لعبتش بيكي ابدا حبي ليكي حقيقي وواضح وضوح الشمس انا بحبك وانا زي ما انا مفيش اي شيئ فيا اتغير
انا ما غيرتش في طبيعتي او تصرفاتي معاكي انا كنت تلقائي جدا معاكي واكيد انتي لاحظتي كل اللي خبيته عنك هو اسمي وبس
انا كنت بطبيعتي بلبسي بعربيتي بشغلي كل حاجه كنت طبيعي فيها
حتي أكلي كمان مكدبتش عليكي ابدا
انتي كنتي بتفترضي اني بغلط او بنسي او بعيش عيشه مش بتاعتي ولا نسيتي
اول مره خرجنا فيها اخدتك فين؟ فاكره؟ المطعم اللي متعود اروحه وقولتلك انا باجي كتير ولما اخدتيني محل الكشري قلتلك دي اول مره ليا هنا كنت واضح في كل مره
انتي حبيتي تضحكي علي نفسك لانك من جواكي كنتي عارفه اني مختلف
انا عمري ما قلتلك اني فقير انتي افترضتي ده
الكدبه الوحيده اللي نطقتها لما قلتلك اني سواق وبس غير كده مكدبتش كدبه واحده
ليلي: في اول مره اتكلمت معاك فيها سالتك انت منهم قلتلي لأ مش منهم
ادهم: وانا فعلا مش منهم
عمري ما كنت بوشين ابدا ولا عمري حبيت المظاهر والمصالح انا مش من الطبقه اللي انتي بتكرهيها انا انسان عادي جدا وبسيط جدا غني اه وملياردير كمان بس عمري ما تعاملت مع حد بالاساس ده
عم حسين الراجل اللي انتي كنتي فاكراه مديري ده السواق بتاعي علي فكره بس انتي من خلال تعاملي معاه افتكرتيه مديري
انا زي ما انا مفيش حاجه فيا اتغيرت
ليلي: انا كنت تجربه جديده اه بت فقيره بياعه في محل طيب وليه لأ ما اجرب يمكن اتبسط واروح اعيش وسطهم واهو تسليه 24 ساعه ببلاش حد يطول
ادهم: تجربه جديده اه لكن تسليه لأ انا عمري ما اتسليت بيكي ابدا ابدا
ليلي: اه ولما سيبتني وبعدت عني علشان رفضت اخليك تمسك ايدي او تبوسني ده كان ايه؟
ادهم: ما كنش تسليه
خالد: اه كنت عايز تجرب هتعجبك البضاعه ولا لأ؟؟
ادهم: ده كان غلط اوك بس اللي ما تعرفيهوش عني ان انا قضيت معظم حياتي في امريكا وبالنسبالي موضوع انا ابوس البنت اللي انا مرتبط بيها ده شيئ عادي جدا ولما انتي رفضتي اتضايقت وقولت انك ما بتحبينيش بس بعدها اتكلمت مع عمي حسين وابويا وهما فهموني عادات وتقاليد هنا وان ده شيئ مش مقبول هنا فرجعتلك وتقبلت عاداتك وتقاليدك ومشيت معاكي فيها
ليلي: وبكده يعني المفروض اعذرك واقول اه عنده حق مكنش يعرف
ادهم: ليلي انا مش بقول ان انا ملاك انا ليا اخطائي وكتيره كمان بس مش ثمنها انك تبعدي عني
انا بحبك وده ثابت ما اتغيرش وعايز ارتبط بيكي ازعلي مني وخاصميني واعملي كل اللي انتي عايزاه عاقبيني بالطريقه اللي تعجبك وانا متقبل لكن ما تبعديش عني
ليلي: انا اسفه يا ادهم... انا حبيت انسان بسيط عادي زيي زيه --- كنت عايزه ابني حياتي معاه ونكبر واحده واحده
ادهم: انا زي ما انا ما اتغيرتش
ليلي: انت بتقول ايه؟ انت مش انت نهائي.. انت بتدخل مكان بيضربولك تعظيم سلام
انت عايش في وسط انا مش هعرف اشاركك فيه وبتتكلم نص كلامك ما بفهموش
ده كده وكنت مش بفهم مع انك كنت بتحاول تتكلم عربي علي قد ما تقدر امال لما تبقي علي طبيعتك
ادهم: مش هيا دي المشكله هتكلم علي طول عربي وهعلمك انتي انجليزي مش مشكله
ليلي: احنا مختلفين اسفه بس انا فقدت ثقتي فيك ومش هقدر ارجعها اسفه شوف واحده تناسبك وتليق بيك
ادهم: ليلي استني
عم فتحي: اعتقد ان احنا كده سمعناك ولا ايه؟
ادهم: عمي انا بحب ليلي وعايز اتجوزها وعمري ما لعبت بيها
عم فتحي: وانا مصدقك بس انت خبيت كيانك كله انت بتقول ما كدبتش ممكن تكون صح ما كدبتش غير كدبه واحده بس الكدبه دي بنت فوقها حاجات كتير
فيه فرق كبير قوي انك تكون سواق بسيط وزينا وانك تكون صاحب شركه وليك وزنك ده انا اهو نفسي مش عارف اتكلم معاك ما بالك هيا اللي المفروض انها تعيش معاك
انت شايف ان مفيش حاجه اتغيرت
لكن احنا شايفن انك في لحظه كنت واقف جنبنا واللحظه اللي وراها بقيت واقف فوق جبل عالي جدا لدرجه ان احنا اصلا مش شايفينك انت بتتكلم ازاي؟
روح يا ابني لحياتك وسيبنا لحياتنا
ادهم: بس يا عمي انا
عم فتحي: ارجوك ما تخلينيش اقفل بابي في وش اي حد بعد كده بيتي طول عمره مفتوح متخلينيش اقفله ارجوك
مشي ادهم وحس ان حياته واحلامه كلها بتتهد فوق راسه وهو بيتدفن تحتها
مش عارف يروح فين او يعمل ايه؟
مفيش في باله غير مكان واحد ممكن يروحه وفعلا راح ودق الباب واتفتحله
"""" كنت عارف انك هترجع بالمنظر ده ادخل """"
دخل والباب اتقفل "
"الحلقه التاسعه
مشي ادهم وحس ان حياته واحلامه كلها بتتهد فوق راسه وهو بيتدفن تحتها
مش عارف يروح فين او يعمل ايه؟
مفيش في باله غير مكان واحد ممكن يروحه وفعلا راح ودق الباب واتفتحله
"""" كنت عارف انك هترجع بالمنظر ده ادخل """"
دخل والباب اتقفل
حسين: عرفت الحقيقه صح؟
ادهم: مش عايز اسمع حاجه دلوقتي
حسين: طيب تعال ارتاح شويه وبعدين نتكلم
دخل ادهم والغريبه انه نام كتير جدا
يوم وري يوم بيعدي وكل محاولاته انه يكلم ليلي او يخليها تسامحه بتفشل
وطول الوقت قاعد عند عم حسين ورافض يكلم ابوه او يرد عليه هو او امه
حسين: وبعدين هتفضل كده لامتي؟
ادهم: لو وجودي مضايقك
قاطعه: انا مش قصدي كده وانت عارف كويس قصدي ايه؟
ادهم: مش عارف يا عمي حسين حاسس ان حياتي واقفه ومتجمده ومش عارف اعمل ايه؟
حسين: لسه بتحب ليلي؟
ادهم: ههههه لسه بحبها؟؟؟ وهو ده سوال برضه؟
حسين: طيب ولما انت بتحبها قاعد هنا بتعمل ايه؟
ادهم: ما تتكلم علي طول عندك حل قوله
حسين: قوم اتحرك من مكانك واحلق دقنك دي
وروح استرد حبيبتك
ادهم: هيا رافضه تكلمني
حسين: ومش هتكلمك ومش هتسامحك غير لما تحس انك بتحبها بجد هيا حاليا ثقتها فيك اتهزت انت لازم تسترد ثقتها الاول ولازم تحسسها بحبك ولازم تتاسف كتير لحد ما تزهقها وبعد ما تزهق تتاسف علي اسفك الكتير لحد ما هيا تبوس ايدك علشان تبطل تتاسف
ادهم: ما تقولي روح اتذللها احسن ولا ابوس رجلها!!!!
حسين: مش عجبك كلامي خليك حاطط ايدك علي خدك كده انت حر
ادهم فعلا قرر يروحلها راح البيت وهناك سال ام امل عليها وعرف انها نزلت الشغل
راحلها ودخلها الشغل واول ما شافه صاحب الشغل مرزوق
مرزوق: اي خدمه يا افندم
ادهم: لا متشكر
سابه وطلع لليلي فوق وهيا اول ما شافته
ليلي: افندم اي خدمه
ادهم: وبعدين هتفضلي كده لحد امتي؟
ليلي: تحب افرجك علي ايه؟
ادهم: ليلي وبعدين معاكي؟ لامتي هتفضلي زعلانه؟
مرزوق: ليلي هو ده بيضايقك؟؟
ادهم: ما تنزل تحت وخليك في حالك يا ريت
مرزوق: انت ازاي تكلمني كده؟ انت مين انت؟
ادهم: انا ابقي ادهم علي خطاب صاحب مجموعه الخطاب عرفتني ولا اعرفك اكتر؟
مرزوق: لا يا افندم اسف جدا اعتبر المحل كله تحت امرك بعد اذنك
بص لليلي لقاها بتبصله بطريقه غريبه كانه غريب عنها متعرفوش ابدا
ادهم: ليلي ما تبصليش كده
ليلي: امال ابصلك ازاي؟ انت مين انت؟ شايف مجرد ذكر اسمك بيعمل ايه؟ وتقولي انا زي ما انا
ادهم: انا فعلا زي ما انا مفيش حاجه اتغيرت فيا ابدا حبي ليكي زي ماهو
ليلي: ادهم فوق بقي ده مش حب دي في حالتك بيسموها نزوه وهتروح لحالها
ادهم: مش انتي اللي هتقرري نيابه عني اذا كان حب ولا نزوه
بعدك عني بيقتلني
طيب حاولي تديني فرصه اثبتلك فيها اني زي ما انا ما اتغيرتش حاولي تتكلمي معايا
ليلي: انت شكلك نفسه اختلف؟ مش عارفه اشوفك زي الاول
ادهم: انتي بتقولي كلام وخلاص ما صدقتي تلاقي حجه تبعدي بيها صح؟
انتي اصلا عمرك ما حبيتيني ابدا
عمرك ما حسستيني بحبك ابدا
ودلوقتي ما صدقتي تلاقي حجه تبعدي بيها عني صح
ياريت تكوني صريحه
ليلي: لو انت شايف كده انت حر لكن انا حبيتك من كل قلبي وكنت اغلي حاجه في حياتي
ادهم: والحب ما بينتهيش بين يوم وليله؟؟
ليلي: فعلا ما بينتهيش انا ادهم حبيبي لسه بحبه واعشقه لكن الشخص اللي واقف قدامي ده معرفوش اصلا
ادهم: بطلي استعباط بقي
ليلي: اللي عندي قلته بعد اذنك ورايا شغل
ادهم: لو بتحبيني مكنتيش هتسيبيني بعد اذنك
سابها ومشي مليان غيظ عايز يخنقها بايده
كل يوم بيرحلها او يستناها الصبح او اخر النهار وكل يوم نفس النتيجه
كان مستنيها اخر النهار واقف علي عربيته
ادهم: هاه لسه ما زهقتيش؟
ليلي: انت مش هتزهق بقي؟ قولتلك اللي بينا انتهي خلاص
ادهم: بالسهوله دي؟ ؟
ليلي: ايوه خلاص شوف حياتك بقي بعيد عني
ادهم: بطلتي تحبيني؟؟
ليلي: ايوه بطلت خلاص تخطيتك وكملت حياتي وانصحك تعمل انت كمان زي وياريت بقي مش كل يوم اشوفك
ادهم: يعني لو انا مت مثلا مش هتزعلي؟؟
ليلي: لا مش هزعل مش هتفرق معايا اصلا
ليلي كانت متغاظه منه جدا وعايزه تضايقه باي طريقه
قربت منه قوي ووقفت قصاده واتكلمت براحه وبهدوء
ليلي: عارف انا لو شفتك عامل حادثه بعربيتك دي والعربيه مقلوبه وانت جواها هعدي من جنبك واكمل طريقي ولاحتي هقف ابصلك
ادهم: ياااه دي انت كارهاني قوي؟؟
ليلي: فوق ما تتخيل
ادهم: طيب قولي يارب
ليلي: يارب بس علي ايه؟
ادهم: اعمل حادثه وتنولي اللي بتتمنيه وربنا ينتقملك مني علشان _____ مش عارف صراحه علشان ايه؟
مش عارف انا زعلتك في ايه اصلا؟ انا حبيتك باخلاص وبجد وحافظت علي حبك ده وصنته خبيت عليكي حقيقتي؟؟؟ اه خبيتها؟؟؟ عارفه ليه؟؟؟ لاني كل يوم بيترمي تحت رجليا بنات كتير
اللي عاجبها شكلي واللي عاجبها فلوسي واللي عايز تتمنظر واللي عايز استيل
ومفيش واحده بتحاول تعرفني كانسان
كنت زهقان وقرفان من الغش والنفاق والاقنعه
كنت عايز اعرف حد نظيف حد صريح وانتي ظهرتي ساعتها قدامي
ملاك جميل وكنت عايز اقرب منك ولقيتك بتقولي بتكرهي الاغنيه كلهم وانا عايز حد يبصلي انا كانسان عادي فخبيت عليكي
ارتكبت جريمه؟؟؟ كنت عايزك تعرفيني انا؟؟ وتحبيني انا؟؟؟ ما تحبيش اسمي او سمعتي او مركزي!! وده اللي حصل عرفتيني وحبيتيني وانا بادلتك الحب ده
متخيلتش ابدا انك هتسيبيني لو عرفتي حقيقتي
قوليلي غلطت في ايه؟ ايه مشكلتك دلوقتي؟
مكنتش عايزك تعرفي اني غني وتعامليني علي الاساس ده فين الغلط؟؟؟
انا مش قادر افهم انتي زعلانه ليه او بتسيبيني ليه؟
وملهاش غير تفسير واحد عندي
انك ما حبتينش اصلا
الباقي كله حجج وهميه
لانه لو حبيتيني كنتي اه هتزعلي بس مش تسيبيني
علي العموم اللي عندي قلته ومش هتكلم تاني
اسف اني دخلت حياتك بس خلاص مش هضايقك تاني بعد اذنك
سابها ومشي وهيا فضلت واقفه مكانها كتير
معقوله خلاص كده؟؟؟ مش هتشوفه تاني؟ ولا هتضايقه تاني؟ ولا هتشوف ضحكته تاني؟ طيب ازاي؟ دي بتتنفس بحبه؟
ازاي ضيعته كده من بين ايديها؟؟
روحت بيتها وحبست نفسها بعيد عن الكل
خالد دخلها
خالد: وبعدين لحد امتي؟
ليلي: ادهم جالي النهارده
خالد: وبعدين؟
ليلي: قالي ان دي اخر مره اشوفه فيها واتهمني اني عمري ما حبيته! ازاي يتهمني بحاجه زي دي ازاي؟؟؟
فضلت تعيط وتعيط خالد قرب منها وحضنها
خالد: ولما انتي بتحبيه فعلا ما سامحتيهوش ليه؟
ليلي: اسامحه علي طول كده؟ ما تخيلتش انه هيزهق بسرعه ويسيبني؟
خالد: ليلي انتي اللي سيبتيه مش هو
هو الصراحه بيحبك وده كان باين في الاول وفي الاخر
شوفي جالك كام مره هنا والشغل واترجانا كلنا واتنازل كتير عن كبرياؤه وحاول يصالحك وانتي رفضتي فده ملوش غير معني واحد انك مش عايزاه
ليلي: انت بتقول ايه خالد انا بحبه
خالد: طيب ولما بتحبيه بتبعديه ليه؟ ازعلي ماشي! عاقبيه ماشي! اتقلي عليه! لكن انتي كنتي بتقوليله مش عيزاك قولا وفعلا
وبناءا عليه كلنا افترضنا انك خلاص مش عايزاه وعلشان كده كلنا قفلنا الباب في وشه
ليلي: لا طبعا ده رايك انت بس
خرجت وسالتهم كلهم ابوها ومحمد وماجده وكلهم ليهم نفس الراي
انها لو بتحبه كانت سامحته
الدنيا لفت بيها _ معقوله هيا خسرت ادهم بغبائها ده؟؟؟
تاني يوم نزلت الشغل وقلبها مقبوض مش عارفه ليه
عنيها علي الباب علشان لو لمحت ادهم تروحله
وكل شويه تخرج باي حجه تروح تشوف عربيته راكنه قدام الشركه ولا لأ؟
وهيا قدام الشركه لقت دربكه كده فوقفت تشوف في ايه؟
لقت ابو ادهم نازل وحد مسنده وبيركبوه العربيه ومشي الفضول كان هيقتلها
راحت وسالت موظف
ليلي: هو في ايه؟ وعلي بيه ماله مسندينه ليه؟
الموظف: اول ما عرف ان ابنه عمل حادثه وقع من طوله ويدوب فوقوه علشان يروحله
ليلي الدنيا لفت بيها وافتكرت ادهم وهو بيقولها قولي يارب وهيا قالت
واهو ربنا استجاب لها واهو عمل حادثه
الموظف: يا انسه يا انسه انتي كويسه؟؟
فاقت لقت الموظف ساندها وناس حواليها
ليلي: هو فين؟
الموظف: مين هو اللي فين؟
ليلي: ادهم فين ادهم دلوقتي؟
الموظف: في المستشفي اكيد
ليلي: اي مستشفي،؟
الموظف: معرفش ممكن تسالي حد فوق يقولك
طلعت ليلي لحد مكتبه لقته مفتوح وفاضي
دموعها نزلت وهيا بتتخيله قاعد علي كرسيه وتتخيل نفسها معاه بتضحك وتتكلم وتقعد علي رجليه وتلف ايديها حوالين رقبته
معقوله هتعيش من هنا ورايح في الاحلام وبس؟؟؟ معقوله حبيبها يروح من غير ما يعرف انها بتعشقه اكتر من روحها؟؟
::: بتعملي ايه هنا؟ ؟
فاقت علي صوت السكرتير
ليلي: ادهم فين؟
السكرتير: وانتي تبقي مين؟
ليلي: انا ولا حد بس ارجوك قولي
السكرتير: اه افتكرتك انتي اللي جيتي هنا ودخلتي عليهم وشتمتي البشمهندس قدام الكل صح؟
ليلي: ارجوك قولي هو فين؟
السكرتير: انتي عارفه انه من ساعتها مجاش الشغل انتي حبيبته صح؟
ليلي: ايوه قولي هو فين ارجوك
السكرتير: هقولك هو انا اقدر ما اقولكيش اذا كان ابوه وقاطعه علشان زعلك امال انا هيعمل فيا ايه؟ اتفضلي العنوان اهو
كتبه في ورقه وعطاهولها وهيا اخدته وجريت علي المستشفي
وصلت وسالت عليه وعرفت مكانه لقت عم حسين واقف قدام اوضته
ليلي: مش دي اوضه ادهم صح؟
عم حسين: ايوه يا بنتي هيا
ليلي: ينفع اشوفه؟
عم حسين: دي العنايه المركزه ومانعين اي حد يدخله يدوب ابوه خلوه يبص بس عليه وخرج من عنده دخلوه اوضه يرتاح فيها لانه تعب هو كمان
ليلي: ادهم حالته ايه؟
عم حسين: والله ما اعرف يا بنتي انا اهو يدوب عرفت وجيت هحاول اعرف اي اخبار استني ثواني
عم حسين سابها ومشي ودخل لادهم اللي كان قاعد مع ابوه
علي: خير يا حسين في حاجه؟
حسين: خير ( بص لادهم)
ادهم: بتبصلي ليه فيه ايه؟
حسين: ليلي بره
ادهم: دخلها بسرعه
حسين: طيب اتعدلت ليه ارقد مكانك دي فرصتك ترجعها انا تقريبا فهمتها ان حالتك متأخرة جدا مش كام كسر وبس
ادهم: كام كسر؟؟ انا عندي 3 ضلوع مكسوره ودراعي اتخلع من مكانه وتمزق في تقريبا كل الاربطه في جسمي محسسني اني يدوب مخبوط
حسين: ماشي بس لو حالتك مش خطيره هتطمن عليك وتمشي لكن لو حالتك خطيره هتفضل جنبك وهتخاف ساعتها تبعد عنك وساعتها هتحس بقيمتك وهتعرف انها متقدرش تستغني عنك وبكده ترجعوا لبعض
هاه قولت ايه؟
ادهم: انت عايزني اكدب عليها تاني؟
حسين: مش هتكدب
قرب منه وخبطه في صدره وادهم صرخ وتأوه جامد
حسين: بس خليك كده وحط ده علي وشك
حط جهاز التنفس عليه
حسين: سيبها هيا تستنج حالتك وحاول ما تتكلمش كتير خلاص انا هدخلها
خرج حسين وجاب ليلي واول ما دخلت شافت ابوه مركب محلول وراقد علي كنبه جنب ادهم
وادهم نايم واجهزه كتير واصلاله عيطت وبصت لابوه
ليلي: حضرتك كويس؟
علي: ايوه يا بنتي انا كويس ضغطي بس علي شويه والحمد لله دلوقتي
ليلي: هو حالته ايه؟ وايه اللي حصل؟
علي: والله مااعرف هو عمل الحادثه ازاي لسه ما فاقش واتكلمت معاه اما حالته فالحمد لله
عنده حوالي 3 اضلاع مكسوره ودراعه كمان وتقريبا ارتجاج وده اكتر حاجه خايفين منها
خايفين ليكون عنده نزيف داخلي فاول ما يفوق هيعملوله اشعه علي مخه علشان نطمن وعلي جسمه برضه
ليلي عيطت جامد وقربت من ادهم وحطت ايديها علي راسه وقربت منه وهمست في ودنه
ليلي: انا اسفه __ اسفه علي كل كلمه نطقتها __ انا كدبت لما قولتلك اني تخطيتك انا بعشقك بعشقك اكتر من اي حد واي حاجه في الدنيا دي __ انت اهم شيئ في حياتي __ ارجوك اوعي تبعد عني اوعي تسيبني لوحدي
عيطت وسندت علي صدره
ادهم هنا مقدرش يفضل ثابت فرفع ايده السليمه وحطها علي راسها واول ما حست بيه رفعت راسها وبصتله
ليلي: انت كويس؟
ادهم حاول يتكلم بس ما عرفش من الجهاز اللي علي بوقه فحاول يشيله
ليلي: لا لا ارجوك خليه ما تحاولش تتعب نفسك ارتاح دلوقتي وانا هفضل جنبك.
ادهم ابتسم وهنا دخلت الممرضه
الممرضه: الحمد لله انك فوقت معاد الحقن
ادهم حاول يوفقها بس معرفش لان الحقن فيها مهدئ وهتخليه ينام وهو حاليا ليلي وحشاه ومش عايز ينام نهائي
بس الممرضه اديته الحقن وبدا مفعولها مسك ايد ليلي وهو بيقاوم النوم بالعافيه
ليلي: ما تخافش ارتاح وانا هفضل جنبك ما تخافش
ادهم في دقايق كان غايب عن الوعي وفعلا نام
ليلي فضلت جنبه شويه بس خالد اتصل بيها لانها اتاخرت
كلمته ورجعت بعد ما قالتله علي سبب تاخيرها فقالها انه هيجيلها ياخدها
علي: خير في حاجه؟
ليلي: لا خير بس خالد هيجيلي يروحني هحاول الصبح ان شاءالله اجيله
علي: روحي انتي وانا هقوله لما يصحي انك اضطريتي تروحي بعدين احسن انك تروحي قبل ما مامته تيجي لانها هتعمل دبكه لانه مقالهاش اي حاجه عنك وهتقلب الدنيا لو عرفت ان انا عارف وهيا لا
ليلي ابتسمت: خلاص بس ينفع اتصل بيه؟
علي: تليفونه تقريبا اتكسر خدي رقمي كلميني عليه
روحت ليلي وهيا مشغوله عليه واول ما دخلت البيت وقالتلهم فاستنتجوا انهم كده رجعوا لبعض لان كتير بتبقي المصايب سبب للصلح
طلع النهار وليلي راحت لادهم اللي كان مستنيها علي نار واول ما دخلت
ادهم: وعدتيني هتفضلي
ليلي: غصب عني خالد جالي واخدني هعمل ايه يعني!!
ادهم: يبقي تعوضيني وتفضلي جنبي النهار كله
ليلي: والشغل؟
ادهم: سيبيه بقي انا اول ما هطلع من هنا هتجوزك مفيش شغل بقي
ليلي: ومين قالك اني هسيب الشغل؟؟ او اني موافقه اتجوزك اصلا؟
ادهم حاول يتعدل بس مقدرش
ادهم: قولي انك بتهزري صح؟ ااااه
ليلي جريت عليه وسندته لحد ما رقد تاني
ليلي: ما تتعبش نفسك ارجوك خليك مرتاح
ادهم: عايزاني ارتاح ريحيني انتي __ انتي اكتر حد تاعبني ريحيني وريحي قلبي
ليلي: هو انت محتاج ايه اكتر من ان انا جنبك؟
ادهم: محتاج وعد انك هتفضلي جنبي العمر كله مش دلوقتي بس
ليلي: هو انا مش سبق ووعدتك الوعد ده؟
ادهم: وهو مش انتي اللي قلتيلي مش عايزه اشوفك تاني وقولتي انك نسيتيني؟؟ نسيتي قولتي ايه تاني؟
ليلي: ياريتني كنت موت قبل ما انطقها
ادهم حط ايده علي بوقها علشان ما تكملش
ادهم :، ما تقوليش كده، طيب انا اعمل ايه من غيرك؟ معرفش اعيش في الدنيا دي لو انتي مش فيها فاهمه؟ سامحيني يا ليلي مكنش قصدي اني اكدب عليكي _ كنت عايزك تحبيني انا وبس من غير اي اعتبارات تانيه
ليلي قعدت قصاده وقريبه من علي السرير ومدت ايدها علي وشه بحب
ليلي: وانا فعلا بحبك انت ومن غير اي اعتبارات تانيه ومكنش المفروض تصدقني لما قلت اني مش بحبك وبعدين لما انت زعلت مش قلتلي كل يوم كنت مع واحده؟ اهي دي زيها بالظبط _ بحبك انت وبس باي شكل باي صوره المهم اني بحبك
ادهم مسك ايدها اللي علي وشه وحطها علي شفايفه وباسها وهيا حست انه باس قلبها مش ايدها لان قلبها كان عايز يخرج من مكانه
ادهم: قربي مني اكتر
شدها عليها وهيا استلمت له وقربت منه فضمها علي صدره لانه محتاجها جدا،، محتاج يطمن قلبه انها خلاص معاه ومش هتبعد تاني
ادهم: ليلي
ليلي: هاه
ادهم: لاحظي اني عندي 3 ضلوع مكسرين
ليلي: وبعدين؟
ادهم: متريحيش قوي
ليلي ضحكت وجت تبعد فشدها عليه
ادهم: ما تبعديش عني
ليلي شبكت ايديها حوالين رقبته وبصتله
ليلي: حدد ابعد ولا اقرب؟؟
ادهم: وهيا دي محتاجه سؤال؟؟؟
ولقي نفسه بيقرب منها عايز يوصل لحاجه سبق واتمنعت منه بس حب يجرب
قرب وهو بيبصلها علشان يقري رد فعلها
كل امنيته انه يطبع اسمه علي شفايفها وبس
ويدوب شفايفه هتلمسها
"""""" هو ايه اللي بيحصل هنا ده؟ """""""
"الحلقة العاشرة
ادهم لقي نفسه بيقرب منها عايز يوصل لحاجه سبق واتمنعت منه بس حب يجرب
قرب وهو بيبصلها علشان يقري رد فعلها
كل امنيته انه يطبع اسمه علي شفايفها وبس
ويدوب شفايفه هتلمسها
"""""" هو ايه اللي بيحصل هنا ده؟ """"""
ليلي بعدت ووقفت تبص للي دخلت دي وبتبصلها من فوق لتحت
ادهم: اتفضلي يا ماما وتعالي اعرفك بليلي
ريهام: وتطلع مين ليلي دي؟
ادهم: انتي شايفه ايه؟
ريهام: انا مش شايفه حاجه
ادهم: طيب اعرفك انا __ ليلي دي امي
ماما دي ليلي مرات ابنك المستقبليه
ليلي ابتسمت بس امه لأ
ريهام: افندم؟
ادهم: اللي سمعتيه
هنا ابوه كمان دخل واول ما شاف ليلي
علي: ازيك يا قمر عامله ايه؟ كويس انك جيتي ده قرفني امبارح اخر قرف __ ( بص لمراته) شوفتي مر ات ابنك المستقبليه قمر ازاي؟ اول مره ادهم يعرف ينقي صح؟
ريهام: انت كمان عارف؟؟ وانا ايه؟ اخر من يعلم؟؟ ولا مليش قيمه اصلا علشان تعرفوني؟
ادهم: ماما استني
وهيا خارجه
ريهام: اوعي تنسي تعزمني علي الفرح؟؟
قالتها وخرجت ورزعت الباب وراها
ادهم حاول يقوم وراها بس مقدرش
علي: اهدي انت انا هكلمها ( بص لليلي) مش قلتلك هتقلب الدنيا لو عرفت اني عارف! وانا مش كنت اعمل نفسي مش عارفك ايه غبائي ده؟
ادهم: لا انت مغلطتش هيا المفروض تقتنع اني معدتش صغير هتختارلي كل حاجه المهم روح كلمها قبل ما تمشي
ليلي: طيب همشي انا وهكلمك تاني
ادهم: انتي قلتي هتفضلي جنبي
ليلي: وفعلا هفضل بس حاليا مامتك زعلانه منك وانتو محتاجين تقعدوا مع بعض لوحدكم الاول، وجودي مش هيساعد دلوقتي وبعدين ورايا شغل اصلا
ادهم: واحنا قولنا ايه علي الشغل!
ليلي: حاضر بس لازم اقول لمرزوق الاول واديله فرصه يشوف غيري ماينفعش كده اقوله انا مشيت وبعدين دي عشره بينا
ابو ادهم ابتسم من خوفها علي مصلحه صاحب الشغل علي الرغم من اختلافاتهم
مشيت ليلي وريهام رجعت لابنها بعد ماعرفت انها مشيت
ادهم: ليه اتصرفتي كده؟ ايه اعتراضك عليها انتي حتي ما تعرفيهاش؟؟
ريهام: اولا باين عليها انها local قوي وبعدين انا اخر من يعلم!؟ ( بصت لجوزها) وطبعا سيادتك عارف ومقولتليش؟
علي: اولا انا مش عارف من زمان وبعدين هو حر يقولك او لا دي حاجه ترجعله
ادهم: ايه يا عم خليك محضر خير الحكايه اني ملقتش وقت مناسب وبعدين احنا علاقتنا مش طبيعيه مش اتنين وتعرفو علي بعض
ريهام: يعني ايه!؟
علي: يعني ده كان حوار طويل كده وعلشان كده ابنك ساب البيت الفتره اللي فاتت وساب الشغل
ريهام: مش فاهمه حاجه
ادهم: هحكيلك بالتفصيل
حكالها ادهم الحكايه من اولها لاخرها وهيا ساكته مش بتعلق نهائي
ريهام: خلصت كل كلامك؟
ادهم: ايوه هاه!
ريهام: انت ابني الوحيد وريث شركات الخطاب ودي من اكبر شركات في الشرق الاوسط وتعتبر ولي العهد ومتعلم في اكبر جامعات في امريكا وواخد دكتوراه وفي الاخر عايز ترتبط بدي؟!؟!
ادهم: ايه علاقه ده كله بدي؟ وبعدين مالها دي؟ ايه اللي مش عجبك فيها؟
ريهام: ايه؟ انت اكيد اتجننت وهيا فيها ايه يعجبك؟ بنت بياعه في محل معرفش ساكنه فين وابوها طباخ واخوها واحد سواق وواحد معرفش ايه وناس كلهم local وتقولي ايه اللي مش عاجبك؟ انت مش عارف انت مين؟
ادهم: بقولك ايه علشان بس نبقي واضحين كده من الاول ليلي انا بحبها شحاته فقيره! What ever هيا ايه مش فارق معايا ؛ وبعدين انا هتجوزها اول ما اخرج من هنا بغض النظر انتو هتقولو ايه انا بعرفكم من باب العلم بالشيئ مش اكتر
ريهام: يعني ايه ان شاءالله هتتجوزها غصب عني؟
ادهم: شوفي يا ست الكل انتي قدامك طريقين يا اما توافقي علي اختياري وتجهزي لابنك الوحيد فرح ما حصلش قبل كده وتفرحي انه هيتجوز؟! يا اما ترفضي وساعتها هعملها انا فرح علي قدنا وهتجوزها واخدها واسافر ومش هرجع مصر تاني فاختاري انتي
ريهام: انت بتهددني ولا بتلوي دراعي طيب انا مش موافقه اتفضل روح اتجوزها من غيري
ادهم :خلاص براحتك ده اختيارك
مسك تليفونه واتصل بمحمود سكرتيره الخاص
ادهم: ايوه يا محمود ________ الحمدلله انا كويس ________ الامر لله بص انا عايزك تشوفلي شقه كويسه وفي مكان كويس وفي اسرع وقت
محمود: شقه لمين بالظبط علشان اقدر احدد مواصفاتها؟؟
ادهم: شقه ليا انا هتجوز فيها فتختار اعلي مواصفات واعلي مستوي وبسرعه
محمود: ان شاءالله يا فندم ومبروك مقدما
ادهم: الله يبارك فيك ومتشكر يا محمود
ريهام: وكده ايه؟ المفروض بقي ان انا احن واعيط واقول ابني حبيبي وافتح للمتشرده دي بيتي صح؟
ادهم: اولا ما اسمهاش متشرده دي هتبقي مراتي
ثانيا لو هتفضلي تغلطي فيها كده كتير هتخسريني انا نهائي لاني مش هسمح لحد يغلط في مراتي من غير سبب مهما يكون الشخص ده
ثالثا لا يا ستي محدش طلب منك تحني او تعيطي او تفتحي بيتك لحد
حضرتك اختارتي وزي ما قلتلك حضرتك حره في اختيارك ومحدش هيطلب منك حاجه
ريهام اخدت بعضها ومشيت
ادهم: وسيادتك واقف متفرج مقدرتش تنطق بحرف؟؟
علي: لا ارجوك يا ادهم ما تدخلنيش في خلافاتك مع مامتك كفايه الخلافات اللي بينا
ادهم: اهو ده لغز في حد ذاته من زمان قوي وانا بشوفكم مختلفين ومش عارف ليه؟
علي: احنا عمرنا ما اختلفنا او اتخانقنا قدامك
ادهم: اهو دي مشكلتكم الاب والام ديما بيفتكروا انهم لما ما يتخانقوش قدام عيالهم ويتخانقوا في اوضتهم العيال مش هتعرف!!!
انتو اه ما بتتخانقوش قدامي بس بتتخانقوا في اوضتكم وكتير جدا
وغير ان صوتكم عالي وبسمعكم بيبان قوي عليكم بعدها وانتو بتتجنبوا بعض
انتو كنتو فاكرين ان انا عيل وصغير ومش واخد بالي بس لأ انا كنت واخد بالي كويس قوي انكم عمركم ما هزرتو مثلا او بتضحكوا او تخرجوا مع بعض تسهروا الا اذا كانت مناسبه او شغل تصدق انا عمري ما شفتك بتبوسها او بتحضنها ابدا او اي حاجه تدل علي الحب
علي: مش علشان ما بعملش الحاجات دي قدامك يبقي
قاطعه: خلي بالك ان انا معدتش العيل الصغير اللي هيتضحك عليه بكلمتين
كنت صغير واشوف مثلا في النادي او في حفله او في اي مكان اي واحد ومراته ماسك ايديها او حط ايده علي كتفها او بيرقصوا مع بعض او بيتكلموا بهمس حاجات كتيره مش عارف اقولها بس بيبان
بيبان اذا كان في حب او مفقود وسواء عيل صغير او كبير بيبان
وانتو حاولتو تخبوا ده عليا وانا احترمت خصوصياتكم وما رضيتش اتطفل عليكم
على: ادهم انت ابننا وانك تسال ده مش تطفل ابدا
ادهم: طيب انت بتكرهوا بعض ليه؟
علي: احنا ما بنكرهش بعض
ادهم: بس ما بتحبوش بعض
انتو علاقتكم مبنيه علي الاحترام ومبدأ كل واحد في حاله
على: ده مش صح احنا __
قاطعه ادهم: مش قلتلك مبحبش اتطفل
على: يا ادهم
ادهم: انت مش مستعد تجاوب براحتك
بس حاليا انا معنديش استعداد اعيش حياتكم
حياه خاليه من الدفا والحب
حياه قايمه علي الاحترام وبس والمظاهر
والمهم شكلنا قدام الناس
انا بحب ليلي وعايز اعيش معاها بغض النظر بقي عن اي اعتبارات تانيه
ومعنديش استعداد اكمل حياتي ببرود واراعي شكلي ايه ومظهري ايه
فياريت تفهم ده لمراتك ان انا غيركم
ومش هسمح لحد يدخل في حياتي الخاصه
وزي ما انا ما بتدخلش في حياتكم فياريت انتو كمان
وسوري بس صدقني لو هختار ما بينكم هختار حياتي معاها
اتفضل بقي الحق مراتك واتكلم معاها
قفل ادهم الكلام مع ابوه اللي مشي وراح لمراته وهيا رفضت تتكلم نهائي حتي مع ابوه
تاني يوه الصبح وريهام وعلي بيفطروا بصمت كالعاده
على: هروح اجيب ادهم من المستشفي
ريهام: الدكتور كتبله خروج خلاص؟
علي: ايوه واحتمال كبير ليلي واهلها يجوا هنا يزوروه
ريهام: افندم؟ الناس دي مش هتدخل بيتي ابدا
على: يبقي ابنك هو اللي هيخرج
ريهام: هو حر
على: انتي بجد مستعده تخسريه علشان تمشي كلامك؟؟؟
ريهام: مش هخسره هو هيفوق
علي: يفوق من ايه؟ انتي فكراه سكران ولا مسطول علشان يفوق؟؟؟
ريهام: لو سمحت نبرتك في الكلام وصوتك العالي مش عاجبني
علي: ان شاله ما عجبك!! ابنك بيحب
وبيحب واحده بتحبه وبتخاف عليه
انتي عيزاه يتجوز واحده تليق بسيادتك علشان ترضي غرورك قدام الناس وخلاص
وفي داهيه بقي مشاعره وسعادته
ريهام: انا ما قلتش كده
يختار واحده تليق بينا
علي: القلب اللي بيختار ___ بس صح ده كلام انتي متعرفيهوش ___ انتي اصلا معندكيش قلب تحبي بيه!!! علي العموم ابنك هيتجوز ليلي وافقتي او رفضتي ده مش هيفرق معاه
ريهام: طبعا ما اكيد سيادتك مشجعه
علي العموم انا هعرف ازاي اوقفه
ادهم النهار طلع واول ما فتح عنيه لقي ليلي جنبه فابتسم
ادهم: مصحتينيش ليه اول ما جيتي؟
ليلي: اولا شكلك نايم مرتاح مهنش عليا اصحيك
مسك ايدها وباسها
ادهم: وثانيا؟؟
ليلي: وثانيا كنت عايزه اتفرج عليك وانت نايم
ادهم: اممم علي فكره انتي طماعه جدا
بتعملي حاجات كتيره لنفسك وتستكتريها عليا
ليلي: انا؟ ابدا بس هيا الظروف بتيجي كده
ادهم: علي العموم كلها كام يوم واتجوز وهاخد حقي تالت ومتلت وهطلع عليكي القديم والجديد
ليلي: لا والنبي والنبي ده انا غلبانه
ضحكوا هما الاتنين
فضلت قاعده معاه بيضحكوا ويهزروا وادهم زي ما وعدها ما بيحاولش يتخطي اي حدود معاها
ابوه اخيرا وصل شافهم بيضحكوا ويتهامسوا وفعلا زي ما ابنه قال الحب بيبان
وهو هيضحك علي نفسه ليه هو ومراته عمر ما الحب دق بابهم ابدا
يبقي لازم يساعد ابنه يعيش الحياه اللي هو اتحرم منها
علي: صباح الخير علي احلي اتنين في الدنيا
ليلي قامت من جنب ادهم مكسوفه
ادهم رد: صباح النور
علي: ليلي ما تقوميش من جنب ادهم ( قرب منهاومسك ايدها) خليكي ديما جنبه وماسكه ايده وما تسمحيش لحد يدخل بينكم او يفرقكم عن بعض
ليلي: ان شاءالله هفضل علي طول جنبه
علي: مستعد للخروج يا باشمهندس ولا ايه؟
ادهم: اكيد طبعا
ليلي: انت هتخرج النهارده!! بس انت لسه تعبان؟
ادهم: لا كفايه كده الباقي في البيت
وبعدين المفروض تتبسطي ان انا خارج!!!
ليلي: اكيد طبعا مبسوطه بس النهارده كان ابويا واخواتي والشارع كله تقريبا كانو هيجولك يزوروك
على: طيب اهلا وسهلا بيكم في البيت
ليلي: ايه! نيجي البيت؟!؟!
على: ايوه تيجو البيت تزوروه وبعدين خليكي تشوفيه في الواقع ولا ايه؟
ادهم: يا اما تكون محضر خير يا تمشي من هنا
على: هو انا اتكلمت اصلا بعزم حبيبتك تزورك في البيت هو في خير اكتر من كده!!
ليلي: هو انت ومامتك ايه النظام؟؟؟
ادهم: مالكيش دعوه بمامي خالص
ليلي: يعني ايه ماليش دعوه بيها؟؟؟
علي: يعني انتي هتتجوزي ادهم وبس صح؟ يبقي تهتمي بادهم وبس لا ليكي دعوه بامه ولا ابوه فهمتنيني يا بنتي!؟
ليلي: تبقي هيا مازالت معترضه؟
ادهم: تفرق معاكي في ايه؟
ليلي: دي مامتك مش واحده غريبه هتقولي تجاهليها
ادهم: طيب هيا معترضه علي جوازنا هاه المفروض نعمل ايه؟ نسيب بعض؟؟
ليلي: مش قصدي كده بس المفروض نقنعها مش تقولي تجاهليها
ادهم: انتي تجاهليها حاليا لكن انا هفضل وراها ما تقلقيش لكن حاليا بس بقولك مالكيش دعوه بيها سيبيهالي
ليلي: طيب والنهارده لو احنا جينا وهيا؟؟؟؟؟
ادهم: تقابلكم وحش قصدك؟
ليلي: ايوه وساعتها اخواتي وخصوصا خالد مش هيوافق اصلا علي ارتباطنا
ادهم: لا ما تقلقيش سيبيلي انا الموضوع ده وامي ما تقدرش تقابلكم وحش هيا اخرها هترفض تقابلكم او تخرج وبس
على: ليلي ما تشيليش انتي هم حاجه سيبيلنا احنا موضوع اهلك ده واهلا بيكي مره تانيه في البيت هستناكي بنفسي
المهم اسيبكم انا واروح اجهز ورق خروجك وادفع الفاتوره وانتي يا ليلي معلش بقي هتعبك واقولك ساعديه يلم حاجته ويجهز
ليلي: لا يا عمي ولا تعب ولا حاجه
على: طيب خلي بالك منه
ليلي: في عنيا يا عمي
ادهم: يا عم اتكل انت بس
علي: ماشي هتكل انا
سابهم وخرج وهما بصوا لبعض نظره طويله
ليلي: وبعدين؟
ادهم: وبعدين ايه بالظبط؟
ليلي: مامتك؟
ادهم: ليلي انا مش عايز مشاكل بينا تاني ارجوكي
ليلي: مفيش مشاكل بينا دي قصادنا مش بينا
ادهم: دلوقتي قصادنا وشويه شويه هتتحول بينا اوك علشان بس نبقي واضحين وما نخبيش حاجه عن بعض انا حاليا بدور علي شقه نتجوز فيها
ليلي: يعني ايه مش فاهمه؟
ادهم: يعني المفروض اني لما اتجوز افضل معاهم في البيت حاليا بقولك بدور علي شقه بعيد عنهم
يعني انا مستعد لاي شيئ السؤال هنا بقي انتي مستعده؟
ليلي: انا العيشه معاهم او بعيد مش هتفرق معايا بس مش عايزاك تقاطع اهلك
ادهم: هو مين جاب سيره المقاطعه دلوقتي!
ليلي: امال لما تسيب البيت وتمشي دي اسمها ايه؟
ادهم: اسمها مختلفين علي حاجه والمثل بيقول الاختلاف في الرأي لايفسد للود قضيه
ليلي: يا حبيبي ده مش اختلاف في الرأي
الاختلاف ده تختلفو في وجهه نظر
تختلف مع حد في الشغل
لكن دي امك ومن حقها تختار معاك
ادهم: تختار معايا مش تختارلي وبعدين انا وهيا مختلفين تماما فازواقنا مش واحده
ليلي خلاصه الكلام علشان انا ما بحبش الرغي الكتير في نفس النقطه
ليلي: طيب قول الخلاصه
ادهم: علي افتراض ان امي فضلت معترضه انا معنديش ادني مانع اتجوزك حتي وهيا معترضه انتي ايه بقي؟
ليلي: ادهم انا مش عايزاك
قاطعها: ليلي جاوبي علي السؤال هتتجوزيني في اي حال من الاحوال ولا لأ؟ اه ولا لأ؟
دي الاجابه اللي عايز اسمعها
ليلي: اه هتجوزك
ادهم: بس مش عايز رغي بقي تاني ( جه يقف) هتساعديني في ام الليله دي ولا هتتفرجي؟ ولا هو كلام وبس
ليلي: كلام ايه؟
ادهم: مش لسه قايله لابويا هحطه في عنيا ولا ايه بالظبط؟
ليلي: لا ده كلام لحمايا الواقع مختلف
ادهم: بقي كده طيب!!!! ارن انا الجرس وهلاقي طابور ممرضات واقفين يتمنوا بس
قربت منه ومسكته من هدومه ببلطجه شويه
ليلي: ترن ايه يا حلو انت؟؟؟ رن كده وريني طابور الممرضات وهتشوف هعمل فيك وفيهم ايه؟
ادهم: لا وعلي ايه الطيب احسن يا عم الحج
ليلي: ايوه كده اتعدل
ادهم: معدول وحياتك بس حاليا عايز اقف ممكن ولا ايه؟
ليلي: انت ايدك المكسوره مش رجلك ما تقف لوحدك
ادهم: اولا كتفي مخلوع مش ايدي مكسوره وبعدين هقلع قدامك حاليا وارويكي شكل جسمي علشان بس تشوفي بعينك وتقدري
ليلي: لا من غير قلع انا مصدقاك
ادهم: ههههه يا جبانه بس كده كده لازم اغير هدوم المستشفي دي والبس هدومي يا حلوه
يالا يا شاطره هاتيها من الدولاب وتعالي لبسيني
ليلي: اجيبها اه البس لا
ادهم: هاتيها بس وتعالي ساعديني بس اقف واديني ظهرك
ليلي: ماشي
جابتله الهدوم وحاولت تساعده علي قد ما بتقدر تبصله
لبس بنطلونه بالعافيه لوحده والقميص
ادهم: بصي انا لبست مطلوب منك بقي تقفلي الزراير دي وتلبسيني حزام البنطلون وتقفليه
ليلي: انت بتهرج صح، ؟
ادهم: لا طبعا مش هعرف اقفل بايد واحده اصلا انا لبست دراع واحد وانتي سايبلك الدراع المخلوع تلبسيه انتي
ليلي: البسه ازاي بقي؟
ادهم: اتصرفي امال هتبقي مراتي اونطه ولا ايه؟ لما ابسط حاجه مش عارفه تعمليها؟
ليلي اتغاظت منه هيا مكسوفه مش حكايه ما تعرفش يبقي لازم تحط الكسوف علي جنب وتثبتله انها قد المسؤليه وبعدين ابوه زمانه جاي هيلاقيها معاملتش اي حاجه
هيا محتاجه تثبت انها تنفع زوجه لادهم يبقي ابسط حاجه دي تعملها
بصتله الاول قلبها بيدق بسرعه من صدره العريان لانها اول مره ليها تشوف حد كده
بس حاليا مش وقته نهائي
ليلي: الاول اخلع القميص والبس الكتف المخلوع الاول
ادهم: انا بين ايديكي اعملي ما بدك
ليلي: من غير تلميحات
ادهم: هو انا قلت ايه؟
ليلي قلعته القميص خالص
ليلي: هو احنا ينفع نفك الروباط بتاع كتفك ده ونعلقه فوق القميص من بره
ادهم: اه ينفع هو اصلا كل وظيفته يسند كتفي مش اكتر
فكته ليلي براحه وفعلا شافت كتفه اللي كان كله ازرق جدا
هنا الدكتور دخلومعاه ممرضه
الدكتور: كويس انك فكيته،، الممرضه هنا هتدلك كتفك بالمرهم ده علشان بس يبدا يتحرك معاك واحده واحده وياريت لما تخرج يتدهن مرتين الصبح وبالليل
والعلاج هكتبه لوالدك محتاج اي حاجه تاني؟
ادهم: لا متشكر يا دوك see you
الدكتور: الف سلامه عليك هسيبك انا
خرج الدكتور والممرضه بصت لليلي كتير
الممرضه: حضرتك اتفضلي لحد ما ادهنله كتفه
ليلي: اعتبريني مش موجوده
ادهم مبسوط من غيره ليلي اللي حس انها ممكن تمسك الممرضه وتضربها
الممرضه: اصل انا هدهنله كل الاصابات في جسمه مش كتفه وبس
ليلي: اتفضلي ؟؟؟ اتفضلي اعملي اللي هتعمليه ومالكيش دعوه بيا
ليلي وقفت وايديها في وسطها فادهم خاف للوضع يتطور
ادهم: ليلي حبيبتي براحه وانتي انجزي وخلصي علشان عايز امشي
الممرضه: اصلا ده مش وقت زياره
ادهم: خطيبتي تزورني وقت ما تحب مش وقت الزياره
الممرضه: خطيبتك؟؟؟
ليلي: ايه عندك مانع علي دي كمان؟
الممرضه: لا يا افندم
الممرضه اتغاظت من ليلي جدا وكمان ليلي
الممرضه بدات تدهن كتف ادهم بس بدلع ونظراتها لليلي بتضايقها اكتر واكتر
ادهم ملاحظ ليلي اللي عنيها بتطلع شرار وكمان ملاحظ الطريقة اللي الممرضه بتدهن بيها كتفه بس في نفس الوقت مستمتع جدا بغيظ ليلي وغيرتها
ليلي: ايه مش كفايه كده ولا انتي فاضيه؟
الممرضه: لا طبعا لازم يتدلك كويس علشان يخف اسرع ويقدر يحركه
ليلي: طيب اتفضلي انتي وانا هدلكوله كويس
الممرضه: بس
قاطعها ادهم: ما بسش اتفضلي انتي
سابتهم الممرضه وهيا عايزه تخنق ليلي
اما ليلي قعدت وري ادهم وبتدلكله كتف بعنف وغيظ
ادهم: اوووو اه بت.. انتي يابت اهدي
تصدقي انا غلطان اني مشيتها
ليلي: بقي كده سيادتك مستمتع بيها تصدق انا غلطانه اصلا اني جيتلك سلام
ويدوب هتمشي فادهم مسك ايدها
ادهم: هاه وبعدين عايزه خناقه والسلام
ليلي: هو انت ما شفتش كانت بتغيظني ازاي؟ ادهم: كانت بتشوف شغلها ___ شغلها بيطلب منها كده وهيا عارفه اني لو اتضايقت منها هيكون التمن شغلها
ليلي: هو شغلها يطلب منها انها تتمايص كده؟
ادهم: مع اني مش عارف معني الكلمه دي ايه؟ بس هيا لقتك اتضايقت فساءت فيها اما انتي بقي رد فعلك ايه؟ والنتيجه ايه؟
ليلي: يعني ايه؟
ادهم: يعني انتي سمعتي الدكتور بيقول ان التدليك مهم لكتفي وانتي حاليا مشيتي الممرضه وقولتي هتدلكيه انتي بس لقيتك بتطلعي غلك منها فيا ونسيتي ان كتفي ده مصاب
ليلي بصت للارض وسكتت
ادهم: وعلي فكره انا ما بهزرش وبمثل مثلا اني كتفي تعبان واكيد باين علي شكله
ليلي: انا مقلتش ابدا انك بتمثل بس انا
ادهم: انتي ايه؟؟ انتي حبيبتي انتي وبس ولا حبيت قبلك ولا هحب بعدك؟ وده شيئ لازم تقتنعي بيه انتي الاول
ليلي: انا عارفه
ادهم: لا مش عارفه لو عارفه ومقتنعه مكنتش حته ممرضه لا راحت ولا جت تخليكي تتجنني وتغيري منها
امال لو واحده already انا عارفها وكانت صحبتي هتعملي ايه؟
ليلي: اسفه
ادهم: انا مش عايز اسفك انا عايز ثقتك فيا وفي حبي والاهم ثقتك في نفسك
ليلي: حاضر تسمحلي بقي اكمل تدليك كتفك واسفه لو كنت عنيفه معاك
هنا ابوه دخل
علي: ما جهزتوش ليه؟ امال بتعملوا ايه؟
ادهم: الدكتور كان هنا وممرضه وطلب دهان لكتفي
علي: طيب ومستنين ايه؟ ليلي لو مش هتعرفي انادي علي اي ممرضه؟
ادهم ابتسم وبص لليلي
ادهم: قولتش حاجه انا
ليلي: لا هعرف يا عمي خمس دقايق وهيكون جاهز
دلكت ليلي كتفه بس المره دي براحه وبرقه
المره دي كان مستمتع جدا بلمساتها
خلصت ولبسته براحه وجهزته ولمت كل حاجته من الاوضه في شنطته وهو بيتفرج عليها وكل لحظه بتمر بتاكدله ان اختياره كان صح جدا
ليلي: في حاجه تانيه ناقصه؟
ادهم: مش ناقص غير انك تروحي معايا وتفضلي جنبي وبس
ليلي: هانت يا حبيبي
هنا الباب خبط ودخل حسين
ادهم: يا اهلا
حسين: اهلا بحضرتك اتمني تكون احسن حاليا بس اعتقد انك اتحسنت كتير ياتري ايه السبب ادهم: علي فكره ليلي ما بتحبش التلميحات
ليلي: لا مش كده بس مش في اي وقت ومش من اي حد
حسين: متشكر يا بنتي اسكت انت بقي
ادهم: بقي كده؟ طيب انتي يالا علي بيتك وانت يالا مطرود
حسين: انا مطرود؟؟؟ ماشي بس المره دي ما تجيش تدق بابي تاني وتقولي ارجع
ليلي: ما تخدش في بالك يا عم حسين ده هو حاليا تعبان ومش هناخد بكلامه ولا ايه؟
حسين: علي رايك صح ليس علي المريض حرج
ادهم: بقي كده انتو بتشأطوني لبعض
حسين: بنشأطك؟؟؟ جبت الكلمه دي منين؟ لا اتغيرت يا ادهم
ادهم: ولسه انت شوفت حاجه المهم فين علي
ليلي: علي ده اللي هو ابوك؟؟؟ اسمه علي؟؟؟
ادهم: امال اسمه ايه؟ طول عمره علي
ليلي: انا قصدي بابا مش علي
ادهم: انتي قولي بابا دي انا علي وريهام
حسين: راح الشغل لان في اجتماع مهم وطلب مني اوصلك
ادهم: طيب يالا بينا هتيجي معايا ولا ايه؟
ليلي: لا هنيجي اخر النهار بينا تليفون يا سلام
ادهم: تعالي هنا سلام ايه؟ تعالي انا هوصلك
وصلها وهو روح واول ما دخل امه قابلته
ادهم: ادخل ولا اروح فندق لحد ما اجهز شقتي؟؟
ريهام: انت بتقول ايه ده بيتك حبيبي
ادهم: ليلي جايه النهارده هيا واهلها
ريهام: وبعدين مطلوب مني ايه؟
ادهم: تقابليهم كويس وترحبي بيهم
ريهام: ولو رفضت؟
ادهم: يبقي ما تقابليهمش خالص وتروحي تقابلي صحابك او تخرجي او what ever وراكي ليه اعمليه
ريهام: انت عايزني اخرج من بيتي علشان حبيبتك جايه؟؟؟
ادهم: اه هنلعب بقي ونحور في الكلام علي مزاجنا
انا تعبان ولا قادر اقف ولا اتكلم كتير
يا تقابليهم كويس يا ما تقابليهمش تخرجي تدخلي تروحي المكان اللي يريح حضرتك براحتك المهم عندي الزياره دي تعدي علي خير
ريهام: في حل تاني
ادهم: اللي هو!؟؟
ريهام: أاقابلهم واطردهم واعرفهم قيمتهم وبكده افركش الجوازه من اولها
: ادهم: لا مش هتتفركش الجوازه ولا حاجه هتعمل مشاكل اه لكن مش هتتفركش
كل اللي هيحصل انك كده بتخرجيني انا من البيت لان لو ده حصل قسما بالله ما هوريكي وشي تاني
ريهام: ماشي يا ادهم براحتك وانا كمان براحتي مش هعملك مشاكل بس خليك فاكر ان انا وراك لحد ما اخرج البنت دي بره حياتك نهائي
ادهم: مش هيحصل ابدا
ريهام: طيب خلي الايام تحكم
وجه اخر النهار وليلي وعيلتها وصلو والكل اتفاجئ بريهام بتنزل وتستقبلهم هيا بنفسها
ونكمل بكره
يا تري ريهام هتعمل ايه؟
ادهم هيقدر يتغلب علي امه ومكرها ولا هيخسر حبه؟
ليلي هتتقبل كره ريهام ليها ولا هتبعد؟
علي هيفضل متفرج ولا هيتدخل ويوقف مراته عند حدها؟ "